ನ್ಯೂಯಾರ್ಕ್:  ಬಾಕ್ಸರ್ ದಂತಕಥೆ  ಮುಹಮ್ಮದ್ ಅಲಿಯವರ ಪುತ್ರನನ್ನು ಪ್ಲೋರಿಡಾ ವಿಮಾನ ನಿಲ್ದಾಣದಲ್ಲಿ ಭದ್ರತಾ ಸಿಬ್ಬಂದಿ ಅನೇಕ ತಾಸುಗಳವರೆಗೆ ವಿಚಾರಣೆ ನಡೆಸಿದ ಘಟನೆ ನಡೆದಿದೆ. ಅಲ್ಲದೆ ಅವರ ಧರ್ಮದ ಬಗ್ಗೆ ಅಧಿಕಾರಿಗಳು ಹಲವು ಬಾರಿ ಪ್ರಶ್ನೆ ಕೇಳಿದ್ದಾರೆ.

44 ವರ್ಷದ  ಮುಹಮ್ಮದ್ ಅಲಿ ಜ್ಯೂನಿಯರ್ ಮತ್ತು ಅವರ ತಾಯಿ ಖಲಿಲಾಲ್ ಕಮಕೊ-ಅಲಿ ಫೆಬ್ರವರಿ 7ರಂದು ಜಮೈಕಾದಲ್ಲಿ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿ ಫೋರ್ಟ್ ಲಾಡರ್ಡೇಲ್-ಹಾಲಿವುಡ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದರು. ಅವರ ಹೆಸರಿನಲ್ಲಿ ಅರೆಬಿಕ್ ಇರುವುದರಿಂದ ವಿಚಾರಣೆ ಸಮಯದಲ್ಲಿ ಪಕ್ಕಕ್ಕೆ ತಳ್ಳಲಾಯಿತು. ತಡವಾಗಿ ತಪಾಸಣೆ ಮಾಡಲಾಯಿತು ಎಂದು ಅವರ ಕುಟುಂಬ ಸ್ನೇಹಿತ, ವಕೀಲ ಕ್ರಿಸ್ ಮನ್ಸಿನಿ ತಿಳಿಸಿದ್ದಾರೆ.

ಜ್ಯೂನಿಯರ್ ಮುಹಮ್ಮದ್ ಅವರ ತಾಯಿ ಮೊಹಮ್ಮದ್ ಆಲಿಯವರ ಮೊದಲ ಪತ್ನಿ ಕಮಕೊ ಅಲಿ  ತನ್ನ ಮಾಜಿ ಪತಿಯ ಫೋಟೋ ತೋರಿಸಿದಾಗ ಒಳಗೆ ಹೋಗಲು ಬಿಟ್ಟರು. ಆದರೆ ಪುತ್ರ ಮಾತ್ರ ಎರಡು ಗಂಟೆಗಳ ಕಾಲ ವಿಮಾನ ನಿಲ್ದಾಣದಲ್ಲಿಯೇ ನಿಲ್ಲಬೇಕಾಯಿತು. ಅಧಿಕಾರಿಗಳು, ನಿಮಗೆ ಹೇಗೆ ಈ ಹೆಸರು ಬಂತು, ನೀವು ಮುಸಲ್ಮಾನರಾ ಎಂದು ಪದೇ ಪದೇ ಕೇಳಿದ್ದಾರೆ.

ಹೌದು ತಾವು ಮುಸಲ್ಮಾನ ಎಂದು ಹೇಳಿದ್ದಕ್ಕೆ ಅಧಿಕಾರಿಗಳು ಮತ್ತೆ ಮತ್ತೆ ಅವರ ಧರ್ಮ ಮತ್ತು ಅವರು ಹುಟ್ಟಿದ್ದು ಎಲ್ಲಿ ಎಂದು ಕೇಳಿದ್ದಾರೆ.

ಈ ಬಗ್ಗೆ ಕಾನೂನಿನ ಮೂಲಕ ಕೇಸು ದಾಖಲಿಸಲು ಮನ್ಸಿನಿ ಮತ್ತು ಅಲಿ ಕುಟುಂಬ ಪ್ರಯತ್ನಿಸುತ್ತಿದೆ.