ದಾಳಿಯ ಹೊಣೆ ಹೊತ್ತುಕೊಂಡ ತಾಲಿಬಾನ್
ಕಾಬುಲ್: ದಕ್ಷಿಣ ಆಫ್ಘಾನಿಸ್ತಾನದ ಆಸ್ಪತ್ರೆಯೊಂದರಲ್ಲಿ ಗುರುವಾರ ನಸುಕಿನ ಜಾವ ಆತ್ಮಹತ್ಯಾ ಟ್ರಕ್ ಬಾಂಬ್ ಸ್ಫೋಟಗೊಂಡು ಕನಿಷ್ಠ 20 ಮಂದಿ ಮೃತಪಟ್ಟಿದ್ದು 90ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ.
ತಾಲಿಬಾನ್ ಪಡೆ ದಾಳಿಯ ಹೊಣೆ ಹೊತ್ತುಕೊಂಡಿದೆ. ದಕ್ಷಿಣ ಆಫ್ಘಾನಿಸ್ತಾನದ ಜಾಬುಲ್ ಪ್ರಾಂತ್ಯದ ಖಲತ್ ನ ಆಸ್ಪತ್ರೆಯ ಒಂದು ಭಾಗ ನಾಶವಾಗಿದ್ದು ಆಸ್ಪತ್ರೆಯ ಆಂಬ್ಯುಲೆನ್ಸ್ ಮುರಿದು ಜರ್ಝರಿತವಾಗಿ ಹೋಗಿದೆ.
ಆಸ್ಪತ್ರೆಗೆ ತಮ್ಮ ಬಂಧುಗಳನ್ನು ನೋಡಿ ಆರೋಗ್ಯ ವಿಚಾರಿಸಲೆಂದು ಬಂದಿದ್ದವರು ಹೆಚ್ಚು ಮಂದಿ ದಾಳಿಗೆ ಆಹುತಿಯಾಗಿದ್ದಾರೆ. ಗಾಯಗೊಂಡವರನ್ನು ಹತ್ತಿರದ ಕಂದಹಾರ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ತಿಂಗಳ ಆರಂಭದಲ್ಲಿ ಯುನೈಟೆಡ್ ಸ್ಟೇಟ್ಸ್ ಜೊತೆ ಮಾತುಕತೆ ವಿಫಲವಾದ ನಂತರ ತಾಲಿಬಾನೀಯರು ಪ್ರತಿದಿನವೆಂಬಂತೆ ದಾಳಿ ನಡೆಸುತ್ತಿದ್ದು, ಸರ್ಕಾರದ ಗುಪ್ತಚರ ಇಲಾಖೆ ಕಟ್ಟಡವನ್ನು ಗುರಿಯಾಗಿಟ್ಟುಕೊಂಡು ಇಂದು ದಾಳಿ ನಡೆಸಿತ್ತು.
ಇಂದಿನ ದಾಳಿಯಲ್ಲಿ ರಾಷ್ಟ್ರೀಯ ಭದ್ರತಾ ಇಲಾಖೆಯ ಕಟ್ಟಡದ ಗೋಡೆ ಸಹ ಸ್ವಲ್ಪ ಹಾನಿಯಾಗಿದೆ.