ಪರಿಚಿತ ದೆವ್ವವು ಅಪರಿಚಿತ ದೆವ್ವಕ್ಕಿಂತ ಉತ್ತಮ ಎಂಬ ನಾಣ್ನುಡಿ ಇದೆ. ಇರಾನ್ ವಿರುದ್ಧ ಯುದ್ಧ ಪ್ರಾರಂಭಿಸಿದ 40 ದಿನಗಳ ಬಳಿಕ ಇಸ್ರೇಲ್ ನೀಡಿರುವ ಹೇಳಿಕೆ ಈ ಮಾತನ್ನು ನೆನಪಿಸುವಂತಿದೆ.

ಯಾವ ಖಮೇನಿಯನ್ನು ತಮಗೆ ಅತಿ ದೊಡ್ಡ ಸಮಸ್ಯೆ ಎಂದು ಭಾವಿಸಿ ಇಸ್ರೇಲ್-ಯುಎಸ್ ಆತನನ್ನು ಹತ್ಯೆ ಮಾಡಿಸಿತ್ತೋ ಈಗ ಅದೇ ಇಸ್ರೇಲ್ ಅಯ್ಯೋ ಇರಾನ್ ನಲ್ಲಿ ಹೊಸ ಆಡಳಿತ ಹಳೆಯದ್ದಕ್ಕಿಂತಲೂ ತುಂಬಾ ಕ್ರೂರಿ ಎನ್ನತೊಡಗಿದೆ.

ಇಸ್ರೇಲ್ ಮತ್ತು ಯುಎಸ್ ಇರಾನ್‌ನಲ್ಲಿ ತಮ್ಮ ಮಿಲಿಟರಿ ಕಾರ್ಯಾಚರಣೆಯಿಂದ ಮತ್ತು ಅಯತೊಲ್ಲಾ ಅಲಿ ಖಮೇನಿ ಮತ್ತು ಅವರ ಅಧಿಕಾರಿಗಳನ್ನು ನಿರ್ಮೂಲನೆ ಮಾಡುವುದರಿಂದ ದೊಡ್ಡ ಸಮಸ್ಯೆಯನ್ನು ತಂದಿರುವಂತೆ ತೋರುತ್ತದೆ. ಇಸ್ರೇಲ್ ರಕ್ಷಣಾ ಪಡೆಗಳು (IDF) ಸಂಸತ್ತಿನ ಸಮಿತಿಗೆ ಹೊಸ ಆಡಳಿತವು ಹಿಂದಿನದಕ್ಕಿಂತ "ಹೆಚ್ಚು ತೀವ್ರವಾದುದಾಗಿದೆ" ಎಂದು ಹೇಳಿದೆ. ಸಮಿತಿಯ ಮುಖ್ಯಸ್ಥರು "ಮುಂಬರುವ ದಿನಗಳಲ್ಲಿ" ಯುದ್ಧ ಪುನರಾರಂಭವಾಗಬಹುದು ಎಂದು ಈ ಮೂಲಕ ಸೂಚಿಸಿದ್ದಾರೆ.

ಇಸ್ರೇಲ್‌ನ ಈ ವಿಶ್ಲೇಷಣೆಯು ಕನಿಷ್ಠ ಎರಡು ಅಂಶಗಳಲ್ಲಿ ಸಮಸ್ಯಾತ್ಮಕವಾಗಿದೆ. ಮೊದಲನೆಯದಾಗಿ, ಈ ನಿರಾಶಾದಾಯಕ ಮೌಲ್ಯಮಾಪನವು ಇರಾನ್‌ನಿಂದ ಎದುರಾಗುತ್ತಿರುವ ಅಸ್ತಿತ್ವದ ಬೆದರಿಕೆಯನ್ನು ಎದುರಿಸುತ್ತಿರುವ ಇಸ್ರೇಲ್‌ಗೆ ಇನ್ನೂ ದೊಡ್ಡ ಸಮಸ್ಯೆಯನ್ನು ಉಂಟುಮಾಡುತ್ತದೆ. ಎರಡನೆಯದಾಗಿ, ಮಧ್ಯಪ್ರಾಚ್ಯದ ಯುದ್ಧದಿಂದ ಸ್ವಲ್ಪವಾದರೂ ನೆಮ್ಮದಿ ಸಿಗಲಿ ಎಂಬ ನಿರೀಕ್ಷೆಯಲ್ಲಿ ಜಗತ್ತು ಎರಡು ಸಮಾನಾಂತರ ಶಾಂತಿ ಮಾತುಕತೆಗಳ ಮೇಲೆ ಭರವಸೆ ಇಟ್ಟಿದ್ದ ಸಮಯದಲ್ಲಿ ಇದು ಸಂಭವಿಸಿದೆ. ಈಗ 40 ಕ್ಕೂ ಹೆಚ್ಚು ದಿನಗಳಿಂದ ಮುಂದುವರಿಯುತ್ತಿರುವ ಈ ಯುದ್ಧವು ಇಂಧನ ಮತ್ತು ಪೆಟ್ರೋಕೆಮಿಕಲ್ ಉತ್ಪನ್ನಗಳ ಕೊರತೆಯಿಂದ ಜಗತ್ತಿನ ವ್ಯವಸ್ಥೆಯನ್ನು ಅಸ್ತವ್ಯಸ್ತಗೊಳಿಸಿದೆ.

ಐಡಿಎಫ್ ಪ್ರತಿನಿಧಿಗಳು ನೆಸ್ಸೆಟ್ ವಿದೇಶಾಂಗ ವ್ಯವಹಾರಗಳು ಮತ್ತು ರಕ್ಷಣಾ ಸಮಿತಿಗೆ "ತೀವ್ರ ಕ್ರೂರ" ಇರಾನಿನ ಆಡಳಿತದ ಬಗ್ಗೆ ಮುಚ್ಚಿದ ಬಾಗಿಲಿನ ಗುಪ್ತಚರ ವರದಿಯಲ್ಲಿ ತಿಳಿಸಿದ್ದಾರೆ ಎಂದು ಶುಕ್ರವಾರ ದಿ ಟೈಮ್ಸ್ ಆಫ್ ಇಸ್ರೇಲ್ ಹೇಳಿದೆ.

ಐಡಿಎಫ್ ನೀಡಿದ ಮಾಹಿತಿ ಕುರಿತು ಮೊದಲಾಗಿ ವರದಿ ಮಾಡಿದ i24News ಪ್ರಕಾರ, ಇತ್ತೀಚಿನ ಕಾರ್ಯಾಚರಣೆಗಳ ಫಲಿತಾಂಶ ಹಾಗೂ ಪುನಃ ಸಂಘರ್ಷ ಭುಗಿಲೇಳುವ ಅಪಾಯವನ್ನು ಇಸ್ರೇಲಿ ಅಧಿಕಾರಿಗಳು ಮೌಲ್ಯಮಾಪನ ಮಾಡುತ್ತಿದ್ದರೂ, ನಿರೀಕ್ಷೆಯಿಲ್ಲದಂತಿರುವ ಕಳವಳಕಾರಿ ಅಂದಾಜು ಹೊರಬಂದಿದೆ ಎಂದು ತಿಳಿಸಿದೆ.

ಇಸ್ರೇಲ್ ಟೈಮ್ಸ್‌ನ ಹೀಬ್ರೂ ಆವೃತ್ತಿಗೆ ಮಾತನಾಡಿದ ಎರಡು ಮೂಲಗಳು, ಇತ್ತೀಚಿನ ಇರಾನ್ ಆಡಳಿತದ ಪ್ರಮುಖರು ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್‌ (ಐಆರ್‌ಜಿಸಿ) ನಿಂದ ಬಂದವರಾಗಿದ್ದು, “ಹಿಂದಿನ ರಾಜಕೀಯ ನಾಯಕತ್ವಕ್ಕಿಂತ ಬಹಳ ಹೆಚ್ಚು ಸಿದ್ಧಾಂತಪರವಾಗಿ ಕಠಿಣ ಮನೋಭಾವ ಹೊಂದಿದ್ದಾರೆ” ಎಂದು ತಿಳಿಸಿವೆ. ಈಗ ಇಸ್ರೇಲ್ ಮತ್ತು ಅಮೆರಿಕಾ ಇನ್ನಷ್ಟು “ಅತಿರೇಕಗೊಂಡಿರುವ” ಇರಾನ್ ಆಡಳಿತವನ್ನು ಎದುರಿಸಬೇಕಾದ ಪರಿಸ್ಥಿತಿ ಉಂಟಾಗಿದೆ ಎಂಬುದು ಪರಿಸ್ಥಿತಿಯ ಕ್ರೂರ ವ್ಯಂಗ್ಯವಾಗಿದೆ.

ಐಡಿಎಫ್ ಪ್ರಕಾರ, ಸುಮಾರು 4,000 ಗುರಿಗಳನ್ನು ಹೊಡೆಯಲಾಗಿದೆ. 40 ದಿನಗಳ ಇರಾನ್ ಯುದ್ಧದಲ್ಲಿ ಅಮೆರಿಕ ತನ್ನ ಸೈನಿಕ ಸಂಪತ್ತಿನಲ್ಲಿ ಕೋಟ್ಯಂತರ ಡಾಲರ್‌ಗಳ ನಷ್ಟವನ್ನು ಅನುಭವಿಸಿದೆ. ಅದರ ಇಬ್ಬರು ವಾಯುಸೇನಾ ಸಿಬ್ಬಂದಿಯನ್ನು ಇರಾನ್ ಒಳಗಿನಿಂದಲೇ ಅತ್ಯಂತ ಅಪಾಯಕರ ರಕ್ಷಣಾ ಕಾರ್ಯಾಚರಣೆಯ ಮೂಲಕ ಹೊರತೆಗೆದಿದ್ದಾರೆ.

ಇಷ್ಟು ನಾಶ ಮತ್ತು ಜಗತ್ತಿಗೆ ಉಂಟಾದ ನೋವಿನ ನಂತರವೂ, ಇಸ್ರೇಲ್‌ನ ಮೌಲ್ಯಮಾಪನ ಪ್ರಕಾರ ಈಗ ಅವರಿಗೆ ಇರಾನ್ ನ ಹೊಸ ಆಡಳಿತ ಇನ್ನೂ ದೊಡ್ಡ ತಲೆನೋವು ಎದುರಾಗಿದೆ. ಇಸ್ರೇಲಿ ಮಾಧ್ಯಮಗಳಿಗೆ ಸೋರಿಕೆಯಾದ, ಮುಚ್ಚಿದ ಬಾಗಿಲಿನ ಹಿಂದೆ ನಡೆದ ಬ್ರೀಫಿಂಗ್, ಮಧ್ಯಪ್ರಾಚ್ಯದಲ್ಲಿ ಮತ್ತೆ ಮಾರಕ ದಾಳಿಗಳು ಪುನರಾರಂಭವಾಗುವ ಸೂಚನೆಯನ್ನು ನೀಡುತ್ತಿದೆ. ಇರಾನ್ ವಿಚಾರ ಇನ್ನೂ ಪೂರ್ಣವಾಗಿಲ್ಲ ಎಂದು ಇಸ್ರೇಲ್ ಭಾವಿಸುತ್ತಿದ್ದು, ಕಾರ್ಯಾಚರಣೆಗಳನ್ನು ಮುಂದುವರಿಸಲು ಬಯಸುತ್ತದೆ. “ಮುಂದಿನ ಕೆಲವು ದಿನಗಳಲ್ಲಿ ಯುದ್ಧ ಮತ್ತೆ ಆರಂಭವಾಗುವ ಸಾಧ್ಯತೆ ಇದೆ,” ಎಂದು ವಿದೇಶಾಂಗ ಮತ್ತು ರಕ್ಷಣಾ ಸಮಿತಿಯ ಅಧ್ಯಕ್ಷ ಬೋಜ್ ಬಿಸ್ಮುತ್, ಬ್ರೀಫಿಂಗ್ ನಂತರ i24News ಗೆ ಹೇಳಿದ್ದು, “ನಾವು ಈಗ ಮಧ್ಯಂತರ ಹಂತದಲ್ಲಿದ್ದೇವೆ” ಎಂದು ಕೂಡ ಸೇರಿಸಿದ್ದಾರೆ.

i24News ವರದಿ ಮಾಡಿರುವ ಪ್ರಕಾರ, ಬಿಸ್ಮತ್ ಅವರ ಹೇಳಿಕೆಗಳು ಮಧ್ಯಪ್ರಾಚ್ಯದಲ್ಲಿ ದಾಳಿಗಳಲ್ಲಿನ ವಿರಾಮವು ಹೆಚ್ಚು ಕಾಲ ಉಳಿಯುವುದಿಲ್ಲ ಎಂಬ ಇಸ್ರೇಲ್‌ನ ಭದ್ರತಾ ಸಂಸ್ಥೆಯೊಳಗಿನ ಕಳವಳಗಳನ್ನು ಹೆಚ್ಚಿಸಿವೆ.

ಇರಾನ್ ಮತ್ತು ಯುನೈಟೆಡ್ ಸ್ಟೇಟ್ಸ್ ನಡುವಿನ ಶಾಂತಿ ಮಾತುಕತೆಗಳು ಶನಿವಾರ ಪಾಕಿಸ್ತಾನದಲ್ಲಿ ಪ್ರಾರಂಭವಾಗಲಿವೆ ಎಂದು ಶ್ವೇತಭವನ ತಿಳಿಸಿದೆ. ಯುಎಸ್ ನಿಯೋಗವನ್ನು ಉಪಾಧ್ಯಕ್ಷ ಜೆಡಿ ವ್ಯಾನ್ಸ್, ವಿಶೇಷ ರಾಯಭಾರಿ ಸ್ಟೀವ್ ವಿಟ್ಕಾಫ್ ಮತ್ತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಳಿಯ ಜೇರೆಡ್ ಕುಶ್ನರ್ ನೇತೃತ್ವ ವಹಿಸಲಿದ್ದಾರೆ.

ಇರಾನ್ ತನ್ನ ನಿಯೋಗವನ್ನು ಅಧಿಕೃತವಾಗಿ ಘೋಷಿಸಿಲ್ಲ, ಆದರೆ ಇರಾನ್‌ನ ಸ್ಥಳೀಯ ಮಾಧ್ಯಮ ವರದಿಗಳು ಇದನ್ನು ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಘರ್ ಗಾಲಿಬಾಫ್ ನೇತೃತ್ವ ವಹಿಸಲಿದ್ದಾರೆ ಎಂದು ಹೇಳುತ್ತವೆ.

ಮುಂದಿನ ವಾರ ವಾಷಿಂಗ್ಟನ್‌ನಲ್ಲಿ ಯುಎಸ್ ಮತ್ತು ಇಸ್ರೇಲಿ ಪ್ರತಿನಿಧಿಗಳೊಂದಿಗೆ ಲೆಬನಾನ್ ಸಭೆಯಲ್ಲಿ ಭಾಗವಹಿಸಿ ಕದನ ವಿರಾಮವನ್ನು ಚರ್ಚಿಸಲಿದೆ ಮತ್ತು ಘೋಷಿಸಲಿದೆ ಎಂದು ಲೆಬನಾನಿನ ಹಿರಿಯ ಅಧಿಕಾರಿಯೊಬ್ಬರು ಸುದ್ದಿ ಸಂಸ್ಥೆ ರಾಯಿಟರ್ಸ್‌ಗೆ ತಿಳಿಸಿದ್ದಾರೆ.

ಮಾರ್ಚ್ 9 ರಂದು, ಇರಾನ್ ಮೃತ ಖಮೇನಿಯ ಎರಡನೇ ಪುತ್ರ ಪ್ರಭಾವಿ ಮಧ್ಯಮ ಶ್ರೇಣಿಯ ಧರ್ಮಗುರು ಮೊಜ್ತಾಬಾ ಖಮೇನಿ ಅವರನ್ನು ಇಸ್ಲಾಮಿಕ್ ಗಣರಾಜ್ಯದ ಹೊಸ ಸುಪ್ರೀಂ ನಾಯಕರಾಗಿ ಸರ್ವಾನುಮತದಿಂದ ಆಯ್ಕೆ ಮಾಡಿತು.