ನವದೆಹಲಿ: 500 ಮತ್ತು 1000 ರು. ಮುಖಬೆಲೆಯ ನೋಟುಗಳನ್ನು ನಿಷೇಧಿಸಿ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿದ್ದು, ಹಳೆಯ ನೋಟುಗಳನ್ನು ಬ್ಯಾಂಕುಗಳಲ್ಲಿ ಜಮಾ ಮಾಡಲು ಡಿಸೆಂಬರ್ 30 ಕೊನೆಯ ದಿನಾಂಕವಾಗಿದೆ. ಈ  ದಿನಾಂಕವನ್ನು ಯಾವುದೇ ಕಾರಣಕ್ಕೂ ವಿಸ್ತರಣೆ ಮಾಡುವುದಿಲ್ಲ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ಮಂಗಳವಾರ ಸ್ಪಷ್ಟಪಡಿಸಿದೆ.

ಇನ್ನು ಕಪ್ಪುಹಣ ಹೊಂದಿರುವ ಕಾಳಧನಿಕರಿಗೂ ಕೇಂದ್ರ ಸರ್ಕಾರ ಡೆಡ್ ಲೈನ್ ನೀಡಿದ್ದು, ಶೇ.50ರಷ್ಟು ತೆರಿಗೆಯೊಂದಿಗೆ ಕಪ್ಪುಹಣವನ್ನು ಬಿಳಿಯಾಗಿಸಿಕೊಳ್ಳಬಹುದು. ಡೆಡ್ ಲೈನ್ ಮುಗಿದ ಬಳಿಕವೂ ಕಪ್ಪುಹಣ ಘೋಷಣೆ ಮಾಡವ  ಕಾಳಧಿನಕರಿಗೆ ಶೇ.85ರಷ್ಟು ತೆರಿಗೆ ವಿಧಿಸಲಾಗುತ್ತದೆ ಎಂದು ಕೇಂದ್ರ ಸರ್ಕಾರ ಸ್ಪಷ್ಟಪಡಿಸಿದೆ. ಈ ಬಗ್ಗೆ ಈಗಾಗಲೇ ಕೇಂದ್ರ ತೆರಿಗೆ ಕಾರ್ಯಪ್ರವತ್ತವಾಗಿದ್ದು, 2.5ಲಕ್ಷಕ್ಕೂ ಅಧಿಕ ಹಣ ಠೇವಣಿ ಇರುವ ಖಾತೆಗಳ ಮೇಲೆ ನಿಗಾ  ಇರಿಸಿದೆ. ಅಲ್ಲದೆ ಶಂಕಾಸ್ಪದ ವಹಿವಾಟು ಕಂಡುಬಂದರೆ ಕೂಡ ವಿವರ ಕೋರಿ ನೋಟಿಸ್ ಜಾರಿ ಮಾಡಲು ನಿರ್ಧರಿಸಿದೆ.

ಹೊಸ ತೆರಿಗೆ ಕಾಯ್ದೆ ಜಾರಿಗೆ ಸಂವಿಧಾನದ ತೊಡಕು
ಇನ್ನು ಕೇಂದ್ರ ಸರ್ಕಾರದ ಉದ್ದೇಶಿತ ನೂತನ ತೆರಿಗೆ ಕಾಯ್ದೆ ಜಾರಿಗೆ ಸಂವಿಧಾನದ ತೊಡಕು ಎದುರಾಗಿದ್ದು, ಕೇಂದ್ರ ಸರ್ಕಾರ ತೆರಿಗೆ ಕಾಯ್ದೆಗೆ ತಿದ್ದುಪಡಿ ತಂದು ಅದರ ಮೂಲಕ ನೂತನ ಕಾನೂನು ಅಳವಡಿಸಿ ಬಳಿಕ ಸಂಸತ್ತಿನ  ಉಭಯ ಸದನಗಳ ಅನುಮೋದನೆ ಪಡೆಯಬೇಕು. ಆಗಷ್ಟೇ ಕಾಯ್ದೆ ಪರಿಣಾಮಕಾರಿಯಾಗಿ ಜಾರಿಯಾಗುತ್ತದೆ. ಆದರೆ ನೋಟು ನಿಷೇಧವನ್ನು ವಿರೋಧಿಸಿ ಉಭಯ ಕಲಾಪಗಳಲ್ಲಿ ಕೋಲಾಹಲ ಎಬ್ಬಿಸುತ್ತಿರುವ ವಿಪಕ್ಷ ಸದಸ್ಯರ  ನಡುವೆ ಸರ್ಕಾರದ ನೂತನ ಕಾಯ್ದೆಗೆ ಅನುಮೋದನೆ ದೊರೆಯುವುದೇ ಎಂಬ ಅನುಮಾನ ಕಾಡತೊಡಗಿದೆ. ಪ್ರಮುಖವಾಗಿ ಯಾವುದೇ ನೂತನ ಕಾಯ್ದೆ ಜಾರಿಯಲ್ಲಿ ನಿರ್ಣಾಯ ಪಾತ್ರ ನಿರ್ವಹಿಸುವ ರಾಜ್ಯಸಭೆಯಲ್ಲಿ ಕೇಂದ್ರ  ಸರ್ಕಾರ ಅಥವಾ ಎನ್ ಡಿಎ ಸರ್ಕಾರದ ಸದಸ್ಯ ಬಲ ಕಡಿಮೆ ಇದ್ದು, ರಾಜ್ಯಸಭೆಯಲ್ಲಿ ಸರ್ಕಾರದ ನಿರ್ಣಯಕ್ಕೆ ಅನುಮೋದನೆ ಸಿಗುವುದು ಕಷ್ಟಸಾಧ್ಯ.

ಹೀಗಾಗಿ ರಾಜ್ಯಸಭೆಯಲ್ಲಿ ಅಲ್ಪ ಸಂಖ್ಯಾತವಾಗಿರುವ ಕೇಂದ್ರ ಸರ್ಕಾರ ಹೊಸ  ತೆರಿಗೆ ಕಾಯ್ದೆಗೆ ಹೇಗೆ ಅನುಮೋದನೆ ಪಡೆಯುತ್ತದೆ ಎಂಬುದು ಕುತೂಹಲದ ಪ್ರಶ್ನೆಯಾಗಿದೆ. ಇನ್ನು ನೂತನ ತೆರಿಗೆ ಕಾಯ್ದೆ ಜಾರಿ ವಿಳಂಬವಾದಷ್ಟೂ ಕಾಳಧನಿಕರು ತಮ್ಮಲ್ಲಿರುವ ಕಪ್ಪುಹಣವನ್ನು ಬಿಳಿಯಾಗಿಸಿಕೊಳ್ಳಲು ವಿವಿಧ  ವಾಮಮಾರ್ಗಗಳನ್ನು ಕಂಡುಕೊಂಡಿರುತ್ತಾರೆ. ಹೀಗಾಗಿ ಸರ್ಕಾರದ ಈ ಪ್ರಯತ್ನ ಕೂಡ ನೀರಲ್ಲಿ ಹೋಮ ಮಾಡಿದಂತೆ ಆಗುತ್ತದೆ ಎಂದು ತಜ್ಞರು ಶಂಕೆ ವ್ಯಕ್ತಪಡಿಸಿದ್ದಾರೆ.