ಲಖನೌ: ನಗದು ಪಡೆಯಲು ಬ್ಯಾಂಕ್ ಮತ್ತು ಎಟಿಎಂಗಳ ಎದುರು ಸರತಿ ಸಾಲು ಹನುಮಂತನ ಬಾಲದಂತೆ ಬೆಳೆಯುತ್ತಿದ್ದು, ಉತ್ತರಪ್ರದೇಶದ ಬಹುತೇಕ ಪ್ರದೇಶಗಳಲ್ಲಿ ಜನರು ಧೃತಿಗೆಟ್ಟು ಹಿಂಸೆ ಮತ್ತು ಆಸ್ತಿಪಾಸ್ತಿಗಳ ಧ್ವಂಸಕ್ಕೆ ಮುಂದಾಗಿರುವುದರಿಂದ ಆಡಳಿತಕ್ಕೆ ತಲೆನೋವಾಗಿ ಪರಿಣಮಿಸಿದೆ. 

ಕಳೆದ ೨೪ ಘಂಟೆಗಳಲ್ಲಿ, ಬ್ಯಾಂಕ್ ಅಧಿಕಾರಿಗಳ ಮತ್ತು ಪೊಲೀಸರ ವಿರುದ್ಧದ ೧೨ ಕ್ಕೂ ಹೆಚ್ಚು ಸಣ್ಣ ಮತ್ತು ದೊಡ್ಡ ಘಟನೆಗಳು ವರದಿಯಾಗಿವೆ. 

ಬಹರೈಚ್ ನ ಅಲ್ಲಹಾಬಾದ್ ಬ್ಯಾಂಕ್ ಘಟಕದ ಮುಂದೆ ಆಕ್ರೋಶಗೊಂಡಿದ್ದ ಗುಂಪನ್ನು ಲಾಠಿಚಾರ್ಜ್ ಮಾಡುವ ಮೂಲಕ ಚದುರಿಸಲಾಗಿದ್ದು ಕೆಲವರಿಗೆ ಗಾಯಗಳಾಗಿವೆ ಎಂದು ಪೊಲೀಸ್ ಅಧಿಕಾರಿಗಳು ಹೇಳಿದ್ದಾರೆ. 

ಹಾಗೆಯೇ ಆಗ್ರಾ ಸಮೀಪದ ಹಲವು ಸಣ್ಣ ನಗರಗಳಲ್ಲಿ ಬ್ಯಾಂಕ್ ಮತ್ತು ಎಟಿಎಂಗಳಿಂದ ಜನರನ್ನು ಚದುರಿಸಲು ಪೊಲೀಸರು ಲಾಠಿ ಚಾರ್ಜ್ ಮಾಡಿದ್ದಾರೆ. 

ಹಾಪುರ್ ನ ದೇನ ಬ್ಯಾಂಕ್ ನಲ್ಲಿ ಜನರು ಪರಸ್ಪರ ಹೊಡೆದಾಡಿಕೊಂಡಿದ್ದಲ್ಲದೆ ಮಹಿಳೆಯರನ್ನು ತಳ್ಳಾಡಿದ ಘಟನೆ ನಡೆದಿದೆ. ಪ್ರಧಾನ ಮಂತ್ರಿ ಅವರ ಲೋಕಸಭಾ ಕ್ಷೇತ್ರವಾದ ವಾರಣಾಸಿಯ ಎಸ್ ಬಿ ಐ ಬ್ಯಾಂಕ್ ಎದುರು ಖಾತಾದಾರರು ಗಲಭೆ ಎಬ್ಬಿಸಿದ್ದರಿಂದ ಬ್ಯಾಂಕ್ ಮುಚ್ಚಬೇಕಾದ ಪರಿಸ್ಥಿತಿ ಬಂದಿದೆ. 

ಕೇಂದ್ರ ಸರ್ಕಾರದ ನೋಟು ಹಿಂಪಡೆತ ನಿರ್ಧಾರದಿಂದ ಈ ಘಟನೆಗಳು ಹೆಚ್ಚಿವೆ ಎಂದು ತಿಳಿಸಿರುವ ಹಿರಿಯ ಪೊಲೀಸ್ ಅಧಿಕಾರಿ, ಹೆಚ್ಚಿನ ಪೊಲೀಸರನ್ನು ಬ್ಯಾಂಕ್ ಮತ್ತು ಎಟಿಎಂಗಳಲ್ಲಿ ನಿಯೋಜಿಸುವುದಾಗಿ ಹೇಳಿದ್ದಾರೆ.