ಗ್ರೇಟರ್ ನೋಯ್ಡಾ: 2018ರ ಪ್ರೊ ಕಬಡ್ಡಿ ಟೂರ್ನಿಯ ಆರನೇ ಆವೃತ್ತಿಯಲ್ಲಿ ಬೆಂಗಳೂರು ಬುಲ್ಸ್ ತಂಡ ನಾಗಾಲೋಟ ಮುಂದುವರೆಸಿದೆ. ಇಂದು ನಡೆದ ಯುಪಿ ಯೋಧಾ ತಂಡ ವಿರುದ್ಧದ ಪಂದ್ಯದಲ್ಲಿ ಬುಲ್ಸ್ ಭರ್ಜರಿ ಗೆಲುವು ಸಾಧಿಸಿದೆ.
ಯುಪಿ ಯೋಧಾ ತಂಡವನ್ನು 37-27 ಅಂಕಗಳಿಂದ ಮಣಿಸಿ ಬುಲ್ಸ್ ತಂಡ ಬಿ ವಲಯದಲ್ಲಿ ಅಗ್ರಸ್ಥಾನದಲ್ಲಿದೆ. ಇನ್ನು ಕಳೆದ ನಾಲ್ಕು ಪಂದ್ಯಗಳಲ್ಲೂ ಬುಲ್ಸ್ ತಂಡ ಸತತ ಗೆಲುವು ದಾಖಲಿಸಿದೆ.
ಪಂದ್ಯದ ಮೊದಲಾರ್ಧದಲ್ಲಿ ಬೆಂಗಳೂರು ಬುಲ್ಸ್ ತಂಡ 19-11 ಅಂಕಗಳೊಂದಿಗೆ ಭರ್ಜರಿ ಮುನ್ನಡೆ ಕಾಯ್ದುಕೊಂಡಿತ್ತು. ದ್ವಿತೀಯಾರ್ಧದಲ್ಲಿ 16 ಅಂಕ ಸಂಪಾದಿಸಿ ಗೆಲುವಿನ ನಗೆ ಬೀರಿತು.
ಬುಲ್ಸ್ ಪರ ಸ್ಟಾರ್ ರೈಡರ್ ಪವನ್ ಶೆರಾವತ್ ಸೂಪರ್ 10 ಅಂಕ ಪಡೆದು ಗೆಲುವಿನ ರೂವಾರಿ ಎನಿಸಿದರು. ರೋಹಿತ್ ಕುಮಾರ್ 7 ಮತ್ತು ಮಹೇಂದ್ರ ಸಿಂಗ್ 6 ಅಂಕ ಗಳಿಸಿದರು.