ಮಾಸ್ಕೋ: ರಷ್ಯಾದಿಂದ ಈಗಾಗಲೇ ಒಂದು ಜಲಾಂತರ್ಗಾಮಿ ನೌಕೆಯನ್ನು ಪಡೆದಿರುವ ಭಾರತ ಇದೀಗ ಮತ್ತೊಂದು ಅಣ್ವಸ್ತ್ರ ಸಾಮರ್ಥ್ಯದ ಜಲಾಂತರ್ಗಾಮಿ ನೌಕೆ  ಒಪ್ಪಂದಕ್ಕೆ ಸಹಿಹಾಕಿದೆ.

ತೀರಾ ಗೌಪ್ಯವಾಗಿ ನಡೆದಿದ್ದ ಈ ಒಪ್ಪಂದ ಸಹಿ ಪ್ರಕ್ರಿಯೆ ಗೋವಾದಲ್ಲೇ ನಡೆದಿದ್ದು, ಈ ವರೆಗೂ ಈ ವಿಚಾರ ಎಲ್ಲಿಯೂ ಬಹಿರಂಗವಾಗಿರಲಿಲ್ಲ. ಇದೀಗ ರಷ್ಯಾ ಈ ಬಗ್ಗೆ ಮಾಹಿತಿ ನೀಡಿದ್ದು,  ರಷ್ಯಾದ ಖ್ಯಾತ ಪತ್ರಿಕೆ ವೆಡೋಮೊಸ್ಟಿ ಈ ಬಗ್ಗೆ ವರದಿ ಮಾಡಿದೆ. ಈ ಹಿಂದೆ ಬ್ರಿಕ್ಸ್ ಶೃಂಗಸಭೆ ನಿಮಿತ್ತ ಭಾರತಕ್ಕೆ ಆಗಮಿಸಿದ್ದ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು ಗೋವಾಕ್ಕೆ ತೆರಳಿದ್ದ  ವೇಳೆ ಉಭಯ ದೇಶಗಳು ಈ ಮಹತ್ವದ ಒಪ್ಪಂದಕ್ಕೆ ಸಹಿ ಹಾಕಿವೆ ಎಂದು ವರದಿಯಲ್ಲಿ ತಿಳಿಸಿದೆ.

ಮೂಲಗಳ ಪ್ರಕಾರ ಅಕುಲಾ-2 ಜಲಾಂತರ್ಗಾಮಿ ನೌಕೆಯನ್ನು ಭಾರತ ಖರೀದಿಸಿದ್ದು, ಇದೇ ಸರಣಿಯ ಮೊದಲನೇ ಜಲಾಂತರ್ಗಾಮಿ ನೌಕೆಯನ್ನು 2011ರಲ್ಲೇ ಭಾರತ ಲೀಸ್ ಗೆ ಪಡೆದಿತ್ತು.  ಇದೀಗ ಅಕುಲಾ-2 ಜಲಾಂತರ್ಗಾಮಿ ನೌಕೆ ಸೇರ್ಪಡೆಯೊಂದಿಗೆ ರಷ್ಯಾದಿಂದ ಭಾರತ 2ನೇ ಜಲಾಂತರ್ಗಾಮಿ ನೌಕೆ ಪಡೆದಂತಾಗಿದೆ. 2011ರಲ್ಲಿ ಭಾರತ ಲೀಸ್ ಗೆ ಪಡೆದಿದ್ದ ಅಕುಲಾ  ಜಲಾಂತರ್ಗಾಮಿಯ ಸೇವಾ ಅವಧಿ 10 ವರ್ಷಗಳಾಗಿದ್ದು, ಕೆಲವೇ ವರ್ಷಗಳಲ್ಲಿ ಅದರ ಸೇವೆ ಮುಕ್ತಾಯಗೊಳ್ಳಲಿದೆ. ಹೀಗಾಗಿ ಇದಕ್ಕೆ ಪರ್ಯಾಯವಾಗಿ ಭಾರತ ಮತ್ತೊಂದು ಜಲಾಂತರ್ಗಾಮಿ  ನೌಕೆಯನ್ನು ಲೀಸ್ ಗೆ ಪಡೆದಿದೆ.