ವಾಷಿಂಗ್ಟನ್: ಅಮೆರಿಕದ ಬಿಲಿಯನೇರ್ ಥಾಮಸ್ ಲೀ ಅವರ ಕಚೇರಿಯಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. ವರದಿಗಳ ಪ್ರಕಾರ ಅವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎನ್ನಲಾಗಿದೆ. 

ಬಿಲಿಯನೇರ್ ಫೈನಾನ್ಶಿಯರ್ 78 ವರ್ಷದ ಥಾಮಸ್ ಲೀ ಅವರ ಮೃತ ದೇಹವು ನ್ಯೂಯಾರ್ಕ್ನ 767 ಫಿಫ್ತ್ ಅವೆನ್ಯೂ ಕಚೇರಿಯಲ್ಲಿ ಪತ್ತೆಯಾಗಿದೆ ಎಂದು ಹೇಳಲಾಗುತ್ತಿದೆ. ಗುಂಡೇಟಿನಿಂದ ಲೀ ಸಾವನ್ನಪ್ಪಿದ್ದಾರೆ ಎಂದು ಹೇಳಲಾಗುತ್ತದೆ.

ಉದ್ಯಮಿ ಥಾಮಸ್ ಲೀ ಅವರು ತಮ್ಮ ಹೂಡಿಕೆ ಸಂಸ್ಥೆಯ ಫಿಫ್ತ್ ಅವೆನ್ಯೂ ಮ್ಯಾನ್‌ಹ್ಯಾಟನ್ ಕಚೇರಿಯಲ್ಲಿ ಗುರುವಾರ ಸ್ಥಳೀಯ ಕಾಲಮಾನ ಸುಮಾರು 11:10 ಗಂಟೆಗೆ ಮೃತಪಟ್ಟಿದ್ದಾರೆ. ನ್ಯೂಯಾರ್ಕ್ ಪೋಸ್ಟ್‌ನ ವರದಿಯ ಪ್ರಕಾರ, ಅವರು ತಮ್ಮ ಕಚೇರಿಯಲ್ಲಿ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಕಚೇರಿಯ ಸ್ನಾನಗೃಹದ ಮಹಡಿಯಲ್ಲಿ ಶವ ಪತ್ತೆ
ವರದಿಯ ಪ್ರಕಾರ, ಲೀ ಗುಂಡೇಟಿನಿಂದ ಸಾವನ್ನಪ್ಪಿದ್ದಾರೆ. ಆತನನ್ನು ರಕ್ಷಿಸುವ ಎಲ್ಲಾ ಪ್ರಯತ್ನಗಳು ಫಲಕೊಡಲಿಲ್ಲ. ಕಛೇರಿಯ ಬಾತ್ರೂಮ್ ನಲ್ಲಿ ಲೀ ಬಿದ್ದಿರುವುದನ್ನು ಮಹಿಳಾ ಸಹಾಯಕಿಯೊಬ್ಬರು ನೋಡಿದ್ದರು. ಬೆಳಗ್ಗೆಯಿಂದ ಯಾವುದೇ ಮಾಹಿತಿ ಸಿಗದ ಹಿನ್ನೆಲೆಯಲ್ಲಿ ಶೋಧ ನಡೆಸಲಾಗಿತ್ತು. 'ಥಾಮಸ್ ಸಾವಿನಿಂದ ಕುಟುಂಬವು ತೀವ್ರವಾಗಿ ದುಃಖಿತವಾಗಿದೆ' ಎಂದು ಥಾಮಸ್ ಲೀ ಅವರ ಕುಟುಂಬದ ಸ್ನೇಹಿತ ಮತ್ತು ವಕ್ತಾರ ಮೈಕೆಲ್ ಸಿಟ್ರಿಕ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಇನ್ನು ಅವರ ಆತ್ಮಹತ್ಯೆಗೆ ಕಾರಣಗಳು ಬಹಿರಂಗವಾಗಿಲ್ಲ.

ಫೋರ್ಬ್ಸ್ ಪ್ರಕಾರ, ಥಾಮಸ್ ಲೀ ಅವರ ಮರಣದ ಸಮಯದಲ್ಲಿ, ಆಸ್ತಿ ಸುಮಾರು ಎರಡು ಬಿಲಿಯನ್ ಡಾಲರ್ ಆಗಿತ್ತು. ಲೀ ಅವರ ಪತ್ನಿ ಆನ್ ಟೆನೆನ್‌ಬಾಮ್ ಮತ್ತು ಐದು ಮಕ್ಕಳನ್ನು ಅಗಲಿದ್ದಾರೆ. ಥಾಮಸ್ ಅವರು 2006ರಲ್ಲಿ ಸ್ಥಾಪಿಸಿದ ಲೀ ಇಕ್ವಿಟಿಯ ಸಂಸ್ಥಾಪಕ ಮತ್ತು ಅಧ್ಯಕ್ಷರಾಗಿದ್ದರು. ಹಿಂದೆ ಅವರು 1974ರಲ್ಲಿ ಸ್ಥಾಪಿಸಿದ ಥಾಮಸ್ ಎಚ್. ಲೀ ಪಾಲುದಾರರ ಅಧ್ಯಕ್ಷ ಮತ್ತು ಸಿಇಒ ಆಗಿ ಸೇವೆ ಸಲ್ಲಿಸಿದರು. ಬಿಲಿಯನೇರ್ ಲೀ ಕಳೆದ 46 ವರ್ಷಗಳಲ್ಲಿ ನೂರಾರು ಡೀಲ್‌ಗಳಲ್ಲಿ $15 ಶತಕೋಟಿಗೂ ಹೆಚ್ಚು ಹೂಡಿಕೆ ಮಾಡಿದ್ದಾರೆ.