ಕಥೆಗೂ, ಮಕ್ಕಳಿಗೂ ಭಾರಿ ನಂಟು. ಕಥೆಗಳು ಮಕ್ಕಳಿಗೆ ಖುಷಿ ನೀಡುವುದಷ್ಟೇ ಅಲ್ಲ, ಅವರ ಕಲ್ಪನಾ ಶಕ್ತಿಯನ್ನು ಹೆಚ್ಚಿಸುತ್ತವೆ ಕೂಡ. ಹೊಸಹೊಸ ಕಥೆಗಳನ್ನು ಹೇಳುವುದು ಪಾಲಕರಿಗೂ ಸವಾಲು. ಮೈಸೂರಿನ ಹೊರೆಯಾಲ ದೊರೆಸ್ವಾಮಿ ಅವರ 'ಹುಡುಗ ಮತ್ತು ನೇರಳೆ ಮರ' ಒಂದಷ್ಟು ಕಥೆಗಳ ಗಂಟನ್ನು ಪೋಷಕರಿಗೆ ಕಟ್ಟಿಕೊಡಬಲ್ಲದು.
ಸಂಕಲನದಲ್ಲಿ 38 ಕಥೆಗಳಿವೆ. ಅವುಗಳಲ್ಲಿ ಮೂರು ಪೌರಾಣಿಕ, ಒಂದು ದೊರೆಸ್ವಾಮಿಯವರ ಸ್ವಂತ ರಚನೆ, ಉಳಿದವು ಜಾನಪದ ಕಥೆಗಳು. ಸಂಪಾದಕರು ಕಥೆಗಳನ್ನು ಸಂಗ್ರಹಿಸಿ ಕೊಡುವುದಷ್ಟಕ್ಕೇ ತಮ್ಮನ್ನು ಸೀಮಿತಗೊಳಿಸಿಕೊಂಡಿಲ್ಲ. ಅದೇ ಥರದ ಕಥೆಗಳು ಬೇರೆ ಯಾವ ದೇಶದ ಕಥೆಗಳನ್ನು ಹೋಲುತ್ತವೆ ಎನ್ನುವ ಟಿಪ್ಪಣಿ ನೀಡಿದ್ದಾರೆ. ಜಾನಪದ ಕಥೆಗಳ ಕೊನೆಯಲ್ಲಿ, ಗ್ರಾಮೀಣ ಪದಗಳ ಅರ್ಥ ಕೊಟ್ಟಿದ್ದಾರೆ. ಕಥೆಯ ನೀತಿಯನ್ನೂ ಹೇಳಿದ್ದಾರೆ. ಈ ಹಿನ್ನೆಲೆಯಿಂದಲೂ ಇದು ಉತ್ತಮ ಸಂಕಲನ ಎನ್ನಲು ಅಡ್ಡಿ ಇಲ್ಲ. ಕಥೆಗೆ ಪೂರಕ ಚಿತ್ರಗಳಿವೆ.
ಮೈಸೂರಿನ ಕಾವ್ಯಾಲಯ ಪ್ರಕಾಶನ (ಕಾವ್ಯಾಲಯ ಪಬ್ಲಿಶರ್ಸ್, ಜಯನಗರ, ಮೈಸೂರು- 570014) ಇದನ್ನು ಪ್ರಕಟಿಸಿದೆ. ಪುಟ 114. ಬೆಲೆ 90 ರುಪಾಯಿ.