ಪ್ಯಾರಿಸ್: ಫ್ರಾನ್ಸ್ ನಲ್ಲಿ ನಡೆದಿರುವ ಭಯೋತ್ಪಾದಕ ದಾಳಿಯ ಬಗ್ಗೆ ಫ್ರಾನ್ಸ್ ನ ಅಧ್ಯಕ್ಷ ಫ್ರಾಂಕೋಯಿಸ್ ಹೊಲಾಂಡ್ ಮೇಯರ್ ಗಳನ್ನುದ್ದೇಶಿಸಿ ಮಾತನಾಡಿದ್ದು, ಇಸ್ಲಾಮಿಕ್ ಸ್ಟೇಟ್ ಇಡೀ ವಿಶ್ವಕ್ಕೆ ಅಪಾಯಕಾರಿ ಎಂದು ಹೇಳಿದ್ದಾರೆ.
ಇಸ್ಲಾಮಿಕ್ ಸ್ಟೇಟ್ ಉಗ್ರರು ಇಡೀ ಫ್ರಾನ್ಸ್ ಮೇಲೆ ದಾಳಿ ನಡೆಸಿದ್ದು, ಐಸೀಸ್ ಉಗ್ರರ ನಿರ್ಮೂಲನೆಗಾಗಿ ಜಾಗತಿಕ ಒಕ್ಕೂಟಕ್ಕೆ ಹೋಲಾಂಡ್ ಕರೆ ನೀಡಿದ್ದಾರೆ. ಭಯೋತ್ಪಾದಕ ದಾಳಿ ಬಗ್ಗೆ ಫ್ರಾನ್ಸ್ ನ ರಾಯಭಾರಿ ಭಾರತಕ್ಕೆ ಮಾಹಿತಿ ನೀಡಿದ್ದು ಪ್ಯಾರಿಸ್ ದಾಳಿಯ ರುವಾರಿ ಅಬ್ದೆಲ್ ಹಮೀದ್ ಅಬೌದ್ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆಂದು ಶಂಕಿಸಲಾಗಿದೆ ಎಂದು ತಿಳಿಸಿದ್ದಾರೆ.
ದಾಳಿಯಲ್ಲಿ ಮೃತಪಟ್ಟ 129 ಜನರ ಗುರುತು ಸಿಕ್ಕಿದ್ದು, 12 ಜನರ ಸ್ಥಿತಿ ಗಂಭೀರವಾಗಿದೆ ಎಂದು ಫ್ರೆಂಚ್ ಸಚಿವ ಸಂಪುಟ ಮಾಹಿತಿ ನೀಡಿದೆ. ಸೈಂಟ್-ಡೆನಿಸ್ ನಲ್ಲಿ ನಡೆದ ಪೊಲೀಸ್ ದಾಳಿಯಲ್ಲಿ ಒಟ್ಟು 7  ಜನರನ್ನು ಬಂಧಿಸಲಾಗಿದ್ದು, ಆತ್ಮಹತ್ಯೆ ಮಾಡಿಕೊಂಡಿರುವ ಉಗ್ರರ ಪೈಕಿ ಓರ್ವ ಮಹಿಳಾ ಆತ್ಮಹತ್ಯಾ ಬಾಂಬರ್ ಕೂಡಾ ಸೇರಿದ್ದಾಳೆ ಎಂದು ಫ್ರೆಂಚ್ ಸರ್ಕಾರ ತಿಳಿಸಿದೆ.