ವಾಷಿಂಗ್ಟನ್/ನವದೆಹಲಿ: ಭಾರತ ಮತ್ತು ಪಾಕಿಸ್ತಾನ ಯುದ್ಧ ನಿಲ್ಲಿಸಿದ್ದು ನಾನೇ ಎಂಬ ತಮ್ಮ ಹೇಳಿಕೆಯನ್ನು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮತ್ತೆ ಪುನರುಚ್ಛರಿಸಿದ್ದಾರೆ.

ನ್ಯಾಷನಲ್ ಪ್ರೇಯರ್ ಬ್ರೇಕ್‌ಫಾಸ್ಟ್ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಟ್ರಂಪ್, ನಾನು ಒಂದು ವರ್ಷದೊಳಗೆ ಎಂಟು ಉಗ್ರ ಯುದ್ಧಗಳನ್ನು ಕೊನೆಗೊಳಿಸಿದ್ದೇನೆ ಎಂದು ಹೇಳಿ, ಕಾಂಬೋಡಿಯಾ–ಥೈಲ್ಯಾಂಡ್, ಕೊಸೊವೊ–ಸರ್ಬಿಯಾ, ಅರ್ಮೇನಿಯಾ–ಅಜರ್ಬೈಜಾನ್, ಇಸ್ರೇಲ್-ಇರಾನ್, ಹಾಗೂ ಭಾರತ–ಪಾಕಿಸ್ತಾನ ನಡುವಿನ ಸಂಘರ್ಷಗಳೆಂದು ಪಟ್ಟಿ ಮಾಡಿದ್ದಾರೆ.

ಅಲ್ಲದೆ, ಸಾಮಾಜಿಕ ಜಾಲತಾಣ ಟ್ರೂತ್ ನಲ್ಲೂ ಪೋಸ್ಟ್ ಮಾಡಿರುವ ಅವರು, ಭಾರತ ಮತ್ತು ಪಾಕಿಸ್ತಾನದ ನಡುವೆ ನಡೆಯುತ್ತಿದ್ದ ಪರಮಾಣು ಯುದ್ಧ ನಿಲ್ಲಿಸಿದ್ದು ನಾನು ಎಂದು ಹೇಳಿಕೆಯನ್ನು ಪುನರುಚ್ಚರಿಸಿದ್ದಾರೆ.

ಅಮೆರಿಕ ವಿಶ್ವದ ಅತ್ಯಂತ ಶಕ್ತಿಶಾಲಿ ರಾಷ್ಟ್ರ. ನನ್ನ ಮೊದಲ ಅವಧಿಯಲ್ಲಿ ಸೈನ್ಯವನ್ನು ಸಂಪೂರ್ಣವಾಗಿ ಪುನರ್ ನಿರ್ಮಿಸಿದ್ದೇನೆ. ಸ್ಪೇಸ್ ಫೋರ್ಸ್ ಸ್ಥಾಪಿಸಿದ್ದೇನೆ. ಈಗಲೂ ಇತಿಹಾಸದಲ್ಲೇ ಎಂದೂ ಕಾಣದ ಮಟ್ಟದಲ್ಲಿ ಸೈನ್ಯವನ್ನು ಬಲಪಡಿಸುತ್ತಿದ್ದೇನೆ. 2ನೇ ಮಹಾಯುದ್ಧದ ಕಾಲದ ಯುದ್ಧನೌಕೆಗಳಿಗಿಂತ ನೂರು ಪಟ್ಟು ಹೆಚ್ಚು ಶಕ್ತಿಯುತ ಯುದ್ಧನೌಕೆಗಳನ್ನು ಸೇರಿಸುತ್ತಿದ್ದೇನೆ. ನಾನು ಪಾಕಿಸ್ತಾನ–ಭಾರತ, ಇರಾನ್–ಇಸ್ರೇಲ್ ಮತ್ತು ರಷ್ಯಾ–ಉಕ್ರೇನ್ ನಡುವಿನ ಅಣುಯುದ್ಧಗಳನ್ನು ತಡೆದಿದ್ದೇನೆಂದು ಹೇಳಿದ್ದಾರೆ.

ಸಾರ್ವಜನಿಕ ಭಾಷಣಗಳು ಮತ್ತು ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಡೊನಾಲ್ಡ್ ಟ್ರಂಪ್ ಅವರು ಈವರೆಗೂ 90 ಕ್ಕೂ ಹೆಚ್ಚು ಬಾರಿ ಈ ಹೇಳಿಕೆಯನ್ನು ನೀಡಿದ್ದಾರೆ. ಆದರೆ, ಮೂರನೇ ರಾಷ್ಟ್ರದ ಮಧ್ಯಸ್ಥಿಕೆಯನ್ನು ಭಾರತ ನಿರಾಕರಿಸುತ್ತಲೇ ಬಂದಿದೆ.