ಮುಂಬೈ: ಬಿಸಿಸಿಐನ ಬೆಟ್ಟಿಂಗ್ ಹಾಗೂ ಫಿಕ್ಸಿಂಗ್ ನಿಗ್ರಹ ದಳದ ಎಚ್ಚರಿಕೆಯ ನಡುವೆಯೂ ಕೆಲವೊಂದು ಐಪಿಎಲ್ ತಂಡಗಳ ಮಾಲೀಕರು ತಮ್ಮ ತಂಡಗಳ ಆಟಗಾರರಿಗಾಗಿ ಏರ್ಪಡಿಸುವ ಪಾರ್ಟಿಗಳಲ್ಲಿ ಅನಧಿಕೃತವಾಗಿ ಕೆಲವು ವ್ಯಕ್ತಿಗಳು ಭಾಗಿಯಾಗುತ್ತಿರುವುದನ್ನು ಪತ್ತೆಹಚ್ಚಲಾಗಿದೆ.
ಇತ್ತೀಚೆಗೆ, ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಆಟಗಾರರಿಗಾಗಿ ಏರ್ಪಡಿಸಿದ್ದ ಪಾರ್ಟಿಯೊಂದರಲ್ಲಿ ತಂಡದ ಮಾಲೀಕರಾದ ಪ್ರೀತಿ ಜಿಂಟಾ ಅವರ ಸ್ನೇಹಿತೆ ಎಂದು ಹೇಳಲಾದ ಹುಡುಗಿಯೊಬ್ಬಳು ಪಾಲ್ಗೊಂಡಿದ್ದಳು. ಅಲ್ಲದೆ, ಚೆನ್ನೈ ಸೂಪರ್ ಕಿಂಗ್ಸ್ ಆಟಗಾರನೊಬ್ಬನೊಂದಿಗೆ ಯುವತಿಯೊಬ್ಬಳು ಇಡೀ ರಾತ್ರಿ ಆತನ ಜೊತೆ ಹೋಟೆಲ್ ರೂಂನಲ್ಲಿ ಉಳಿದಿದ್ದಾಳೆ.
ಕೋಲ್ಕತಾ ನೈಟ್‍ರೈಡರ್ಸ್ ತಂಡದ ಆಟಗಾರರಿಗಾಗಿ ಏರ್ಪಡಿಸಲಾಗಿದ್ದ ಪಾರ್ಟಿಯಲ್ಲೂ ಕೆಕೆಆರ್ ಫ್ರಾಂಚೈಸಿ ಮಾಲೀಕ ಶಾರೂಖ್ ಖಾನ್ ಅವರ ಸಂಬಂಧಿಗಳೆಂದು ಹೇಳಿಕೊಂಡ
ಕೆಲವರು ಭಾಗಿಯಾಗಿರುವುದು ಈಗ ನಿಗ್ರಹ ದಳದ ಕಣ್ಣು ಕೆಂಪಾಗಿಸಿದೆ. ಈ ಘಟನೆಗಳನ್ನು ಗಂಭೀರವಾಗಿ ತೆಗೆದುಕೊಂಡಿರುವ ಅದು, ಈ ಬಗ್ಗೆ ಫ್ರಾಂಚೈಸಿಗಳಿಗೆ ಸ್ಪಷ್ಟನೆ ಕೋರಿದೆ. ಆದರೆ, ಫ್ರಾಂಚೈಸಿಗಳು ಈ ಆರೋಪಗಳನ್ನು ಸುತರಾಂ ಒಪ್ಪಿಕೊಂಡಿಲ್ಲ.