ಗೋಲ್ಡ್ ಕೋಸ್ಟ್: ಕಾಮನ್ ವೆಲ್ತ್ ಕ್ರೀಡಾಕೂಟದಲ್ಲಿ ಭಾರತದ ಪದಕ ಬೇಟೆ ಮುಂದುವರೆದಿದ್ದು, ಶೂಟಿಂಗ್ ವಿಭಾಗದಲ್ಲಿ ಭಾರತದ ಹೀನಾ ಸಿಧು ಅಗ್ರ ಸ್ಥಾನ ಗಳಿಸುವ ಮೂಲಕ ಚಿನ್ನದ ಪದಕ ಗಳಿಸಿದ್ದಾರೆ.

ಆಸ್ಟ್ರೇಲಿಯಾದ ಗೋಲ್ಡ್ ಕೋಸ್ಟ್ ನಲ್ಲಿ ಇಂದು ನಡೆದ ಮಹಿಳೆಯರ 25 ಮೀಟರ್ ಶೂಟಿಂಗ್ ಸ್ಪರ್ಧೆಯಲ್ಲಿ ಭಾರತದ ಹೀನಾ ಸಿಧು ಚಿನ್ನದ ಬದಕ ಬಾಚಿದ್ದಾರೆ. ಪ್ರಿಸೆಷನ್ ಮತ್ತು ರ್ಯಾಪಿಡ್ ಹಂತದಗಳಲ್ಲಿ ತಲಾ 286 ಮತ್ತು 293 ಅಂಕಗಳಿಸಿದ ಹೀನಾ ಸಿಧು ಒಟ್ಟು 579 ಅಂಕಗಳಿಸುವ ಮೂಲಕ ಅಗ್ರ ಸ್ಥಾನಕ್ಕೇರಿದರು. ಅಂತಿಮ ಹಂತದಲ್ಲಿ ದಾಖಲೆಯ 38 ಅಂಕಗಳಿಸಿ ಚಿನ್ನದ ಪದಕಕ್ಕೆ ಭಾಜನರಾದರು. ಹೀನಾ ಸಿಧುಗೆ ಇದು 2ನೇ ಕಾಮನ್ ವೆಲ್ತ್ ಪದಕವಾಗಿದೆ.

ಹೀನಾ ಸಿಧು ಅವರ ಚಿನ್ನದ ಪದಕದ ಮೂಲಕ ಭಾರತದ ಚಿನ್ನದ ಪದಕ ಗಳಿಕೆ 11ಕ್ಕೇರಿದ್ದು, ಅಂತೆಯೇ ಪದಕ ಪಟ್ಟಿಯಲ್ಲಿ ಭಾರತದ ಮೂರನೇ ಸ್ಥಾನ ಮತ್ತಷ್ಟು ಭದ್ರವಾಗಿದೆ. ಮೂರನೇ ಸ್ಥಾನಕ್ಕೆ ತಲಾ 8 ಚಿನ್ನದ ಪದಕ ಗಳಿಸಿರುವ ನ್ಯೂಜಿಲೆಂಡ್ ಮತ್ತು ದಕ್ಷಿಣ ಆಫ್ರಿಕಾ ತೀವ್ರ ಪೈಪೋಟಿ ನೀಡುತ್ತಿವೆ.