ಕಲಬುರಗಿ: ರಾಜ್ಯದಲ್ಲಿ ಮುಂಬರುವ ಸ್ಥಳೀಯ ಸಂಸ್ಥೆಗಳ ಚುನಾವಣೆಗಳಲ್ಲಿ ಬ್ಯಾಲೆಟ್ ಪೇಪರ್ ಬಳಸಿ ಮತದಾನ ನಡೆಸಲು ರಾಜ್ಯ ಚುನಾವಣಾ ಆಯೋಗಕ್ಕೆ ಶಿಫಾರಸು ಮಾಡಿರುವ ಕರ್ನಾಟಕ ಸರ್ಕಾರದ ಕ್ರಮವನ್ನು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಸಮರ್ಥಿಸಿಕೊಂಡಿದ್ದಾರೆ.

ಕಲಬುರಗಿಯಲ್ಲಿ ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಖರ್ಗೆ, ಹಲವಾರು ಲೋಕಸಭಾ ಮತ್ತು ವಿಧಾನಸಭಾ ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಮತ ಕಳ್ಳತನ ಆಗಿರುವ ಬಗ್ಗೆ ಶಂಕಿಸಿದೆ ಎಂದು ಹೇಳಿದರು. ಆದ್ದರಿಂದ, ಇವಿಎಂಗಳನ್ನು ದುರುಪಯೋಗಪಡಿಸಿಕೊಂಡು ಅಧಿಕಾರಕ್ಕೆ ಬಂದಿರುವ 'ಮತ ಕಳ್ಳತನ' ತಂತ್ರಗಳ ಬಗ್ಗೆ ಜಾಗೃತಿ ಮೂಡಿಸಲು ಕಾಂಗ್ರೆಸ್ ಅಭಿಯಾನ ಪ್ರಾರಂಭಿಸಿದೆ ಎಂದು ಅವರು ಹೇಳಿದರು.

2019ರ ಲೋಕಸಭಾ ಚುನಾವಣೆಯಲ್ಲಿ ಮತ ಕಳ್ಳತನದಿಂದಾಗಿ ತಮ್ಮ ತವರು ಕ್ಷೇತ್ರವಾದ ಕಲಬುರಗಿಯಿಂದ ಸೋತಿದ್ದೇನೆ ಎಂದು ಖರ್ಗೆ ಹೇಳಿಕೊಂಡಿದ್ದಾರೆ. 2019 ರ ಮೊದಲು ಸ್ಪರ್ಧಿಸಿದ ಎಲ್ಲಾ ಚುನಾವಣೆಗಳಲ್ಲಿ ಗೆದ್ದಿದ್ದೇನೆ ಎಂದು ಎಂದಿದ್ದಾರೆ. ಕಲಂ 371 ಜೆ ಗೆ ತಿದ್ದುಪಡಿ ತರುವ ಪ್ರಯತ್ನಗಳನ್ನು ಮಾಡುವುದು ಸೇರಿದಂತೆ ಕಲಬುರಗಿಗೆ ತಾವು ಸಾಕಷ್ಟು ಕೆಲಸ ಮಾಡಿರುವುದಾಗಿ ಖರ್ಗೆ ಹೇಳಿಕೊಂಡಿದ್ದಾರೆ.

ಕಲಬುರಗಿಯ ಜನರು ನನ್ನ ಬಗ್ಗೆ ಹೆಚ್ಚಿನ ಗೌರವ ಹೊಂದಿದ್ದಾರೆ. ಹೀಗಿರುವಾಗ, ಕಲಬುರಗಿ ಲೋಕಸಭಾ ಕ್ಷೇತ್ರದ 5-6 ವಿಧಾನಸಭಾ ಸ್ಥಾನಗಳಲ್ಲಿ ನನ್ನ ಸೋಲಿನ ಅಂತರ 20,000 ಕ್ಕಿಂತ ಹೆಚ್ಚು. ಮತ ಕಳ್ಳತನದಿಂದಾಗಿ ನಾನು ಸೋತಿದ್ದೇನೆ ಎಂದು ಇದು ಸ್ಪಷ್ಟವಾಗಿ ತೋರಿಸುತ್ತದೆ ಎಂದು ಅವರು ಹೇಳಿದರು. ಕಲಬುರಗಿ ಲೋಕಸಭಾ ಸ್ಥಾನದಲ್ಲಿ ಮತ ಕಳ್ಳತನದ ಅನುಮಾನಕ್ಕೆ ಪ್ರಧಾನಿ ನರೇಂದ್ರ ಮೋದಿಯವರು ಸಂಸತ್ತಿನಲ್ಲಿ ನೀಡಿದ "ಖರ್ಗೆ ಸಾಬ್ ಬಹುತ್ ಬಾರ್ ಜೀತೇ" ಎಂಬ ಹೇಳಿಕೆ ಮತ್ತೊಂದು ಕಾರಣ ಎಂದು ಖರ್ಗೆ ಹೇಳಿದರು.

ಜಿಎಸ್ ಟಿ ಸುಧಾರಣೆಗಳ ಕುರಿತು, ಕಾಂಗ್ರೆಸ್ ಮುಖ್ಯಸ್ಥರು ತಮ್ಮ ಪಕ್ಷವು ಕಳೆದ ಎಂಟು ವರ್ಷಗಳಿಂದ ಈ ಸುಧಾರಣೆಗಳಿಗಾಗಿ ಹೋರಾಡುತ್ತಿದೆ ಎಂದು ಹೇಳಿದರು. ಆದರೆ ಕೇಂದ್ರವು ಪಕ್ಷದ ಬೇಡಿಕೆಗಳನ್ನು ಅಂಗೀಕರಿಸಲಿಲ್ಲ. ಈ ಸಮಯದಲ್ಲಿ ಜಿಎಸ್ಟಿ ಸುಧಾರಣೆಗಳಿಗೆ ಕಾರಣ ನಮಗೆ ತಿಳಿದಿಲ್ಲ. ನಮ್ಮ ದೃಷ್ಟಿಕೋನದಿಂದ, ಜಿಎಸ್ಟಿ ಸುಧಾರಣೆಗಳು ಬಡವರಿಗೆ ಪ್ರಯೋಜನಕಾರಿಯಾಗಿದೆ. ನಾನು ಇದನ್ನು ರಾಜಕೀಯವಾಗಿ ನೋಡುವುದಿಲ್ಲ. ನಾನು ಟೀಕಿಸುವುದಿಲ್ಲ. ನಾವು ಯಾವಾಗಲೂ ಜನಪರರು ಎಂದು ಅವರು ಹೇಳಿದರು.

ಮೋದಿ ಸರ್ಕಾರದ ವಿದೇಶಾಂಗ ನೀತಿಯ ಬಗ್ಗೆ ಮಾತನಾಡಿದ ಅವರು, ಚೀನಾವನ್ನು ಬಹಳ ದಿನಗಳಿಂದ ನಿರ್ಲಕ್ಷಿಸಲಾಗಿದೆ. ಈಗ ಮೋದಿ ಅದೇ ದೇಶಕ್ಕೆ ಹೋಗಿದ್ದಾರೆ. ಭಾರತ ಸಮಸ್ಯೆಗಳನ್ನು ಎದುರಿಸಿದಾಗ, ನಾವು (ಕಾಂಗ್ರೆಸ್) ನಾವೆಲ್ಲರೂ ಒಂದೇ ಎಂಬ ಸಂದೇಶವನ್ನು ನೀಡಿದ್ದೇವೆ. ಪಹಲ್ಗಾಮ್ ದಾಳಿಯ ಸಮಯದಲ್ಲಿಯೂ ನಾವು ಕೇಂದ್ರವನ್ನು ಬೆಂಬಲಿಸಿದ್ದೇವೆ. ಆದರೆ ಬಿಜೆಪಿ ಯಾವಾಗಲೂ 'ಮೋದಿ ಹೈ, ಮೋದಿ ಹೈ' ಎಂದು ಹೇಳುತ್ತದೆ" ಎಂದು ಖರ್ಗೆ ಹೇಳಿದರು.