ಯಾವುದೋ ಲಕ್ಷುರಿ ಹೋಟೆಲ್ಲಿನಲ್ಲೋ, ಸಿನಿಮಾಗಳಲ್ಲೋ ನೋಡಿದ ಸ್ವಿಮ್ಮಿಂಗ್ ಪೂಲ್ ನಿಮ್ಮ ಮನೆಯಂಗಳಕ್ಕೆ ಬಂದರೆ ಹೇಗೆ? ಸ್ವರ್ಗಕ್ಕೆ ಒಂದೇ ಗೇಣೇನು, ಮನೆ ಆಗ ಸ್ವರ್ಗ. ಈ ಸೆಖೆಗೆ ಸಮಾಧಾನ ಹೇಳಲು ಒಂದು ಪುಟ್ಟ ಸ್ನಾನ, ಕಚಗುಳಿಯ ನೀರಿನಾಟ... ಇವೆಲ್ಲದರಲ್ಲೂ ಸುಖ ಇಣುಕುತ್ತಲೇ ಇರುತ್ತದೆ. ಮನಸ್ಸು ಹಿಂದೆಂದಿಗಿಂತ ತಾಜಾಗೊಳ್ಳುತ್ತಲೇ ಇರುತ್ತದೆ.

ಈ ಏಪ್ರಿಲ್ ತಿಂಗಳಲ್ಲಿ ಸೆಖೆಯನ್ನು ಓದ್ದೋಡಿಸಲು ಸ್ವಿಮ್ಮಿಂಗ್‍ಪೂಲನ್ನು ನಿರ್ಮಿಸುವ ನಿರ್ಧಾರ ಮಾಡಿ. ಅದೇನು ಅಂಥ ಕಷ್ಟದ ಮಾತೇನಲ್ಲ. ಹಾಗೂ ಸುಲಭದಲ್ಲಿ ದುಡ್ಡು ಸುರಿದು ಸ್ವಿಮ್ಮಿಂಗ್ ಪೂಲೇನೋ ನಿರ್ಮಿಸಬಹುದು. ಆದರೆ, ಅದನ್ನು ಮೆಂಟೇನ್ ಮಾಡುವುದೇ ತುಸು ತಲೆನೋವಾಗಬಹುದು. ಆ ಕೆಲಸವೂ ದೊಡ್ಡದಲ್ಲ ಬಿಡಿ.

ಸ್ವಿಮ್ಮಿಂಗ್ ಪೂಲನ್ನು ಮೆಂಟೇನ್ ಮಾಡಲು ನಿಮ್ಮ ಅಮೂಲ್ಯ ಸಮಯವನ್ನು ಸ್ವಲ್ಪ ಹೆಚ್ಚೇ ವಿನಿಯೋಗಿಸಬೇಕು. ಇಲ್ಲದಿದ್ದಲ್ಲಿ ದಾರಿಬದಿಯ ಎಮ್ಮೆಹೊಂಡಕ್ಕೂ, ಸ್ವಿಮ್ಮಿಂಗ್ ಪೂಲ್‍ಗೂ ವ್ಯತ್ಯಾಸವಿಲ್ಲದಂತೆ ಆಗಿಬಿಡುತ್ತದೆ. ಪಾಚಿ ಬೆಳೆಯದೆ, ಸ್ವಚ್ಛ ಶುದ್ಧ ನೀರು ಪೂಲ್ ನಲ್ಲಿರಬೇಕೆಂದರೆ ಇವಿಷ್ಟು ಅಂಶಗಳನ್ನು ಗಮನಿಸಲೇಬೇಕು.

* ಪೂಲ್‍ನ ಹಿಡಿತ ಪಂಪ್‍ನಲ್ಲಿರುತ್ತದೆ. ಇದು ಪೂಲ್ ನ ನೀರನ್ನು ಮುಂದೆ ತಳ್ಳಿ ಫಿಲ್ಟರ್ ಮಾಡಿ ತಿರುಗಿ ಬಿಡುತ್ತದೆ. ಇದರಿಂದ ಕಸ, ಕೊಳಕು, ಪಾಚಿ ನಿವಾರಣೆಯಾಗುತ್ತದೆ. ಜೊತೆಗೆ ಪೂಲ್ ಚಾರದಂತೆ ನೋಡಿಕೊಳ್ಳಲು ಸಾಧ್ಯ. ಆದರೆ  ಪಂಪನ್ನು ಎಷ್ಟು ಗಂಟೆಗೊಮ್ಮೆ ಹಾಕಬೇಕು ಎನ್ನುವುದು ನಿಮ್ಮ ಪೂಲ್‍ನ ಗಾತ್ರ, ಪೈಪ್ ನ ಗಾತ್ರ, ಎಷ್ಟು ಜನ ಈಜುತ್ತಾರೆ, ಪಂಪ್ ನ ಗಾತ್ರ ಎಲ್ಲವನ್ನೂ ಅವಲಂಬಿಸಿದೆ. ಹೀಗಾಗಿ ಫೂಲ್ ಪ್ರೋಫೆಶನಲ್ ಗಳ ಬಳಿ ವಿಚಾರಿಸುವುದೊಳಿತು.

* ಪೂಲ್‍ನಲ್ಲಿ ಅಳವಡಿಸಿದ ಫಿಲ್ಟ್ರೇಶನ್ ಸಿಸ್ಟಂ, ಕೂದಲು, ಮಣ್ಣು, ಎಲೆ ಇತ್ಯಾದಿಗಳನ್ನು ಹಿಡಿದಿಟ್ಟುಕೊಳ್ಳುತ್ತದೆ. ಈ ಫಿಲ್ಟರ್ ಅನ್ನು ಆಗಾಗ ಸ್ವಚ್ಛಗೊಳಿಸಬೇಕು. ಫಿಲ್ಟರ್ ಕ್ಲೀನರ್ ನಲ್ಲಿ 12 ಗಂಟೆಗಳ ಕಾಲ ನೆನೆಸಿಡುವುದರಿಂದ ಎಣ್ಣೆ, ಗ್ರೀಸ್ ನಂಥ ಅಂಟೂ ಹೋಗುತ್ತದೆ. ನಂತರ ಅದನ್ನು ಬಿಸಿಲಿನಲ್ಲಿ ಒಣಗಿಸಿ, ಮತ್ತೆ ಸ್ವಸ್ಥಾನಕ್ಕೆ ಅಳವಡಿಸಬೇಕು.

* ಬೇಸಿಗೆಯಲ್ಲಿ ವಾರಕ್ಕೆ 2ರಿಂದ 3 ಬಾರಿ ಪೂಲನ್ನು ಟೆಸ್ಟ್ ಮಾಡಬೇಕು. ಚಳಿಗಾಲದಲ್ಲಾದರೆ ವಾರಕ್ಕೊಮ್ಮೆ ಮಾಡಿದರೆ ಸಾಕು. ಇದಕ್ಕಾಗಿ ಟೆಸ್ಟ್ ಸ್ಟ್ರಿಪ್ ಗಳನ್ನು ನೀರಿನಲ್ಲಿ ಅದ್ದಿ ತೆಗೆದು, ಸ್ಯಾನಿಟೈಸರ್, ಪಿಎಚ್ ಲೆವೆಲ್ ಮತ್ತು ಕ್ಷಾರೀಯ ಮಟ್ಟವನ್ನು ತಿಳಿಯಬೇಕು.