ಕಾಬೂಲ್: ಅಫ್ಘಾನಿಸ್ತಾನದಲ್ಲಿ ಹೆಂಗಸರು ಬುರ್ಖಾ ತೊಡದಿದ್ದರೆ ತಲೆದಂಡ ಖಚಿತ ಎನ್ನುವ ವಾತಾವರಣ ಎರಡು ದಶಕಗಳ ನಂತರ ನಿರ್ಮಾಣವಾಗುತ್ತಿದೆ. ಹೀಗಿರುವಾಗ ಸಾವಿರಾರು ಆಫ್ಘನ್ ಪುರುಷರ ನಿದ್ದೆಗೆಡಿಸಿದ್ದ ಓರ್ವ ಪಾಪ್ ಸ್ಟಾರ್ ಅನ್ನು ಅವರು ಜೀವಂತ ಬಿಟ್ಟಾರೆಯೇ? ಎಲ್ಲರಿಗೂ ಉತ್ತರ ಗೊತ್ತಿರುವ ಪ್ರಶ್ನೆ ಇದು. ಈ ಉತ್ತರವನ್ನು ಎಲ್ಲರಿಗಿಂತ ಚೆನ್ನಾಗಿ ಅರ್ಥ ಮಾಡಿಕೊಂಡದ್ದರಿಂದಲೇ ಆಫ್ಘನ್ ಪಾಪ್ ಸ್ಟಾರ್ ಅರಿಯಾನ ಸಯೀದ್ ಇಂದು ಬದುಕಿರುವುದು ಎಂದು ಹೇಳಬಹುದು. 

ತಾಲಿಬಾನ್ ಕಾಬೂಲ್ ನಗರವನ್ನು ಸುತ್ತುವರಿದಾಗಲೇ ಎಚ್ಚೆತ್ತುಕೊಂಡ ಪಾಪ್ ಸ್ಟಾರ್ ಅರಿಯಾನ ಸಯೀದ್ ಅಮೆರಿಕದ ಕಾರ್ಗೊ ವಿಮಾನದಲ್ಲಿ ಪತಿಯೊಂದಿಗೆ ದೇಶವನ್ನು ತೊರೆದು ಪ್ರಾಣ ಉಳಿಸಿಕೊಂಡಿದ್ದಾರೆ. ಇದೀಗ ಅವರು ಸ್ವದೇಶದಿಂದ ಎಸ್ಕೇಪ್ ಆಗುತ್ತಿರುವ ಸಮಯದಲ್ಲಿ ತೆಗೆದುಕೊಂಡ ಫೋಟೋಗಳನ್ನು ಅಭಿಮಾನಿಗಳ ಜೊತೆ ಹಂಚಿಕೊಂಡಿದ್ದು ಅವು ಅಂತರ್ಜಾಲದಲ್ಲಿ ವೈರಲ್ ಆಗಿವೆ. 

ಅರಿಯಾನ ಅವರು ಅಫ್ಘಾನಿಸ್ತಾನದ ಜನಪ್ರಿಯ ಪಾಪ್ ಸ್ಟಾರ್ ಆಗಿದ್ದಾರೆ. ಅವರು ಅಲ್ಲಿಯ ಸಂಗೀತ ರಿಯಾಲಿಟಿ ಶೋನಲ್ಲಿ  ಜಡ್ಜ್ ಆಗಿಯೂ ಕಾಣಿಸಿಕೊಂಡಿದ್ದರು. ಅವರು ಆಫ್ಘನ್ ಸೇನೆಯ ಬೆಂಬಲಿಗಳಾಗಿದ್ದು, ಈ ಹಿಂದೆ ಹಲವು ಬಾರಿ ಆಫ್ಘನ್ ಸೇನೆ ಪರ ಹೇಳಿಕೆ ನೀಡಿ ಸುದ್ದಿಯಾಗಿದ್ದರು. ಆಕೆಯ ಪತಿ ಸಯೀದ್ ಓರ್ವ ಚಿತ್ರ ನಿರ್ಮಾಪಕರಾಗಿದ್ದಾರೆ.