ಢಾಕ: ಬಾಂಗ್ಲಾದೇಶದ ರಾಜಧಾನಿ ಢಾಕಾದಲ್ಲಿ 7 ಅಂತಸ್ತಿನ ಕಟ್ಟಡದಲ್ಲಿ ಸ್ಫೋಟ ಸಂಭವಿಸಿದ್ದು, 100 ಕ್ಕೂ ಹೆಚ್ಚು ಮಂದಿಗೆ ಗಾಯಗಳಾಗಿದ್ದು 15 ಮಂದಿ ಸಾವನ್ನಪ್ಪಿದ್ದಾರೆ.

ಕಚೇರಿ ಒಳಭಾಗದಲ್ಲಿ ಈ ಸ್ಫೋಟ ಸಂಭವಿಸಿದ್ದು,  ಸ್ಫೋಟಕ್ಕೆ ಕಾರಣ ಇನ್ನೂ ತಿಳಿದಿಲ್ಲ. ಆದರೆ ಸ್ಥಳೀಯರ ಪ್ರಕಾರ, ಕಟ್ಟಡದಲ್ಲಿ ಅಕ್ರಮವಾಗಿ ದಾಸ್ತಾನು ಮಾಡಲಾಗಿದ್ದ ರಾಸಾಯನಿಕಗಳಿಂದಾಗಿ ಈ ಸ್ಫೋಟ ಸಂಭವಿಸಿರಬಹುದು ಎನ್ನಲಾಗುತ್ತಿದೆ. ಈ ಬಹುಮಹಡಿ ಕಟ್ಟಡವನ್ನು ಬಹುತೇಕ ಕಚೇರಿ ಹಾಗೂ ಉದ್ಯಮಗಳಿಗಾಗಿ ಬಳಕೆ ಮಾಡಲಾಗುತ್ತಿತ್ತು.
 
ಸ್ಫೋಟದ ತೀವ್ರತೆಗೆ ಗುಲಿಸ್ತಾನದಲ್ಲಿನ ಕಟ್ಟಡದ 5-6 ನೇ ಮಹಡಿಯೂ ಅಲುಗಾಡಿದೆ ಎಂದು ತಿಳಿದುಬಂದಿದೆ.
  
ಈ ಘಟನೆ ನಡೆದಿರುವ ಸ್ಥಳ ಢಾಕಾದ ಸಗಟು ಸರಕುಗಳ ಕೇಂದ್ರವಾಗಿದೆ. ಸ್ಫೋಟದಲ್ಲಿ ಕಟ್ಟಡದ ಗೋಡೆಗಳಿಗೆ ಹಾನಿಯುಂಟಾಗಿದ್ದು, ಗಾಜುಗಳು ಪುಡಿಯಾಗಿರುವುದಷ್ಟೇ ಅಲ್ಲದೇ ರಸ್ತೆಯ ಮತ್ತೊಂದು ಬದಿಯಲ್ಲಿದ್ದ ಬಸ್ ಗೂ ಹಾನಿಯುಂಟಾಗಿದೆ ಎಂದು ವರದಿಗಳ ಮೂಲಕ ತಿಳಿದುಬಂದಿದೆ.