ಲಂಡನ್: ಬಲೂಚಿಸ್ತಾನದಲ್ಲಿ ಪಾಕಿಸ್ತಾನ ನಡೆಸುತ್ತಿರುವ ದೌರ್ಜನ್ಯಗಳಿಗೆ ಚೀನಾ ಸಹ ಬೆಂಬಲ ನೀಡುತ್ತಿದೆ ಎಂದು ಆರೋಪಿಸಿ ಬಲೂಚಿಸ್ತಾನ ಹೋರಾಟಗಾರರು, ಲಂಡನ್ ನಲ್ಲಿರುವ ಚೀನಾ ರಾಯಭಾರ ಕಚೇರಿ ಎದುರು ಪ್ರತಿಭಟನೆ ನಡೆಸಿದ್ದಾರೆ.

ಬಲೂಚ್ ನ್ಯಾಷನಲಿಸ್ಟ್ ನ ಹರ್ಬಿಯಾರ್ ಮರ್ರಿ ಸೇರಿದಂತೆ ಹಲವು ಬಲೂಚಿಸ್ತಾನ ಹೋರಾಟಗಾರರು ಅಕ್ಟೊಬರ್ 1 ರ ವರೆಗೆ ರಾಯಭಾರಿ ಕಚೇರಿ ಎದುರು ಚೀನಾ ವಿರುದ್ಧ ಪ್ರತಿಭಟನೆ ನಡೆಸುವುದಕ್ಕೆ ಅನುಮತಿ ಪಡೆದಿದ್ದಾರೆ ಎಂದು ಚೀನಾದ ಮಾಧ್ಯಮವೊಂದು ವರದಿ ಮಾಡಿದೆ. ಬಲೂಚಿಸ್ತಾನದಲ್ಲಿ ಪಾಕಿಸ್ತಾನ ನಡೆಸುತ್ತಿರುವ ದೌರ್ಜನ್ಯಗಳಿಗೆ ಬೆಂಬಲ ನೀಡುತ್ತಿರುವ ಚೀನಾ ವಿರುದ್ಧ 6 ದಿನಗಳು ಪ್ರತಿಭಟನೆ ನಡೆಸುತ್ತೇವೆ ಎಂದು ಫೈಜ್ ಮುಹಮ್ಮದ್ ಬಲೂಚ್ ಹೇಳಿದ್ದಾರೆ. ಬಲೂಚಿಸ್ತಾನಾದ ಹೋರಾಟಗಾರರ ಎಚ್ಚರಿಕೆ, ವಿರೋಧದ ಹೊರತಾಗಿಯೂ ಚೀನಾ ಬಲೂಚ್ ನ ಸಂಪನ್ಮೂಲಗಳನ್ನು ಎಗ್ಗಿಲ್ಲದೆ ಬಳಸಿಕೊಳ್ಳುತ್ತಿದೆ ಎಂದು ಫೈಜ್ ಮುಹಮ್ಮದ್ ಆರೋಪಿಸಿದ್ದಾರೆ. ಇದೆ ವೇಳೆ ಚೀನಾ ಬಲೂಚಿಸ್ಥಾನದ್ಲಲಿ ನಿರ್ಮಿಸುತ್ತಿರುವ ಚೀನಾ ಪಾಕಿಸ್ತಾನ ಎಕನಾಮಿಕ್ ಕಾರಿಡಾರ್ ನ್ನು ಸಕ ಬಲೂಚಿಸ್ತಾನದ ಹೋರಾಟಗಾರರು ವಿರೋಧಿಸಿದ್ದಾರೆ.