ಜೆರುಸಲೆಮ್ (ಇಸ್ರೇಲ್): ಇಸ್ರೇಲ್ ಸಾರ್ವತ್ರಿಕ ಚುನಾವಣೆಯ ಮತ ಎಣಿಕೆ ಬಹುತೇಕ ಪೂರ್ಣಗೊಂಡಿದ್ದು, ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಬಣವಾಗಲಿ ಅಥವಾ ಗಾಡಿ ಐಸೆನ್‌ಕೋಟ್ ನೇತೃತ್ವದ ವಿರೋಧ ಪಕ್ಷದ ಒಕ್ಕೂಟವಾಗಲಿ ಸ್ಪಷ್ಟ ಬಹುಮತ ಪಡೆದಿಲ್ಲ. ಹಾಗಾಗಿ, ಅಧಿಕಾರ ಹಿಡಿಯಲು ಅಥವಾ ಸಮ್ಮಿಶ್ರ ಸರಕಾರ ರಚಿಸಲು ಪಕ್ಷಗಳ ನಡುವೆ ಮುಂದಿನ ವಾರಗಳಲ್ಲಿ ತೀವ್ರ ರಾಜಕೀಯ ಚೌಕಾಶಿ ನಡೆಯುವ ಸಾಧ್ಯತೆಯಿದೆ. ಆ ಕುರಿತ ವರದಿ ಇಲ್ಲಿದೆ:

ಯಾರಿಗೆ ಎಷ್ಟು ಸ್ಥಾನ?

ಇಸ್ರೇಲ್‌ನ ಸೆಂಟ್ರಲ್ ಎಲೆಕ್ಷನ್ಸ್ ಕಮಿಟಿ ಪ್ರಕಟಿಸಿರುವ ತಾತ್ಕಾಲಿಕ ಫಲಿತಾಂಶಗಳ ಪ್ರಕಾರ,

• ನೆತನ್ಯಾಹು ನೇತೃತ್ವದ ಮೈತ್ರಿಕೂಟ: ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ಲಿಕುಡ್ ಪಕ್ಷ ಮತ್ತು ಅವರ ಮಿತ್ರಪಕ್ಷಗಳ ಬಲಪಂಥೀಯ ಒಕ್ಕೂಟವು ಒಟ್ಟು 53 ಸ್ಥಾನಗಳನ್ನು ಗಳಿಸಿದೆ. ನೆತನ್ಯಾಹು ಅವರ ಲಿಕುಡ್ ಪಕ್ಷವು 27 ಸ್ಥಾನಗಳೊಂದಿಗೆ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ.

• ವಿರೋಧ ಪಕ್ಷಗಳ ಮೈತ್ರಿಕೂಟ: ಮಾಜಿ ಸೇನಾ ಮುಖ್ಯಸ್ಥ ಗಾಡಿ ಐಸೆನ್‌ಕೋಟ್ ನೇತೃತ್ವದ ಯಾಶರ್ ಪಕ್ಷ ಹಾಗೂ ಅವರ ಒಕ್ಕೂಟದ ವಿರೋಧ ಪಕ್ಷಗಳು ಒಟ್ಟು 48 ಸ್ಥಾನಗಳನ್ನು ಗೆದ್ದುಕೊಂಡಿವೆ. ಯಾಶರ್ ಪಕ್ಷವು 21 ಸ್ಥಾನಗಳನ್ನು ಪಡೆದಿದೆ.

• ಅರಬ್ ಪಕ್ಷಗಳ ಐತಿಹಾಸಿಕ ಸಾಧನೆ: ಜಾಯಿಂಟ್ ಲಿಸ್ಟ್ ಮತ್ತು ರಾಮ್ ಸೇರಿದಂತೆ ಅರಬ್ ಮೂಲದ ಪಕ್ಷಗಳು ಒಟ್ಟಾಗಿ ದಾಖಲೆಯ 19 ಸ್ಥಾನಗಳನ್ನು ಗೆಲ್ಲುವ ಮೂಲಕ ಇಸ್ರೇಲ್ ರಾಜಕಾರಣದಲ್ಲಿ ನಿರ್ಣಾಯಕ ಶಕ್ತಿಯಾಗಿ ಹೊರಹೊಮ್ಮಿವೆ.

ಒಟ್ಟು ಮತದಾನ: ಅಕ್ಟೋಬರ್ 27 ರಂದು ನಡೆದ ಈ ಚುನಾವಣೆಯಲ್ಲಿ ಸಾರ್ವಜನಿಕರು ಭಾರಿ ಪ್ರಮಾಣದಲ್ಲಿ ಭಾಗವಹಿಸಿದ್ದು, ಸುಮಾರು ಶೇ. 78 ರಷ್ಟು ದಾಖಲೆಯ ಮತದಾನವಾಗಿತ್ತು. 2023ರ ಅಕ್ಟೋಬರ್ 7ರ ಹಮಾಸ್ ದಾಳಿ ಮತ್ತು ಆನಂತರ ನಡೆದ ಯುದ್ಧಗಳ ಬಳಿಕ ನಡೆದ ಮೊದಲ ಸಾರ್ವತ್ರಿಕ ಚುನಾವಣೆ ಇದಾಗಿದೆ.

ಹಾಗಾದ್ರೆ, ಮುಂದೇನು?

ಇಸ್ರೇಲ್ ಚುನಾವಣಾ ನಿಯಮಗಳ ಪ್ರಕಾರ, ನವೆಂಬರ್ 4 ರಂದು ಅಧಿಕೃತ ಅಂತಿಮ ಫಲಿತಾಂಶಗಳನ್ನು ಅಧ್ಯಕ್ಷ ಐಸಾಕ್ ಹೆರ್ಜಾಗ್ ಅವರಿಗೆ ಸಲ್ಲಿಕೆ ಮಾಡಲಾಗುತ್ತದೆ. ಆ ಬಳಿಕ ಅಧ್ಯಕ್ಷರು ವಿವಿಧ ಪಕ್ಷಗಳೊಂದಿಗೆ ಸಮಾಲೋಚನೆ ನಡೆಸಿ, ಸರ್ಕಾರ ರಚಿಸಲು ಅರ್ಹವಿರುವ ನಾಯಕರಿಗೆ ಆಹ್ವಾನ ನೀಡಲಿದ್ದಾರೆ. ಯಾವುದೇ ಪಕ್ಷಕ್ಕೂ ಬಹುಮತವಿಲ್ಲದ ಕಾರಣ ಮುಂಬರುವ ದಿನಗಳಲ್ಲಿ ತೀವ್ರ ರಾಜಕೀಯ ಕುದುರೆ ವ್ಯಾಪಾರ ಮತ್ತು ಮೈತ್ರಿ ಮಾತುಕತೆಗಳು ನಡೆಯಲಿವೆ. ಒಂದು ವೇಳೆ ಸರ್ಕಾರ ರಚನೆಯ ಪ್ರಯತ್ನಗಳು ವಿಫಲವಾದರೆ, ಇಸ್ರೇಲ್ ಮುಂದಿನ ವರ್ಷದ ಆರಂಭದಲ್ಲಿ ಮತ್ತೊಮ್ಮೆ ಸಾರ್ವತ್ರಿಕ ಚುನಾವಣೆಯನ್ನು ಎದುರಿಸಬೇಕಾಗಬಹುದು.