ನ್ಯೂಯಾರ್ಕ್: ಶಿಕಾಗೋದಲ್ಲಿ ನಡೆದ ಈ ದ್ವೇಷಪೂರಿತ ಹಿಂಸೆಯಲ್ಲಿ ಹಿರಿಯ ಸಿಕ್ ನಾಗರಿಕನನ್ನು 'ಭಯೋತ್ಪಾದಕ' ಮತ್ತು 'ಬಿನ್ ಲ್ಯಾಡೆನ್' ಎಂದು ಕರೆದು ಅವರ ಮೇಲೆ ತೀವ್ರ ಹಲ್ಲೆ ನಡೆಸಿರುವ ಘಟನೆ ನಡೆದಿದೆ. ಇದು ಸೆಪ್ಟಂಬರ್ ೧೧ರ ದಾಳಿಯ ವಾರ್ಷಿಕ ದಿನದ ಕೆಲವೇ ದಿನಗಳ ಮುಂಚೆ ಈ ಘಟನೆ ನಡೆದಿದೆ.
ಮಂಗಳವಾರ ಇಂದ್ರಜಿತ್ ಸಿಂಗ್ ಮಕ್ಕರ್ ಅವರ ಕಾರಿನ ಬಳಿ ತೆರಳಿದ ಕಿಡಿಗೇಡಿ, 'ಭಯೋತ್ಪಾದಕ, ನಿನ್ನ ದೇಶಕ್ಕೆ ಹಿಂದಿರುಗು, ಬಿನ್ ಲ್ಯಾಡೆನ್' ಎಂದು ಕರೆದಿರುವುದಲ್ಲದೆ, ಜನಾಂಗೀಯ ನಿಂದನೆ ಮಾಡಿ ಹಲ್ಲೆ ನಡೆಸಿದ್ದಾನೆ.
ದಿನಸಿ ಅಂಗಡಿಗೆ ಕಾರಿನಲ್ಲಿ ತೆರಳುತ್ತಿದ್ದರು ಇಬ್ಬರು ಮಕ್ಕಳ ತಂದೆ ಮಕ್ಕರ್ ಅವರಿಗೆ ಮತ್ತೊಂದು ಕಾರಿನಲ್ಲಿ ಚಲಿಸುತ್ತಿದ್ದ ಚಾಲಕ ನಿರಂತರವಾಗಿ ಅಡ್ಡಿಪಡಿಸುತ್ತಿದ್ದಾಗ, ತನ್ನ ಕಾರನ್ನು ಪಕ್ಕಕ್ಕೆ ನಿಲ್ಲಿಸಿದ್ದಾರೆ. ಆಗ ಕಿಡಿಗೇಡಿ ಚಾಲಕ ಮಕ್ಕರ್ ಅವರ ವಾಹನದ ಬಳಿ ಬಂದು ಮುಖಕ್ಕೆ ತೀವ್ರವಾಗಿ ಗುದ್ದಿದ್ದಾನೆ. ತೀವ್ರ ರಕ್ತಸ್ರಾವದಿಂದ ಮಕ್ಕರ್ ಪ್ರಜ್ಞೆ ಕಳೆದುಕೊಂಡಿದ್ದಾರೆ.
ನಂತರ ಮಕ್ಕರ್ ಅವರನ್ನು ಹತ್ತಿರದ ಆಸ್ಪತ್ರೆಗೆ ಸೇರಿಸಿದ್ದು, ಚಿಕಿತ್ಸೆ ನೀಡಲಾಗಿದೆ. ಈಗ ಶಂಕಿತನ್ನು ಬಂಧಿಸಲಾಗಿದ್ದು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
"ಅಧಿಕಾರಿಗಳಿಗೆ ಧನ್ಯವಾದಗಳು. ಯಾವ ಅಮೇರಿಕನ್ನನೂ ತನ್ನ ಧರ್ಮವನ್ನು ಪಾಲಿಸುವುದರಿಂದ ಹಿಂಜರಿಯಬಾರದು" ಎಂದು ಮಕ್ಕರ್ ಹೇಳಿದ್ದಾರೆ.
ಈ ಘಟನೆ ಸಿಖ್ ಸಂಘಟನೆಗಳನ್ನು ಬೆಚ್ಚಿ ಬೀಳಿಸಿದೆ. ಸಿಖ್ ಧರ್ಮೀಯರ ವಿರುದ್ಧ ಅಮೆರಿಕಾದಲ್ಲಿ ಈ ರೀತಿಯ ಜನಾಂಗೀಯ ಹಲ್ಲೆಗಳು ಹೆಚ್ಚಿರಿವುದು ಅಲ್ಲಿನ ಸಮುದಾಯದಲ್ಲಿ ಆತಂಕ ಮೂಡಿಸಿದೆ.