ನವದೆಹಲಿ: ನಾಳೆ ನಮ್ಮ ಸಂಸದರಿಗಾಗಿ ಸಂಸತ್ ಭವನದಲ್ಲಿ ಬಾಲಿವುಡ್ ಸೂಪರ್ ಸ್ಟಾರ್ ಆಮಿರ್ ಖಾನ್ ಅಭಿನಯದ ದಂಗಲ್ ಚಿತ್ರದ ವಿಶೇಷ ಪ್ರದರ್ಶನ ಏರ್ಪಡಿಸಲಾಗಿದೆ. ಈ ಮೂಲಕ ಸ್ವಲ್ಪ ಮನೋರಂಜನೆಯ ಜೊತೆಗೆ ಮಹಿಳಾ ಸಬಲೀಕರಣದ ಸಂದೇಶ ರವಾನಿಸಲಾಗುತ್ತಿದೆ.

ಲೋಕಸಭೆ ಸ್ಪೀಕರ್ ಸುಮಿತ್ರಾ ಮಹಾಜನ್ ಅವರ ನೇತೃತ್ವದಲ್ಲಿ ದಂಗಲ್ ಚಿತ್ರ ಪ್ರದರ್ಶನ ನಡೆಯುತ್ತಿದ್ದು, ನಾಳೆ ಕಲಾಪ ಮುಕ್ತಾಯಗೊಂಡ ನಂತರ ಸಂಜೆ ಸಂಸತ್ ನ ಬಾಲಯೋಗಿ ಆಡಿಟೋರಿಯಂನಲ್ಲಿ ಸಿನಿಮಾ ಪ್ರದರ್ಶನಗೊಳ್ಳಲಿದೆ.

ಮಾರ್ಚ್ 23ರಂದು ಸಂಜೆ 6.30ಕ್ಕೆ ಸಂಸತ್ ನ ಎರಡು ಸದನಗಳ ಸದಸ್ಯರಿಗಾಗಿ ಸ್ಪೀಕರ್ ಸುಮಿತ್ರಾ ಮಹಾಜನ್ ಅವರು ಹಿಂದಿ ಜನಪ್ರಿಯ ಚಿತ್ರ ದಂಗಲ್ ಪ್ರದರ್ಶನ ಆಯೋಜಿಸಿದ್ದು, ಕುಟುಂಬ ಸಮೇತ ಆಗಮಿಸಬೇಕಾಗಿ ಲೋಕಸಭೆ ಕಾರ್ಯದರ್ಶಿ ಅನೂಪ್ ಮಿಶ್ರಾ ಅವರು ಸಂಸದರಿಗೆ ಮನವಿ ಮಾಡಿದ್ದಾರೆ.

ಲೋಕಸಭೆ ಸಚಿವಾಲಯದ ಕಲ್ಯಾಣ ಇಲಾಖೆ ಆ ಕಾರ್ಯಕ್ರಮ ಆಯೋಜಿಸಿದೆ.