ಬೆಂಗಳೂರು: ಗ್ಲೋಬಲ್ ಎಡ್ಜ್ ಸಾಫ್ಟ್‌ವೇರ್ ಸಂಸ್ಥೆ ಡಿಯರ್‌ಬಾರ್ನ್ ಎಲೆಕ್ಟ್ರಾನಿಕ್ಸ್ ಸಂಸ್ಥೆಯನ್ನು ಸ್ವಾಧೀನಕ್ಕೆ ಪಡೆಯುವ ಬಗ್ಗೆ ಒಪ್ಪಂದ ಮಾಡಿಕೊಂಡಿದೆ.
ಗ್ಲೋಬಲ್ ಎಡ್ಜ್ ಸಾಫ್ಟ್‌ವೇರ್ ಅಧ್ಯಕ್ಷ ಎಂ.ಪಿ.ಕುಮಾರ್ ಅವರು ನಗರದಲ್ಲಿ ಮಂಗಳವಾರ ಕರೆದ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದರು.
ಗ್ಲೋಬಲ್ ಎಡ್ಜ್ ಸಾಫ್ಟ್‌ವೇರ್ ಸಂಸ್ಥೆಯು ಡಿಯರ್‌ಬಾರ್ನ್ ಸಂಸ್ಥೆಯ ಶೇ. 100ರಷ್ಟು ಷೇರುಗಳನ್ನು ಪಡೆದುಕೊಳ್ಳುವ ಒಪ್ಪಂದಕ್ಕೆ ಸಹಿ ಮಾಡಿದ್ದು, ಆ ಕುರಿತ ಎಲ್ಲ ಕಾನೂನು ಪ್ರಕ್ರಿಯೆಗಳು ಇನ್ನೆರಡು ತಿಂಗಳಲ್ಲಿ ಮುಗಿಯಲಿವೆ. ಆದರೆ, ಆ ಬಳಿಕ ಗ್ಲೋಬಲ್ ಎಡ್ಜ್ ಸಾಫ್ಟ್‌ವೇರ್‌ನ ಅಂಗಸಂಸ್ಥೆಯಾಗುವ ಡಿಯರ್‌ಬಾರ್ನ್ ಪ್ರತ್ಯೇಕವಾಗಿ ತನ್ನ ಅಸ್ತಿತ್ವ ಮುಂದುವರಿಸಿಕೊಂಡು ಹೋಗಲಿದೆ ಎಂದು ಅವರು ತಿಳಿಸಿದರು.
ಸಂಸ್ಥೆಯ ಈ ನಿರ್ಧಾರ ಆಟೋಮೋಟಿವ್ ಎಲೆಕ್ಟ್ರಾನಿಕ್ಸ್ ಹಾಗೂ ಇಂಡಸ್ಟ್ರಿಯಲ್ ಆಟೋಮೇಷನ್ ಸ್ಥಾಪಿತ ವ್ಯವಸ್ಥೆಗಳಲ್ಲಿ ಗ್ಲೋಬಲ್ ಎಡ್ಜ್ ಸಾಫ್ಟ್‌ವೇರ್‌ನ ಕೇಂದ್ರಿತ ಗಮನ ಬಲಪಡಿಸಲು ನೆರವಾಗಲಿದೆ. ಪ್ರಸ್ತುತ ಎರಡೂ ಸಂಸ್ಥೆಯ ಒಟ್ಟಾರೆ ಆದಾಯ ರು. 85 ಕೋಟಿಯಿದ್ದು, ಮುಂದಿನ 3 ವರ್ಷದಲ್ಲಿ ಆ ಆದಾಯವನ್ನು ರು. 200 ಕೋಟಿಯಾಗಿಸುವ ಗುರಿ ಇದೆ. ಎರಡೂ ಸಂಸ್ಥೆಯಲ್ಲಿ ಒಟ್ಟು 600 ಉದ್ಯೋಗಿಗಳಿದ್ದು, ಮುಂದೆ 250-300 ಜನರನ್ನು ನೇಮಿಸಿಕೊಳ್ಳುವ ಉದ್ದೇಶವೂ ಇದೆ ಎಂದು ಅವರು ತಿಳಿಸಿದರು. ಡಿಯರ್‌ಬಾರ್ನ್‌ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಆನಂದ್ ಮುತಾಲಿಕ್ ಹಾಜರಿದ್ದರು.
