ನವದೆಹಲಿ: ಖ್ಯಾತ ವರ್ಲ್ಡ್ ರೆಸ್ಲಿಂಗ್ ಎಂಟರ್ಟೈನ್ಮೆಂಟ್ (WWE) ತನ್ನ ಮುಂದಿನ ತಲೆಮಾರಿನ ಸೂಪರ್ ಸ್ಚಾರ್ ಗಳಿಗಾಗಿ ಶೋಧ ಆರಂಭಿಸಿದ್ದು, ಮುಂಬರುವ ಮಾರ್ಚ್ ತಿಂಗಳಿನಲ್ಲಿ ಭಾರತದಲ್ಲಿ ಟ್ಯಾಲೆಂಟ್ ಹಂಟ್ ನಡೆಸಲಾಗುತ್ತದೆ ಎಂದು ಪ್ರಕಟಣೆ ನೀಡಿದೆ.

ವಾಣಿಜ್ಯ ರಾಜಧಾನಿ ಮುಂಬೈನಲ್ಲಿ ನಾಲ್ಕು ದಿನಗಳ ಕಾಲ WWE ಆಡಳಿತ ವರ್ಗ ಪ್ರತಿಭಾ ಶೋಧ ನಡೆಸಲಿದೆ. ಮೂಲಗಳ ಪ್ರಕಾರ ಭಾರತದಿಂದ WWE 40 ಪ್ರತಿಭೆಗಳನ್ನು ಆಯ್ಕೆ ಮಾಡಲಿದ್ದು, ಆಯ್ಕೆಯಾದ 40 ಮಂದಿ ಸ್ಪರ್ಧಾಳುಗಳಿಗೆ ಅಮೆರಿಕದ ಒರ್ಲಾಂಡೋದಲ್ಲಿರುವ WWE ಪರ್ಫಾರ್ಮೆನ್ಸ್ ಸೆಂಟರ್ ನಲ್ಲಿ ತರಬೇತಿ ನೀಡಲಾಗುತ್ತದೆ. ತರಬೇತಿ ವೇಳೆ ಸ್ಪರ್ಧಿಗಳಿಗೆ ವಿವಿಧ ಬಗೆಯ ಕ್ರೀಡೆಗಳು, ಅಂದರೆ ಕುಸ್ತಿ, ಕಬ್ಬಡ್ಡಿ, ರಸ್ಲಿಂಗ್, ಅಮೆರಿಕನ್ ಫುಟ್ಬಾಲ್, ಬಾಸ್ಕೆಟ್ ಬಾಲ್, ಕ್ರಿಕೆಟ್, ದೇಹದಾರ್ಢ್ಯ ಮತ್ತು ಯುದ್ಧ ಕ್ರೀಡೆಗಳ ತರಬೇತಿ ನೀಡಲಾಗುತ್ತದೆ ಎಂದು WWE ಮೂಲಗಳು ತಿಳಿಸಿವೆ.

ಇನ್ನು WWE ಪ್ರತಿಭಾ ಶೋಧ ಸೂಪರ್ ಸ್ಟಾರ್ ಹಾಗೂ WWE ಕಾರ್ಯನಿರ್ವಾಹಕ ಉಪಾಧ್ಯಕ್ಷ ಟ್ರಿಪಲ್ ಹೆಚ್ ನೇತೃತ್ವದಲ್ಲಿ ನಡೆಯಲಿದೆ. 

ಈ ಬಗ್ಗೆ ಮಾತನಾಡಿರುವ ಟ್ರಿಪಲ್ ಹೆಚ್, 'WWE ವಿಶ್ವಾದ್ಯಂತ ಜನಪ್ರಿಯ ಕ್ರೀಡೆಯಾಗಿದೆ. ಭಾರತದಲ್ಲೂ ಅತೀ ಹೆಚ್ಚು ಕ್ರೀಡಾಭಿಮಾನಿಗಳಿದ್ದು, ಅಭಿಮಾನಿಗಳಷ್ಟೇ ಅಲ್ಲದೇ ಅವಕಾಶಕ್ಕಾಗಿ ಕಾಯುತ್ತಿರುವ ಸಾಕಷ್ಚು ಪ್ರತಿಭೆಗಳೂ ಕೂಡ ಇವೆ. ಈ ಪ್ರತಿಭೆಗಳಿಗೆ ಟ್ಯಾಲೆಂಟ್ ಹಂಟ್ ಉತ್ತಮ ವೇದಿಕೆಯಾಗಿದೆ ಎಂದು ಹೇಳಿದರು.

ಇನ್ನು ಈ ಹಿಂದೆ ದಿ ಗ್ರೇಟ್ ಖಲಿ ಅವರ ತರಬೇತಿ ಕೇಂದ್ರದಿಂದ ಆವಿಷ್ಕರಣೆಯಾಗಿದ್ದ ಹರ್ಯಾಣ ಮೂಲದ ಕವಿತಾ ದೇವಿ ಅವರನ್ನು 2017ರ ಏಪ್ರಿಲ್ ನಲ್ಲಿ ದುಬೈನಲ್ಲಿ ನಡೆದ ಪ್ರತಿಭಾ ಶೋಧದಲ್ಲಿ WWEಗೆ ಆಯ್ಕೆ ಮಾಡಿದ್ದನ್ನು ಇಲ್ಲಿ ಸ್ಮರಿಸಬಹುದು.