ನವದೆಹಲಿ: ಮುಂದಿನ ಬಾರಿ ನೀವು ದೆಹಲಿ ಮೆಟ್ರೋದಲ್ಲಿ ಸಂಚರಿಸುವಾಗ ಸಂಶಯಾತ್ಮಕ ಮಹಿಳೆ ಕಂಡು ಬಂದರೆ ಎಚ್ಚರದಿಂದಿರಿ. ಏಕೆಂದರೆ ಅಧಿಕೃತ ದಾಖಲೆಗಳು ಹೇಳುವಂತೆ ಪಿಕ್ ಪಾಕೆಟ್ ಮಾಡುವವರಲ್ಲಿ ಮಹಿಳೆಯರ ಕೈವಾಡವೇ ಸಿಂಹಪಾಲು. ಅದು ಶೇ ೯೪.
ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ (ಸಿ ಐ ಎಸ್ ಎಫ್) ಸಂಗ್ರಹಿಸಿ ಬಿಡುಗಡೆ ಮಾಡಿರುವ ಮಾಹಿತಿ ಪ್ರಕಾರ ದೆಹಲಿ-ಎನ್ ಸಿ ಆರ್ ಪ್ರದೇಶದ ಮೆಟ್ರೊ ಸಂಚಾರದಲ್ಲಿ ನಡೆದಿರುವ ಜೇಬುಕಳ್ಳತನದಲ್ಲಿ ೨೯೩ ಮಹಿಳೆಯರು ಹಾಗೂ ೨೨ ಪುರುಷರು ಭಾಗಿಯಾಗಿದ್ದಾರೆ. ದೆಹಲಿ ಮೆಟ್ರೊ ಸಂಚಾರದ ೧೩೪ ನಿಲ್ದಾಣಗಳಲ್ಲಿ ಭದ್ರತೆಯನ್ನು ಒದಗಿಸುವ ಸಂಸ್ಥೆ ಸಿ ಎಸ್ ಐ ಎಫ್ ಅಧಿಕಾರಿಗಳು ಈ ಎಲ್ಲ ಜೇಬುಗಳ್ಳರನ್ನು ಪೊಲೀಸರಿಗೆ ಒಪ್ಪಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಹೋದ ವರ್ಷ ಕೂಡ ೪೬೬ ಪಿಕ್ ಪಾಕೆಟ್ ಪ್ರಕರಣಗಳಲ್ಲಿ, ೪೨೧ ಪ್ರಕರಣಗಳಲ್ಲಿ ಸಿಕ್ಕಿಬಿದ್ದದ್ದು ಮಹಿಳೆಯರೇ ಎಂದು ತಿಳಿಸಿದೆ.
ಈ ವರ್ಷ ಸಿ ಐ ಎಸ್ ಅಫ್ ಭದ್ರತಾ ಸಿಬ್ಬಂದಿ ೨೯.೫೬ ಲಕ್ಷ ನಗದು, ೯ ಕೋಟಿಗೂ ಹೆಚ್ಚು ಮೌಲ್ಯದ ಚೆಕ್ಕುಗಳು/ಡ್ರಾಫ್ಟ್ ಗಳು, ೮೬,೬೮೩ ರೂ ವಿದೇಶಿ ನಗದು ಮತ್ತು ೧೬ ಲಕ್ಷ ಮೌಲ್ಯದ ಚಿನ್ನಾಭರಣ ವಶಪಡಿಸಿಕೊಂಡಿದೆ. ಭದ್ರತಾ ತಪಾಸಣೆ ವೇಳೆ ಅಥವಾ ನಿಲ್ದಾಣಗಳಲ್ಲಿ ಪ್ರಯಾಣಿಕರು ಮರೆತು ಬಿಟ್ಟು ಹೋದ ೧೪೪ ಲ್ಯಾಪ್ ಟಾಪ್ ಗಳು, ೪೦ ಕ್ಯಾಮರಾಗಳು, ೧೧೫ ವಾಚುಗಳು, ೪೪೭ ಮೊಬೈಲ್ ಫೋನ್ ಗಳನ್ನು ಕೂಡ ವಶಪಡಿಸಿಕೊಂಡಿದ್ದು ತನಿಖೆಯ ನಂತರ ಇವುಗಳ ಮೂಲ ಹಕ್ಕುದಾರರಿಗೆ ಹಿಂದಿರುಗಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.