ಕೆನಡಾದಲ್ಲಿರುವ ತಮಿಳಿಗರೊಂದಿಗೆ ಕೆನಡಾ ಪ್ರಧಾನಿಯಿಂದ ಪೊಂಗಲ್ ಆಚರಣೆ
ಒಟ್ಟಾವಾ: ತಮಿಳರ ಸಾಂಪ್ರದಾಯಿಕ ಹಬ್ಬ ಪೊಂಗಲ್ ಅನ್ನು ಕೆನಡಾ ಪ್ರಧಾನಿ ವಿಶಿಷ್ಟವಾಗಿ ಆಚರಿಸಿದ್ದು, ಕೆನಡಾದಲ್ಲಿರುವ ತಮಿಳರೊಂದಿಗೆ ಸೇರಿ ಪ್ರಧಾನಿ ಜಸ್ಟಿನ್ ಟ್ರುಡೊ ಪೊಂಗಲ್ ಆಚರಣೆ ಮಾಡಿದ್ದಾರೆ.
ಈ ಬಗ್ಗೆ ಸ್ವತಃ ಕೆನಡಾ ಪ್ರಧಾನಿ ಜಸ್ಟಿನ್ ಟ್ರುಡೊ ತಮ್ಮ ಟ್ವಿಟರ್ ಖಾತೆಯಲ್ಲಿ ಫೋಟೋ ಅಪ್ಲೋಡ್ ಮಾಡಿದ್ದು, ಒಟ್ಟಾವಾದಲ್ಲಿರುವ ಸ್ಕಾರ್ಬರೊದಲ್ಲಿ ತಮಿಳು ಸಮುದಾಯದ ಆಹ್ವಾನದ ಮೇರೆಗೆ ಕಾರ್ಯಕ್ರಮಕ್ಕೆ ತೆರಳಿದ್ದ ಪ್ರಧಾನಿ ಜಸ್ಟಿನ್ ಟ್ರುಡೊ ಪೊಂಗಲ್ ಆಚರಣೆ ಮಾಡಿದರು.
ಅಲ್ಲದೆ ತಮಿಳು ಸಂಪ್ರದಾಯದ ತಿನಿಸಿಗಳನ್ನು ಕೂಡ ಪ್ರಧಾನಿ ಜಸ್ಟಿನ್ ಟ್ರುಡೊ ಅವರು ಸೇವಿಸಿದ್ದು, ದಕ್ಷಿಣ ಭಾರತದ ವಿವಿಧ ಖಾದ್ಯಗಳ ರುಚಿ ನೋಡಿದ್ದಾರೆ. ಈ ವೇಳೆ ಪೊಂಗಲ್ ನಿಮಿತ್ತ ತಮಿಳು ಸಂಪ್ರದಾಯದಂತೆ ಪಂಚೆ ಮತ್ತು ಶರ್ಟ್ ಧರಿಸುವ ಮೂಲಕ ಪ್ರಧಾನಿ ಜಸ್ಟಿನ್ ಟ್ರುಡೊ ಗಮನ ಸೆಳೆದರು. ಅಲ್ಲದೆ ತಮಿಳಿನಲ್ಲೇ ಅವರು ತಮಿಳಿಗರಿಗೆ ಶುಭ ಕೋರಿದ್ದು ವಿಶೇಷವಾಗಿತ್ತು.