ಬೀಜಿಂಗ್:ಇತ್ತೀಚಿಗೆಗಷ್ಟೇ ನಡೆದ ಭಾರತ-ಚೀನಾ ವಿದೇಶಾಂಗ ಸಚಿವರ ಭೇಟಿಯಲ್ಲಿ ದಕ್ಷಿಣ ಚೀನಾ ಸಮುದ್ರದ ವಿಷಯ ಪ್ರಸ್ತಾಪವಾಗಲಿದೆ ಎಂದು ವಿಶ್ಲೇಷಿಸಲಾಗಿತ್ತಾದರೂ, ಬೀಜಿಂಗ್ ಈ ವಿಚಾರವನ್ನು ಅಲ್ಲಗಳೆದಿದೆ.

ಚೀನಾ ವಿದೇಶಾಂಗ ಸಚಿವರು ತಮ್ಮ ಭಾರತ ಭೇಟಿಯಲ್ಲಿ ದಕ್ಷಿಣ ಚೀನಾ ಸಮುದ್ರ ವಿವಾದಕ್ಕೆ ಸಂಬಂಧಿಸಿದಂತೆ ಭಾರತದ ಬಳಿ ಸಹಾಯ ಕೇಳಿಲ್ಲ ಎಂದು ಚೀನಾದ ಸರ್ಕಾರಿ ಸ್ವಾಮ್ಯದ ಪತ್ರಿಕೆ ಪ್ರಕಟಿಸಿದ ಲೇಖನದಲ್ಲಿ ಹೇಳಿದೆ. ದಕ್ಷಿಣ ಚೀನಾ ಸಮುದ್ರ ವಿವಾದದ ಇತಿಹಾಸವನ್ನು ಪ್ರಸ್ತಾಪಿಸಿರುವ ಭಾರತೀಯ ಮಾಧ್ಯಮಗಳ ಬಗ್ಗೆ ಚೀನಾ ಮಾಧ್ಯಮ ಕಿಡಿಕಾರಿದೆ. ಆದರೆ ಭಾರತ ಸರ್ಕಾರದ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸದೆ, ದಕ್ಷಿಣ ಚೀನಾ ಸಮುದ್ರದ ಬಗ್ಗೆ ಅಮೆರಿಕ, ಜಪಾನ್ ನ ಒತ್ತಡದ ನಡುವೆಯೂ ಭಾರತ ಸರ್ಕಾರ ತಟಸ್ಥ ನಿಲುವು ಹೊಂದಿದೆ ಎಂದು ಹೇಳಿದೆ.   
ದಕ್ಷಿಣ ಚೀನಾ ಸಮುದ್ರದ ವಿಷಯಕ್ಕೆ ಸಂಬಂಧಿಸಿದಂತೆ ವಿಶ್ವಸಂಸ್ಥೆ ತೀರ್ಪು ಪ್ರಕಟಿಸಿದ ನಂತರ ಭಾರತ ಸರ್ಕಾರ ಭದ್ರತೆ ವಿಷಯದಲ್ಲಿ ತಟಸ್ಥ ನಿಲುವು ಹೊಂದಿದೆ. ಆದರೆ ಚೀನಾ ವಿದೇಶಾಂಗ ಸಚಿವರ ಭಾರತ ಭೇಟಿ ವೇಳೆ ದಕ್ಷಿಣ ಚೀನಾ ಸಮುದ್ರದ ವಿಷಯಕ್ಕೆ ಸಂಬಂಧಿಸಿದಂತೆ ಭಾರತದ ನೆರವು ಕೇಳಲಾಗಿಲ್ಲ ಎಂದು ಚೀನಾ ಮಾಧ್ಯಮ ತನ್ನ ಲೇಖನದಲ್ಲಿ ಪ್ರಕಟಿಸಿದೆ.