ಪ್ಯಾರಿಸ್; ಫ್ರಾನ್ಸ್​ ಅಧ್ಯಕ್ಷೀಯ ಚುನಾವಣೆಗೆ ತೆರೆ ಬಿದ್ದಿದ್ದು, ಮೇಲಿನ್​ ವಿರುದ್ಧ ಎಮ್ಯಾನುಯಲ್​ ಮ್ಯಾಕ್ರನ್​ಗೆ ಭರ್ಜರಿ ಜಯ ಗಳಿಸಿ ಅತ್ಯಂತ ಕಿರಿಯ ಅಧ್ಯಕ್ಷ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 

ಯೂರೋಪಿಯನ್ ಒಕ್ಕೂಟದ ಪರ ಒಲವು ಹೊಂದಿರುವ 39 ಇಮ್ಯಾನುಯಲ್ ಮ್ಯಾಕ್ರನ್ ಫ್ರಾನ್ಸ್​ನ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅಭೂತಪೂರ್ವ ಗೆಲುವು ಸಾಧಿಸಿದ್ದಾರೆ.

ಇಮ್ಯಾನುಯಲ್ ತಮ್ಮ ಪ್ರತಿಸ್ಪರ್ಧಿ ಬಲಪಂಥೀಯ ಪಕ್ಷ ನ್ಯಾಷನಲ್ ಫ್ರಂಟ್​ನ ಮರೀನ್ ಲೇ ಪೆನ್ ಅವರನ್ನು ಸೋಲಿಸಿದ್ದಾರೆ. ಅಧ್ಯಕ್ಷೀಯ ಚುನಾವಣೆಯಲ್ಲಿ ತಮ್ಮ ಗೆಲುವು ಖಚಿತವಾಗುತ್ತಿದ್ದಂತೆ ರಾಷ್ಟ್ರವನ್ನುದ್ದೇಶಿಸಿ ಮಾರ್ಕನ್ ಮಾತನಾಡಿದ್ದು, ದೇಶದ ಇತಿಹಾಸದಲ್ಲಿ ಹೊಸ ಅಧ್ಯಾಯವೊಂದು ತೆರೆದುಕೊಂಡಿದೆ. ದೇಶವನ್ನು ಹಲವಾರು ಸಮಸ್ಯೆಗಳು ಕಾಡುತ್ತಿವೆ. ಜನರ ಕಷ್ಟಗಳನ್ನು ಆಲಿಸುವುದು ನನ್ನ ಮೂಲ ಕರ್ತವ್ಯ, ನನ್ನ ಸಾಮರ್ಥ್ಯವನ್ನೆಲ್ಲಾ ಬಳಸಿ ಸಮಸ್ಯೆಗಳ ವಿರುದ್ಧ ಹೋರಾಡುತ್ತೇನೆ ಎಂದು ಹೇಳಿದ್ದಾರೆ. 

ಎಮ್ಯಾನುಯಲ್  ಶೇ 65.1 ಮತ್ತು ಮೆಲೀನ್‌ ಲೇ ಪೆನ್‌  ಶೇ 34.9ರಷ್ಟು ಮತ ಗಳಿಸಿದ್ದಾರೆ. ಎಮ್ಯಾನುಯಲ್ ನಿರೀಕ್ಷೆಗಿಂತ ಅಧಿಕ ಮತ ಪಡೆದಿದ್ದಾರೆ.