ಬೆಂಗಳೂರು; ನನ್ನ ದುಬಾರಿ ವಾಚ್ ಕುರಿತಂತೆ ಮಾತನಾಡುತ್ತಿರುವ ಜೆಡಿಎಸ್ ನಾಯಕ ಹೆಚ್.ಡಿ. ಕುಮಾರಸ್ವಾಮಿ ಅವರಿಗೆ ಮಾಡಲು ಕೆಲಸವಿಲ್ಲ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಮಂಗಳವಾರ ಹೇಳಿದ್ದಾರೆ. 

ಈ ಕುರಿತಂತೆ ಹನೂರು ಪಟ್ಟಣದಲ್ಲಿ ಮಾತನಾಡಿರುವ ಅವರು, ದುಬಾರಿ ವಾಚ್ ಕುರಿತಂತೆ ತಮ್ಮ ಬಳಿ ದಾಖಲೆಗಳಿದೆ ಎಂದು ಹೇಳುತ್ತಿರುವ ಕುಮಾರಸ್ವಾಮಿ ಅವರು ಯಾವುದೇ ದಾಖಲೆಗಳನ್ನು ಬಿಡುಗಡೆ ಮಾಡಲ್ಲ. ಅವರಿಗೆ ಮಾಡಲು ಕೆಲಸವಿಲ್ಲ. ಹೀಗಾಗಿ ಈ ರೀತಿಯ ಹೇಳಿಕೆಗಳನ್ನು ನೀಡುತ್ತಿದ್ದಾರೆ ಎಂದು ಹೇಳಿದ್ದಾರೆ. 

ಹ್ಯೂಬ್ಲೋಟ್ ಕಂಪನಿಯ ಗಡಿಯಾರ ಜಗತ್ತಿನ ದುಬಾರಿ ಕೈಗಡಿಯಾರಗಳಲ್ಲಿ ಒಂದಾಗಿದ್ದು, ಇದು ಸ್ವಿಜರ್ಲೆಂಡ್ ಗೆ ಸೇರಿದ ಕಂಪನಿಯಾಗಿದೆ. ಇದೀಗ ಈ ಗಡಿಯಾರ ಮುಖ್ಯಮಂತ್ರಿ ಸಿದ್ದರಾಮಯ್ಯ ಬಳಿ ಎಂದು ಹೇಳಲಾಗುತ್ತಿದ್ದು, ಗಡಿಯಾರವು 301 ಎಂಪಿ, 1780. ಆರ್ ಎಕ್ಸ್ ಮಾದರಿಯ ಕೈಗಡಿಯಾರದ ಮೇಲ್ಭಾಗದ ವಿನ್ಯಾ 18 ಕ್ಯಾರಟ್ ಬಂಗಾರದ್ದಾಗಿದೆ. ಇನ್ನು ಗಡಿಯಾರದ ಮುಳ್ಳು ಹಾಗೂ ಒಳಾಂಗಣ ವಜ್ರದ ಹರಳುಗಳನ್ನು ಹೊಂದಿದೆ. ಇದರಂತೆ ಗಡಿಯಾರದ ಬೆಲ್ಟ್ ಕೂಡ ವಜ್ರದ ಹರಳುಗಳನ್ನು ಕೂರಿಸಿ ವಿಶೇಷವಾಗಿ ವಿನ್ಯಾಸವನ್ನು ಮಾಡಲಾಗಿದೆ. ಒಟ್ಟಾರೆಯಾಗಿ ಸಿದ್ದರಾಮಯ್ಯ ಅವರು ತೊಡುವ ಗಡಿಯಾರದ ಮೌಲ್ಯ ಬರೋಬ್ಬರಿ 21,888 ಅಮೆರಿಕನ್ ಡಾಲರ್ ಗಳು ಎಂದು ಹೇಳಲಾಗುತ್ತಿದೆ.