ವಾಷಿಂಗ್ಟನ್ ಡಿಸಿ: ಭಾರತ ಮತ್ತು ಅಮೆರಿಕ ಸರ್ಕಾರಗಳು ಉಭಯ ದೇಶಗಳ ವ್ಯಾಪಾರ ಸಮುದಾಯಕ್ಕೆ ತಳಹದಿಯನ್ನು ಮಾಡಿವೆ. ಈಗ ಇದರ ಲಾಭವನ್ನು ಪಡೆದುಕೊಳ್ಳುವುದು, ಪ್ರಚಾರ ಮಾಡುವುದು ಕಾರ್ಪೊರೇಟ್ ವಲಯದ ಜವಾಬ್ದಾರಿಯಾಗಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.
ನಿನ್ನೆ ಶುಕ್ರವಾರ ವಾಷಿಂಗ್ಟನ್, DC ಯ ಕೆನಡಿ ಸೆಂಟರ್‌ನಲ್ಲಿ ಭಾರತ ಮತ್ತು ಯುಎಸ್‌ನ ಉದ್ಯಮ ವಲಯದ ಪ್ರಮುಖರು ಮತ್ತು ಸಮಾಜಮುಖಿ ಕೆಲಸ ಮಾಡುವ ಗಣ್ಯರು ಹಾಗೂ ಭಾರತೀಯ-ಅಮೆರಿಕನ್ ಸಮುದಾಯದ ಇತರ ಪ್ರಮುಖ ಸದಸ್ಯರನ್ನು ಉದ್ದೇಶಿಸಿ ಮಾತನಾಡಿದ ಅವರು, ಭಾರತ-ಯುಎಸ್ ಪಾಲುದಾರಿಕೆ ಕೇವಲ ಅನುಕೂಲಕರವಾಗಿಯಲ್ಲ, ಇಲ್ಲಿ ಎರಡೂ ದೇಶಗಳ ನಡುವೆ ಪರಸ್ಪರ ಮನವರಿತೆ, ಬದ್ಧತೆ ಮತ್ತು ಸಹಾನುಭೂತಿಯಿದೆ ಎಂದರು.
ಕಳೆದ ಮೂರು ದಿನಗಳ ಅಮೆರಿಕ ಭೇಟಿಯಲ್ಲಿ ದ್ವಿಪಕ್ಷೀಯ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸಲು ಹಲವು ಐತಿಹಾಸಿಕ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ರಕ್ಷಣೆಯಿಂದ ವಾಯುಯಾನ, ಉತ್ಪಾದನೆಗೆ ಅನ್ವಯಿಕ ಸಾಮಗ್ರಿಗಳು ಮತ್ತು ಐಟಿ ಮತ್ತು ಬಾಹ್ಯಾಕಾಶ ಕ್ಷೇತ್ರಗಳಲ್ಲಿ ಭಾರತ ಮತ್ತು ಯುಎಸ್ ಈಗ ಅತ್ಯಂತ ವಿಶ್ವಾಸಾರ್ಹ ಪಾಲುದಾರರಾಗಿ ಮುನ್ನಡೆಯುತ್ತಿವೆ ಎಂದು ಯುಎಸ್-ಇಂಡಿಯಾ ಸ್ಟ್ರಾಟೆಜಿಕ್ ಸಹಭಾಗಿತ್ವ ವೇದಿಕೆ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಹೇಳಿದರು.
ಇದನ್ನೂ ಓದಿ: ಪ್ರಧಾನಿ ಮೋದಿಗೆ ಅವರದ್ದೇ "AI ಉಲ್ಲೇಖ" ಮುದ್ರಿಸಿದ ವಿಶೇಷ ಟೀ ಶರ್ಟ್ ಉಡುಗೊರೆ ನೀಡಿದ ಅಮೇರಿಕಾ ಅಧ್ಯಕ್ಷ ಬೈಡನ್!
ಉದ್ಯಮಿಗಳು ಈ ಅವಕಾಶವನ್ನು ಸದುಪಯೋಗಪಡಿಸಿಕೊಂಡು ಮುಂದೆ ಸಾಗಬೇಕು ಎಂದು ಮನವಿ ಮಾಡಿದರು. ಭಾರತದ ಪ್ರತಿಯೊಂದು ಅಭಿವೃದ್ಧಿ ಯೋಜನೆಯು ಅಮೆರಿಕದ ಕನಸನ್ನು ಮತ್ತಷ್ಟು ಬಲಪಡಿಸುವ ಸಾಮರ್ಥ್ಯವನ್ನು ಹೊಂದಿದೆ, ಭಾರತವು ಮೂಲಸೌಕರ್ಯ ಅಭಿವೃದ್ಧಿಯಲ್ಲಿ ದಾಖಲೆಯ 125 ಶತಕೋಟಿ ಡಾಲರ್ ಹೂಡಿಕೆ ಮಾಡುತ್ತಿದೆ ಎಂದು ಉಲ್ಲೇಖಿಸಿದರು.
ಶ್ವೇತಭವನದಲ್ಲಿ ನಡೆದ ಭಾರತ-ಅಮೆರಿಕ ತಾಂತ್ರಿಕ ಸಭೆಯು ಕಂಪನಿಗಳು, ವ್ಯವಹಾರಗಳು, ತಯಾರಕರು ಮತ್ತು ನವೋದ್ಯಮಿಗಳಿಗೆ ಹಲವು ಸಂದೇಶಗಳನ್ನು ಕಳುಹಿಸಿದೆ. ಭಾರತವು ಬಲಿಷ್ಠಗೊಂಡಾಗಲೆಲ್ಲಾ ಜಗತ್ತಿಗೆ ಪ್ರಯೋಜನವಾಗಿದೆ ಎಂದು ಪ್ರತಿಪಾದಿಸಿದ ಪ್ರಧಾನಿ, ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಜಗತ್ತಿಗೆ ಔಷಧಿಗಳ ಅಗತ್ಯವಿದ್ದಾಗ ಭಾರತವು ತನ್ನ ಉತ್ಪಾದನೆಯನ್ನು ಹೆಚ್ಚಿಸಿ ಔಷಧಿಗಳನ್ನು ಒದಗಿಸಿದೆ ಎಂದರು.
ಭಾರತದ ಯಶಸ್ಸಿನ ಆಧಾರ ಮತ್ತು ಅದರ ಅಭಿವೃದ್ಧಿಯ ಅತಿದೊಡ್ಡ ಪ್ರೇರಕ ಶಕ್ತಿ ಅದರ ಜನರ ಆಕಾಂಕ್ಷೆಯಾಗಿದೆ. ಕಳೆದ ಎರಡೂವರೆ ವರ್ಷಗಳಲ್ಲಿ, ಅಮೇರಿಕಾದ ಕಂಪನಿಗಳು ಭಾರತದಲ್ಲಿ 16 ಶತಕೋಟಿ ಡಾಲರ್ ಗಿಂತ ಹೆಚ್ಚು ಹೂಡಿಕೆ ಮಾಡಿವೆ ಎಂದು ಹೇಳಿದರು.
ಇದನ್ನೂ ಓದಿ: ತಂತ್ರಜ್ಞಾನ ಹಾಗೂ ಪ್ರತಿಭೆಯ ಸಂಯೋಜನೆಯಿಂದ ಜಗತ್ತಿನ ಭವಿಷ್ಯ ಉಜ್ವಲ: ಅಮೇರಿಕಾದಲ್ಲಿ ಸಿಇಒಗಳೊಂದಿಗಿನ ಸಭೆಯಲ್ಲಿ ಮೋದಿ
"ನಾವು ವಿತ್ತೀಯ ಕೊರತೆಯನ್ನು ಹತೋಟಿಯಲ್ಲಿ ಇಟ್ಟುಕೊಳ್ಳುತ್ತಿದ್ದೇವೆ. ನಮ್ಮ ರಫ್ತು ಹೆಚ್ಚುತ್ತಿದೆ, ನಮ್ಮ ವಿದೇಶೀ ವಿನಿಮಯ ಹೆಚ್ಚುತ್ತಿದೆ. ಎಫ್‌ಡಿಐನಲ್ಲಿ ಹೊಸ ದಾಖಲೆಗಳನ್ನು ರಚಿಸಲಾಗುತ್ತಿದೆ ಎಂದು ಮೋದಿ ಹೇಳಿದರು.