ನವದೆಹಲಿ: 2020 ರ ಮೊದಲ ಚಂದ್ರ ಗ್ರಹಣ ಇಂದು ಸಂಭವಿಸಲಿದ್ದು, ಇಂದು ರಾತ್ರಿ 2.42 ರವರೆಗೂ ಚಂದ್ರಗ್ರಹಣ ಗೋಚರವಾಗಲಿದೆ.
2019 ರ ಅಂತ್ಯದ ವೇಳೆಗೆ, ಇಡೀ ಜಗತ್ತು ಅದ್ಭುತ ಸೂರ್ಯಗ್ರಹಣಕ್ಕೆ ಸಾಕ್ಷಿಯಾಗಿತ್ತು. ಇದೀಗ ವರ್ಷಾರಂಭದಲ್ಲೇ ಚಂದ್ರ ಗ್ರಹಣ ಸಂಭವಿಸುತ್ತಿದೆ. ಇಂದು ರಾತ್ರಿ 10.38 ರಿಂದ ಪ್ರಾರಂಭವಾಗಲಿರುವ ಚಂದ್ರ ಗ್ರಹಣ, ತಡರಾತ್ರಿ 2.42 ರವರೆಗೆ ಮುಂದುವರಿಯಲಿದೆ. 2020 ರ ಆರಂಭದ ಎರಡನೇ ವಾರದಲ್ಲಿ ಚಂದ್ರ ಗ್ರಹಣ ಸಂಭವಿಸುತ್ತಿದ್ದು, ಇದನ್ನು ಯುರೋಪ್ ಮತ್ತು ಅಮೆರಿಕ ದೇಶಗಳಲ್ಲಿ "ವೋಲ್ಫ್ ಎಕ್ಲಿಪ್ಸ್" (ತೋಳ ಚಂದ್ರ ಗ್ರಹಣ)ಎಂದು ಕರೆಯಲಾಗುತ್ತಿದೆ.
ಜನವರಿ ಮಾಸವು ತೋಳಗಳ ಸಂತಾನಾಭಿವೃದ್ಧಿಯ ಸಮಯವಾಗಿದೆ. ಈ ಹಿನ್ನಲೆಯಲ್ಲಿ ಪಾಶ್ಚಾತ್ಯ ಸಂಸ್ಕೃತಿಗಳಲ್ಲಿ ಜನವರಿ ತಿಂಗಳಿನಲ್ಲಿ ಘಟಿಸುವ ಚಂದ್ರಗ್ರಹಣವನ್ನು “ತೋಳಗ್ರಹಣ’ ಎಂದು ಕರೆಯುವ ವಾಡಿಕೆಯಿದೆ. ಇದೇ ಕಾರಣಕ್ಕೆ ಇದನ್ನು ತೋಳ ಗ್ರಹಣ ಎಂದು ಕರೆಯಲಾಗುತ್ತಿದೆ. ಈ ವರ್ಷದ ಮೊದಲ ಚಂದ್ರಗ್ರಹಣವು ಭಾರತದಾದ್ಯಂತ ಗೋಚರಿಸಲಿದ್ದು, ಭಾರತ ಮಾತ್ರವಲ್ಲದೇ ಅಮೆರಿಕ, ಕೆನಡಾ, ಬ್ರೆಜಿಲ್, ಅರ್ಜೆಂಟೀನಾ ಮುಂತಾದ ದೇಶಗಳಲ್ಲಿ ಈ ಚಂದ್ರ ಗ್ರಹಣ ಗೋಚರಿಸಲಿದೆ.
ವೈಜ್ಞಾನಿಕವಾಗಿ ಹೇಳುವುದಾದರೆ, ಈ ಗ್ರಹಣವನ್ನು ಸಂಪೂರ್ಣ ಚಂದ್ರ ಗ್ರಹಣ ಎಂದು ಕರೆಯಲಾಗುವುದಿಲ್ಲ, ಏಕೆಂದರೆ ಇದು ನೆರಳಿನ ಗ್ರಹಣವಾಗಿದ್ದು ಅಂತಹ ಪರಿಸ್ಥಿತಿಯಲ್ಲಿ ಚಂದ್ರನ ಸ್ಥಾನದಲ್ಲಿ ಯಾವುದೇ ವಿಶೇಷ ಬದಲಾವಣೆಗಳಾಗುವುದಿಲ್ಲ, ಆದರೆ ಚಂದ್ರನ ಸುಂದರವಾದ ಚಿತ್ರ ಖಂಡಿತವಾಗಿಯೂ ಹೊರಹೊಮ್ಮುತ್ತದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಇನ್ನು 2020 ರಲ್ಲಿ ಒಟ್ಟು 4 ಚಂದ್ರ ಗ್ರಹಣಗಳು ಮತ್ತು ಎರಡು ಸೂರ್ಯಗ್ರಹಣಗಳು ಸಂಭವಿಸಲಿದ್ದು, ಜನವರಿ 10, ಜೂನ್ 05, ಜುಲೈ 05 ಮತ್ತು ನವೆಂಬರ್ 30 ರಂದು ಚಂದ್ರಗಹಣ ಗೋಚರವಾಗಲಿದ್ದು, ಜೂನ್ 21 ಮತ್ತು ಡಿಸೆಂಬರ್ 14 ರಂದು ಸೂರ್ಯಗ್ರಹಣಗಳು ಸಂಭವಿಸಲಿವೆ ಎಂದು ವಿಜ್ಞಾನಿಗಳು ಮಾಹಿತಿ ನೀಡಿದ್ದಾರೆ.