ವಾಷಿಂಗ್ ಟನ್: ರಾಷ್ಟ್ರಪಿತ ಮಹಾತ್ಮಾ ಗಾಂಧಿ ಯೇಸು ಕ್ರಿಸ್ತನ ಬಗೆಗೆ ಬರೆದಿದ್ದ ಪತ್ರವೊಂದನ್ನು ಹರಾಜಿಗೆ ಇಡಲಾಗಿದ್ದು ಇದರ ಮುಖಬೆಲೆ 50 ಸಾವಿರ ಡಾಲರ್ (ಅಂದಾಜು 33.50ಲಕ್ಷ ರೂ.) ಎಂದು ನಿಗದಿಪಡಿಸಲಾಗಿದೆ.
ಗಾಂಧೀಜಿ ಸಬರಮತಿ ಆಶ್ರಮದಲ್ಲಿದ್ದ ಸಮಯದಲ್ಲಿ ಏಪ್ರಿಲ್ 6, 1926ರಂದು ಈ ಪತ್ರ ಬರೆದಿದ್ದರು. ಶಾಯಿಯಲ್ಲಿ ಬರೆದ ಪತ್ರದಲ್ಲಿ ಗಾಂಧೀಜಿಯ ಸಹಿ ಇದೆ.
’ಯೇಸುವು ಮಾನವಕುಲದ ಶ್ರೇಷ್ಠ ಮಾರ್ಗದರ್ಶಕರಲ್ಲಿ ಒಬ್ಬ’ ಎಂದು ಯೇಸುವಿನ ಅಸ್ತಿತ್ವ ಹಾಗೂ ಸ್ವರೂಪದ ಬಗೆಗೆ ವಿವರಿಸಿದ್ದ ಪತ್ರವೊಂದನ್ನು ಹಿರಿಯ ಕ್ರೈಸ್ತರಾಗಿದ್ದ ಮಿಲ್ಟನ್ ನ್ಯೂಬೆರಿ ಫ್ರಾಂಟ್ಚ್ಜ್ ಎನ್ನುವವರಿಗೆ ಗಾಂಧಿ ಬರೆದಿದ್ದರು. ಈ ಪತ್ರವು ಹಲವಾರು ವರ್ಷಗಳಿಂದ ಖಾಸಗಿ ವ್ಯಕ್ತಿಯೊಬ್ಬರ ಸಂಗ್ರಹದಲ್ಲಿತ್ತು.
ಪೆನ್ಸಿಲ್ವೇನಿಯ ಮೂಲದ ರ್ಯಾಬ್ ಕಲೆಕ್ಷನ್ ಎಂಬ ಸಂಸ್ಥೆ ಈ ಪತ್ರವನ್ನೀಗ ಹರಾಜಿಗೆ ಇಟ್ಟಿದೆ.ಇದೊಂದ ಮಹತ್ವದ ಪತ್ರವಾಗಿದ್ದು ಇದರಲ್ಲಿನ ವಿಚಾರಗಳು ಭಾವನಾತ್ಮಕವೂ, ಪ್ರಭಾವಶಾಲಿಯೂ ಆಗಿದೆ ಎಂದು ರ್ಯಾಬ್ ಕಲೆಕ್ಷನ್ ನ ಮಾಲೀಕ ನತಾನ್ ರಾಬ್ ಹೇಳುತ್ತಾರೆ.
ಇತರೆ ಧರ್ಮದ ಮೇಲೆ ಗಾಂಧಿ ಯಾವ ರೀತಿಯ ಗೌರವ ಭಾವನೆ ಹೊಂದಿದ್ದರೆನ್ನುವುದು ಈ ಪತ್ರದಿಂದ ತಿಳಿಯುತ್ತದೆ ಎಂದು ಅವರು ಹೇಳುತ್ತಾರೆ