12,000 ಕೋಟಿ ರೂ ಮೊತ್ತದ 15 ಎಫ್ ಡಿಐ ಪ್ರಸ್ತಾವನೆಗಳಿಗೆ ಒಪ್ಪಿಗೆ

ನವದೆಹಲಿ: ಮುಖ್ಯ ಆರ್ಥಿಕ ಕಾರ್ಯದರ್ಶಿ ಶಕ್ತಿಕಾಂತ್ ದಾಸ್ ನೇತೃತ್ವದ ವಿದೇಶಿ ಹೂಡಿಕೆ ಉತ್ತೇಜನ ಮಂಡಳಿ (ಎಫ್‍ಐಪಿಬಿ) 12,000 ಕೋಟಿ ರೂ ಮೊತ್ತದ 15 ಎಫ್ ಡಿಐ ಪ್ರಸ್ತಾವನೆಗಳಿಗೆ ಒಪ್ಪಿಗೆ ನೀಡಿದೆ. 

ಒಟ್ಟು 24 ಎಫ್ ಡಿಐ ಪ್ರಸ್ತಾವನೆಗಳ ಪೈಕಿ 15 ಎಫ್ ಡಿಐ ಪ್ರಸ್ತಾವನೆಗಳಿಗೆ ವಿದೇಶಿ ಹೂಡಿಕೆ ಉತ್ತೇಜನ ಮಂಡಳಿ(ಎಫ್ಐಪಿಬಿ) ಒಪ್ಪಿಗೆ ನೀಡಿದೆ. ಅಪೋಲೋ ಹಾಸ್ಪಿಟಲ್ಸ್, ಹಿಂದೂಸ್ಥಾನ್ ಏರೋನಾಟಿಕ್ಸ್, ಡಾ. ರೆಡ್ಡೀಸ್ ಹಾಗೂ ವೊಡಾಫೋನ್ ಸಂಸ್ಥೆಗಳಲ್ಲಿ ಒಪ್ಪಿಗೆ ಸೂಚಿಸಲಾಗಿರುವ 15 ಪ್ರಸ್ತಾವನೆಗಳು ಬಂಡವಾಳ ಹೂಡಿಕೆ ಮಾಡಲಿವೆ. 

8,800 ಕೋಟಿಯಷ್ಟು ಬಂಡವಾಳ ಹೂಡಲಿದ್ದ ಗ್ಲಾಂಡ್ ಫಾರ್ಮಾದ ಪ್ರಸ್ತಾವನೆಯೂ ಸೇರಿ 6 ಪ್ರಸ್ತಾವನೆಗಳಿಗೆ ಎಫ್ಐಪಿಬಿ ಒಪ್ಪಿಗೆ ಸೂಚಿಸಿಲ್ಲ. ಅಪೋಲೋ ಆಸ್ಪತ್ರೆಗೆ 750 ಕೋಟಿ ರೂ, ಹಿಂದೂಸ್ಥಾನ್ ಏರೋನಾಟಿಕ್ಸ್ ಗೆ 170 ಕೋಟಿ ರೂಪಾಯಿ ವಿದೇಶಿ ಬಂಡವಾಳ ಹರಿದುಬರಲಿದೆ. 

2017-18 ರ ಬಜೆಟ್ ನಲ್ಲಿ ವಿತ್ತ ಸಚಿವ ಅರುಣ್ ಜೇಟ್ಲಿ ಎಫ್ ಡಿಐ ವ್ಯವಸ್ಥೆಯನ್ನು ರದ್ದುಗೊಳಿಸಿ, ಉದ್ಯಮ ಸ್ಥಾಪನೆಯನ್ನು ಮತ್ತಷ್ಟು ಸರಳೀಕರಣಗೊಳಿಸಲು ಹೊಸ ವ್ಯವಸ್ಥೆಯನ್ನು ಜಾರಿಗೊಳಿಸುವುದಾಗಿ ಹೇಳಿದ್ದರು. ಪ್ರಸ್ತುತ ಭಾರತದಲ್ಲಿ ಎಫ್ಐಪಿಬಿ ಏಕಗವಾಕ್ಷಿ ಪದ್ಧಯ ಮೂಲಕ ಎಫ್ ಡಿಐ ಅರ್ಜಿಗಳನ್ನು ಇತ್ಯರ್ಥಗೊಳಿಸುತ್ತದೆ. ಆಟೋಮಾಟಿಕ್ ರೂಟ್ ವ್ಯಾಪ್ತಿಯಲ್ಲಿ ಬರುವ ಹಲವು ಕ್ಷೇತ್ರಗಳಿಗೆ ಹೂಡಿಕೆ ಮಾಡಲು ಎಫ್‍ಐಪಿಬಿ ಒಪ್ಪಿಗೆ ಇಲ್ಲದೇ ನೇರವಾಗಿ ಬಂಡವಾಳ ಹೂಡಿಕೆ ಮಾಡಬಹುದಾಗಿದೆ.