ಬೇರುತ್/ಲಂಡನ್: ಸಿರಿಯಾ ಪಡೆಗಳ ವಿರುದ್ಧ ಹೋರಾಟ ನಡೆಸುತ್ತಿರುವ ಐಎಸ್ ಉಗ್ರ ಸಂಘಟನೆ 300 ಮಂದಿ ನಾಗರಿಕರನ್ನು ಹತ್ಯೆ ಮಾಡಿದೆ. ಈ ಬಗ್ಗೆ ಅಲ್ಲಿನ ಸರ್ಕಾರ ಮಾಹಿತಿ ನೀಡಿದೆ. ಡೇರ್ -ಅಲ್-ಜೋರ್ ಎಂಬ ಪ್ರಾಂತ್ಯದಲ್ಲಿ ಶನಿವಾರ ಈ ಘಟನೆ ನಡೆದಿದೆ ಎಂದು ಸರ್ಕಾರಿ ಸ್ವಾಮ್ಯದ ಸುದ್ದಿ ಸಂಸ್ಥೆ `ಸನಾ' ವರದಿ ಮಾಡಿದೆ. 

ಅಸುನೀಗಿದವರಲ್ಲಿ ಹೆಚ್ಚಿನವರು ವೃದ್ಧರು, ಮಹಿಳೆಯರು, ಮಕ್ಕಳು ಎಂದು ಅದು ವರದಿ ಮಾಡಿದೆ. ಗುಂಡು ಹಾರಿಸಿ ಅಥವಾ ಶಿರಚ್ಛೇದ ಮಾಡಿ ಅವರನ್ನು ಕೊಂದಿದ್ದಾರೆ. ಸೈನಿಕರ ಕುಟುಂಬ ವರ್ಗದರನ್ನೇ ಹತ್ಯೆ ಮಾಡಲಾಗಿದೆ. ಆದರೆ ಬ್ರಿಟನ್ ನ ಮಾನವ ಹಕ್ಕು ಸಂಘಟನೆ ಪ್ರಕಾರ ಮೃತರ ಸಂಖ್ಯೆ 135 ಮಾತ್ರ.

400 ಮಂದಿ ಅಪಹರಣ: ಈ ಘಟನೆ ಬಳಿಕ ಐಎಸ್ ಮಹಿಳೆಯರು, ಮಕ್ಕಳು ಸೇರಿ 400 ಮಂದಿ ಸಿರಿಯಾ ನಾಗರಿಕರನ್ನು ಅಪಹರಿಸಿದೆ ಎಂದು `ಡೈಲಿ ಮೇಲ್' ವರದಿ ಮಾಡಿದೆ. ಇದೇ ವೇಳೆ, ಐಎಸ್ ಪರ ಕೆಲಸ ಮಾಡುತ್ತಿದ್ದ 100 ಮಂದಿ ಬ್ರಿಟನ್ ನಾಗರಿಕರು ಸಿರಿಯಾ, ಇರಾಕ್‍ನಲ್ಲಿ ಅಸುನೀಗಿದ್ದಾರೆ ಎನ್ನಲಾಗಿದೆ.