ನವದೆಹಲಿ: ಮಾಜಿ ಫಾರ್ಮುಲಾ ಒನ್ ರೇಸ್ ಚಾಂಪಿಯನ್ ಮೈಕೆಲ್ ಶೂಮಾಕರ್ ಅವರು ವೈದ್ಯರ ಚಿಕಿತ್ಸೆಗೆ ಸ್ಪಂಧಿಸುತ್ತಿದ್ದಾರೆ ಎಂದು ಅವರ ಮಾಜಿ ಗುರು ಲುಕಾ ಮಾಂಟೆಜೆಮೊಲೊ  ತಿಳಿಸಿದ್ದಾರೆ.

ಫೆರಾರಿ ತಂಡವನ್ನು ಪ್ರತಿನಿಧಿಸುತ್ತಿದ್ದ 47 ರ ಹರೆಯದ 7 ಬಾರಿಯ ವಿಶ್ವ ಫಾರ್ಮುಲಾ ಒನ್ ರೇಸ್ ಚಾಂಪಿಯನ್ ಶೂಮಾಕರ್ 2013 ರಲ್ಲಿ ಫ್ರಾನ್ಸ್​ನಲ್ಲಿ ಸ್ಕೈಯಿಂಗ್(ಹಿಮ ಕ್ರೀಡೆ) ಮಾಡುವ  ವೇಳೆ ಆಯತಪ್ಪಿ ಕಲ್ಲಿನ ಬಂಡೆಗೆ ತಲೆ ಬಡಿದು ಕೋಮಾ ಸ್ಥಿತಿಗೆ ತೆರಳಿದ್ದರು. ಸತತ 2 ವರ್ಷಗಳ ಚಿಕಿತ್ಸೆ ಬಳಿಕ ಇದೀಗ ಕೋಮಾದಿಂದ ಹೊರಬಂದಿರುವ ಶೂಮಾಕರ್ ಚಿಕಿತ್ಸೆಗೆ  ಸ್ಪಂಧಿಸುತ್ತಿದ್ದು, ಅವರ ಆರೋಗ್ಯ ಸ್ಥಿತಿಯಲ್ಲಿ ಚೇತರಿಕೆ ಕಂಡು ಬಂದಿದೆ ಎಂದು ತಿಳಿದುಬಂದಿದೆ.

ಈ ಬಗ್ಗೆ ಮಾತನಾಡಿರುವ ಅವರ ಮಾಜಿ ಗುರು ಲುಕಾ ಮಾಂಟೆಜೆಮೊಲೊ ಅವರು ಶೂಮಾಕರ್ ಚೇತರಿಸಿಕೊಳ್ಳುತ್ತಿರುವುದು ಅವರ ಅಭಿಮಾನಿಗಳಲ್ಲಿ ಸಂತಸ ತಂದಿದೆ. ಆದಷ್ಟು ಬೇಗ ಸಹಜ  ಸ್ಥಿತಿಗೆ ಶೂಮಾಕರ್ ಮರಳಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಶೂಮಾಕರ್ 6 ತಿಂಗಳು ಆಸ್ಪತ್ರೆಯಲ್ಲಿ ಕಳೆದ ನಂತರ ಸ್ವಿಟ್ಜರ್ಲೆಂಡ್​ನಲ್ಲಿರುವ ಅವರ ಮನೆಗೆ ಸ್ಥಳಾಂತರಿಸಲಾಗಿತ್ತು. ಮನೆಯಲ್ಲಿಯೂ ಕೂಡ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಮುಂದುವರೆಸಲಾಗುತ್ತಿದೆ.