ವಾಷಿಂಗ್ಟನ್: 2014ರಲ್ಲಿ ವಿಶ್ವದಾದ್ಯಂತ ಅಧ್ಯಯನ ಮುಗಿಸಿ ಹೊರಬಂದಿರುವ 7.5 ದಶಲಕ್ಷ ವಿಜ್ಞಾನಿಗಳು ಮತ್ತು ಎಂಜಿನಿಯರಿಂಗ್ ಪದವೀಧರರಲ್ಲಿ 4ರಲ್ಲಿ ಒಂದು ಭಾಗದಷ್ಟು ಮಂದಿ ಭಾರತೀಯರಾಗಿದ್ದಾರೆ ಎಂದು ವರದಿಯೊಂದು ಹೇಳಿದೆ.

ಸಂಶೋಧನೆ ಮತ್ತು ಅಭಿವೃದ್ಧಿ ವೇಗದಲ್ಲಿ ಅಮೆರಿಕಾ ಮುಂಚೂಣಿಯಲ್ಲಿದೆ ಎಂದು ವಿಜ್ಞಾನ ಮತ್ತು ಎಂಜಿನಿಯರಿಂಗ್ ಸೂಚ್ಯಂಕ 2018ರ ರಾಷ್ಟ್ರೀಯ ವಿಜ್ಞಾನ ಫೌಂಡೇಶನ್ ನ ವಾರ್ಷಿಕ ವರದಿ ಹೇಳುತ್ತದೆ.

ವಿಜ್ಞಾನ ಮತ್ತು ಎಂಜಿನಿಯರಿಂಗ್ ಕ್ಷೇತ್ರದಲ್ಲಿ ಚೀನಾಕ್ಕೆ ವಿಶೇಷ ಸ್ಥಾನವಿದೆ ಎಂದು ವರದಿ ಹೇಳಿದೆ.

ವಿಜ್ಞಾನ ಮತ್ತು ತಂತ್ರಜ್ಞಾನದಲ್ಲಿ ಅಮೆರಿಕಾ ಜಾಗತಿಕ ಮಟ್ಟದ ನಾಯಕನಾಗಿದೆ. ಆದರೂ, ಜಾಗತಿಕ ಮಟ್ಟದಲ್ಲಿ ಇದರ ಹಂಚಿಕೆ ಬೇರೆ ದೇಶಗಳಿಗೆ ಹೋಲಿಸಿದರೆ ಕಡಿಮೆಯಾಗುತ್ತಿದೆ ಮತ್ತು ಚೀನಾ ಬೆಳವಣಿಗೆ ಹೊಂದುತ್ತಿದೆ.

ಇತ್ತೀಚಿನ ಅಂದಾಜಿನ ಪ್ರಕಾರ, 2014ರಲ್ಲಿ ವಿಜ್ಞಾನ ಮತ್ತು ತಂತ್ರಜ್ಞಾನ ಡಾಕ್ಟರೇಟ್ ಪದವಿ ಪಡೆದವರಲ್ಲಿ ಅಮೆರಿಕನ್ನರು ಮುಂಚೂಣಿಯಲ್ಲಿದ್ದು(40,000 ಪದವೀಧರರು), ನಂತರದ ಸ್ಥಾನದಲ್ಲಿ ಚೀನಾ(34,000), ರಷ್ಯಾ(19,000), ಜರ್ಮನಿ(15,000), ಇಂಗ್ಲೆಂಡ್(14,000) ಮತ್ತು ಭಾರತ(13,000) ಇದೆ.