ಬೀಜಿಂಗ್: ಎರಡು ದಿನಗಳ ಹಿಂದೆ ಕುಸಿದ ಚೀನಾದ ಜಿಪ್ಸಮ್ ಗಣಿಯಲ್ಲಿ ರಕ್ಷಣಾ ಕಾರ್ಯ ಮುಂದುವರಿದಿರುವಾಗಲೇ, ಗಣಿಯ ಮಾಲೀಕನು ಬಾವಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡ ಘಟನೆ ನಡೆದಿದೆ.
ಶಾಂಗ್‍ಡಾಂಗ್ ಪ್ರಾಂತ್ಯದ ಪಿಂಗ್ಯಿನಲ್ಲಿದ್ದ ಗಣಿಯಲ್ಲಿ 29 ಮಂದಿ ಕಾರ್ಯ ನಿರತರಾಗಿದ್ದಾಗ, ಗಣಿ ಕುಸಿದುಬಿದ್ದಿತ್ತು. ಈ ವೇಳೆ ಒಬ್ಬ ಕಾರ್ಮಿಕ ಮೃತಪಟ್ಟರೆ, 17 ಮಂದಿ ಅವ ಶೇಷಗಳಡಿ ಸಿಲುಕಿಕೊಂಡಿದ್ದಾರೆ. ಇವರ ರಕ್ಷಣಾ ಕಾರ್ಯ ನಡೆಯುತ್ತಿದೆ.
ಭಾನುವಾರ ಬೆಳಗ್ಗೆ ಅಲ್ಲೇ ಇದ್ದ ಗಣಿಯ ಮಾಲೀಕ, ಯುರಾಂಗ್ ಕಂಪನಿ ಮುಖ್ಯಸ್ಥ ಮಾ ಕಾಂಗ್‍ಬೋ ಏಕಾಏಕಿ ಪಕ್ಕದಲ್ಲೇ ಇದ್ದ ಬಾವಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ದುರಂತ ಹಿನ್ನೆಲೆಯಲ್ಲಿ ಸರ್ಕಾರ ಕ್ರಮಕ್ಕೆ ಆದೇಶಿಸಬಹುದೆಂಬ ಭಯದಿಂದ ಈ ಕೃತ್ಯವೆಸಗಿರಬಹುದು ಎಂದು ಶಂಕಿಸಲಾಗಿದೆ.