ಇಸ್ಲಾಮಾಬಾದ್: ಪೇಶಾವರ ಸೇನಾಶಾಲೆ ಮೇಲಿನ ಭಯೋತ್ಪಾದಕರ ಭೀಕರ ದಾಳಿ ಬಳಿಕ ಪಾಕಿಸ್ತಾನ ಇಲ್ಲಿಯವರೆಗೂ 182 ಮದರಸಾಗಳಿಗೆ ಬೀಗ ಜಡಿದಿದೆ.

ಸಂಶಯಾಸ್ಪದ ಚಟುವಟಿಕೆಗಳಲ್ಲಿ ತೊಡಗಿದ್ದ ಪಂಜಾಬ್, ಸಿಂಧ್ ಹಾಗೂ ಖೈಬರ್ ಫಖ್ತುಂಖ್ವಾದಲ್ಲಿನ ಮದರಸಾಗಳನ್ನು ಮುಚ್ಚಲಾಗಿದೆ ಎಂದು ಎಪಿಪಿ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

2014ರ ಪೇಶಾವರ ಸೇನಾ ಶಾಲೆ ಮೇಲಿನ ಉಗ್ರರ ದಾಳಿ ಬಳಿಕ ಅಸ್ತಿತ್ವಕ್ಕೆ ಬಂದಿರುವ ಭಯೋತ್ಪಾದನೆ ವಿರುದ್ಧದ ರಾಷ್ಟ್ರೀಯ ಕಾರ್ಯ ಯೋಜನೆ(ಎನ್‌ಎಪಿ) ಅಡಿಯಲ್ಲಿ ಈ ಕ್ರಮ ಕೈಗೊಂಡಿದ್ದು, ಉಗ್ರರ ಆರ್ಥಿಕ ನೆರವಿಗೆ ಪೆಟ್ಟು ನೀಡುವ ಯತ್ನವಾಗಿ ಸ್ಟೇಟ್‌ ಬ್ಯಾಂಕ್‌ ಆಫ್‌ ಪಾಕಿಸ್ತಾನವು ಉಗ್ರ ಸಂಘಟನೆಗಳ ನಂಟಿರುವ 126 ಖಾತೆಗಳ ಒಂದು ಶತಕೋಟಿ ಪಾಕ್‌ ರೂಪಾಯಿ ಹಣವನ್ನು ಮುಟ್ಟುಗೋಲು ಹಾಕಿಕೊಂಡಿದೆ. ಕಾನೂನು ಪಾಲನಾ ಪಡೆಗಳು ಈವರೆಗೂ 25.1 ಕೋಟಿ ಪಾಕಿಸ್ತಾನ ರೂಪಾಯಿ ನಗದು ವಶಕ್ಕೆ ಪಡೆದಿವೆ.

ಒಟ್ಟಾರೆ 1,026 ಪ್ರಕರಣಗಳನ್ನು ದಾಖಲಿಸಿಕೊಂಡಿರುವ ಪಾಕಿಸ್ತಾನ ಸರ್ಕಾರ 230 ಶಂಕಿತ ಉಗ್ರರನ್ನು ಬಂಧಿಸಿದೆ. ಪಾಕಿಸ್ತಾನದಲ್ಲಿ 64 ನಿಷೇಧಿತ ಸಂಘಟನೆಗಳಿವೆ. ವಿಶ್ವಸಂಸ್ಥೆಯು ಪಾಕಿಸ್ತಾನದ 74 ಸಂಘಟನೆಗಳನ್ನು ಅಕ್ರಮ ಎಂದು ಘೋಷಿಸಿದೆ.