ಪ್ಯಾರಿಸ್: ಕೇವಲ ೨೩೦ ಪುಸ್ತಕಗಳಷ್ಟೇ ವಿಶ್ವದಾದ್ಯಂತ ಉಳಿದಿವೆ ಎಂದು ನಂಬಲಾದ 'ಶೇಕ್ಸ್ಪಿಯರ್ ಫರ್ಸ್ಟ್ ಫೋಲಿಯೊ' ಸೇಂಟ್-ಒಮರ್ ಗ್ರಂಥಾಲಯದಲ್ಲಿ ೨೦೦ ವರ್ಷಗಳಿಂದ ಯಾರೂ ಎರವಲು ಪಡೆಯದೆ ಬಿದ್ದದ್ದು ಪತ್ತೆಯಾಗಿದೆ.
ಏನಿದು ಶೇಕ್ಸ್ಪಿಯರ್ ಫರ್ಸ್ಟ್ ಫೋಲಿಯೊ?
೧೬೨೩ ರಲ್ಲಿ ಪ್ರಕಟವಾದ ಈ ಪುಸ್ತಕ ಶೇಕ್ಸ್ಪಿಯರ್ ನ ೩೬ ನಾಟಕಗಳನ್ನೊಳಗೊಂಡ, ಫೋಲಿಯೊ ವಿನ್ಯಾಸದಲ್ಲಿ ಮುದ್ರಣವಾದ ಈ ಪುಸ್ತಕ ಅತಿ ವಿರಳ. ಇದನ್ನು ಸಂಪಾದಿಸಿದ್ದವರು ಶೇಕ್ಸ್ಪಿಯರ್ ನ ಸಹೋದ್ಯೋಗಿಗಳಾದ ಜಾನ್ ಹೆಮ್ಮಿಂಗ್ಸ್ ಮತ್ತು ಹೆನ್ರಿ ಕಾಂಡೆಲ್. ಈ ವಿಶ್ವವಿಖ್ಯಾತ ನಾಟಕಕಾರ ಸತ್ತ ಏಳು ವರ್ಷದ ನಂತರ ಪ್ರಕಟವಾಗಿತ್ತು. ಇದರ ೮೦೦ ಪ್ರತಿಗಳು ಮುದ್ರಣವಾಗಿ ಕೇವಲ ೨೩೦ ಪುಸ್ತಕಗಳಷ್ಟೇ ವಿಶ್ವದಾದ್ಯಂತ ಗ್ರಂಥಾಲಯಗಳಲ್ಲಿ ಮತ್ತು ವಿರಳ ಪುಸ್ತಕ ಸಂಗ್ರಹಗಾರರಲ್ಲಿದೆ ಎಂದು ನಂಬಲಾಗಿದೆ. ಈ ನಾಟಕಕಾರನ ಎಷ್ಟೋ ನಾಟಕಗಳು ಜನರಿಗೆ ತಲುಪಲು ಇದ್ದ ಒಂದೇ ಮೂಲ ಇದಾಗಿತ್ತು.
ಮೂಲ ಬೆಲೆ ೧ ಪೌಂಡ್ ಆಗಿದ್ದ ಈ ಪುಸ್ತಕ ಇಂದು ೧೫-೨೦ ಮಿಲಿಯನ್ ಪೌಂಡ್ ವರೆಗೆ ಮಾರಾಟವಾಗಬಹುದು ಎಂದು ಹೇಳಲಾಗುತ್ತದೆ.