ಉದ್ಯೋಗ ಕಡಿತ ಸಮರ್ಥಿಸಿಕೊಂಡ ಮಸ್ಕ್, ಜಾಹಿರಾತುದಾರರಿಗೆ ನೀಡಿದರು ಎಚ್ಚರಿಕೆ....

ನ್ಯೂಯಾರ್ಕ್: ಟೆಸ್ಲಾ ಸಿಇಒ ಎಲಾನ್ ಮಸ್ಕ್ ಟ್ವಿಟರ್ ಸಂಸ್ಥೆಯನ್ನು ಖರೀದಿಸಿದ ಬಳಿಕ ಉದ್ಯೋಗ ಕಡಿತದ ಬಗ್ಗೆ ಘೋಷಣೆ ಮಾಡಿದ ನಂತರ ಉಂಟಾಗುತ್ತಿರುವ ಪರಿಣಾಮಗಳ ಬಗ್ಗೆ ಮಾತನಾಡಿದ್ದಾರೆ.
 
ಉದ್ಯೋಗ ಕಡಿತದ ಬೆನ್ನಲ್ಲೇ ಜಾಹಿರಾತು ನೀಡುತ್ತಿರುವವರು ಸಂಸ್ಥೆಯಿಂದ ದೂರವಾಗುವ ಮಾತನಾಡಿದ್ದು, ಈ ರೀತಿ ಉದ್ದೇಶ ಹೊಂದಿರುವವರ ಹೆಸರನ್ನು ಬಹಿರಂಗಪಡಿಸುವುದಾಗಿ ಮಸ್ಕ್ ಎಚ್ಚರಿಸಿದ್ದಾರೆ.
 
7,500 ಮಂದಿ ಉದ್ಯೋಗಿಗಳ ಪೈಕಿ ಅರ್ಧದಷ್ಟು ಮಂದಿಯನ್ನು ಟ್ವಿಟರ್ ವಜಾಗೊಳಿಸಿದೆ. ಗ್ರಾಹಕರೊಬ್ಬರಿಗೆ ಈ ವಿಷಯವಾಗಿ ಪ್ರತಿಕ್ರಿಯೆ ನೀಡಿದ ಎಲಾನ್ ಮಸ್ಕ್, ಧನ್ಯವಾದಗಳು, ಇದು ಹೀಗೇ ಮುಂದುವರೆದರೆ, ಬಹಿರಂಗವಾಗಿ ಅವರ ಹೆಸರು ಹೇಳಿ ಅವಮಾನ ಮಾಡಲಾಗುತ್ತದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಅಮೆರಿಕ ನಂತರ, ಭಾರತದಲ್ಲೂ ಟ್ವಿಟರ್ ಸಿಬ್ಬಂದಿ ವಜಾ; ಎರಡು ವಿಭಾಗ ಸಂಪೂರ್ಣ ಬಂದ್!

ಮೈಕ್ ಡಾವಿಸ್ ಎಂಬ ಟ್ವಿಟರ್ ಬಳಕೆದಾರರೊಬ್ಬರು ಟ್ವೀಟ್ ಮಾಡಿ ಡಿಯರ್ ಎಲಾನ್ ಮಸ್ಕ್, ನೀವು 114,000,000 ಟ್ವಿಟರ್ ಅನುಯಾಯಿಗಳನ್ನು ಹೊಂದಿದ್ದೀರಿ, ನಿಮಗೆ ಜಾಹಿರಾತು ಬಹಿಷ್ಕರಿಸುವವರ ಹೆಸರನ್ನು ಬಹಿರಂಗಗೊಳಿಸಿ, ಆ ಮೂಲಕ ನಾವು ಅವರನ್ನೂ ಬಹಿಷ್ಕರಿಸಬಹುದು ಎಂದು ಹೇಳಿದ್ದರು. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಎಲಾನ್ ಮಸ್ಕ್, ಜಾಹಿರಾತುದಾರರ ಮೇಲೆ ಕಾರ್ಯಕರ್ತರ ಗುಂಪು ಒತ್ತಡ ಹೇರುತ್ತಿದ್ದು, ಆದಾಯಕ್ಕೆ ಹೊಡೆತ ಕೊಡಲು ಯತ್ನಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ. 

ಇದೇ ವೇಳೆ ಎಲಾನ್ ಮಸ್ಕ್ ಉದ್ಯೋಗ ಕಡಿತವನ್ನೂ ಸಮರ್ಥಿಸಿಕೊಂಡಿದ್ದಾರೆ.