ಶಮಿತಾಬ್: ತೆರೆಯ ಮೇಲೆ ಒಂದಾಗದ ಬಿಗ್ ಬಿ-ರೇಖಾ

ಮುಂಬೈ: ವಿಖ್ಯಾತ ಬೆಳ್ಳಿತೆರೆ ಜೋಡಿ, ಅಮಿತಾಬ್ ಬಚ್ಚನ್ ಮತ್ತು ರೇಖಾ ಕೊನೆಯ ಬಾರಿ ಒಟ್ಟಿಗೆ ಕಾಣಿಸಿಕೊಂಡಿದ್ದು ಯಶ್ ಚೋಪ್ರಾ ಅವರ 'ಸಿಲ್ಸಿಲಾ' ಸಿನೆಮಾದಲ್ಲಿ. ಈಗ ೩೩ ವರ್ಷದ ನಂತರ ಶಮಿತಾಬ್ ಚಿತ್ರದಲ್ಲಿ ಇಬ್ಬರೂ ನಟಿಸುತ್ತಿದ್ದಾರೆ.

ಆರ್ ಭಾಲ್ಕಿ ನಿರ್ದೇಶನದ ಈ ಸಿನೆಮಾದಲ್ಲಿ ನಟ ಧನುಶ್ ಕೂಡ ಕಾಣಿಸಿಕೊಳ್ಳಲಿದ್ದಾರೆ. ಆದರೆ ತೆರೆಯಲ್ಲಿ ಅವರು ಒಟ್ಟಿಗೆ ಕಾಣಿಸಿಕೊಳ್ಳುವ ದೃಶ್ಯಗಳಿಲ್ಲ ಎಂದು ಅಮಿತಾಬ್ ಸಿನೆಮಾದ ಟ್ರೇಲರ್ ಬಿಡುಗಡೆಯಲ್ಲಿ ತಿಳಿಸಿದ್ದಾರೆ. "ನಾವು ಒಟ್ಟಿಗೆ ಕಾಣಿಸಿಕೊಳ್ಳುವುದಿಲ್ಲ... ಇದು ಪ್ರಸಂಗದ ಒಂದು ಭಾಗ ಹಾಗೂ ನೀವು ಸಿನೆಮಾ ನೋಡಿದಾಗ ತಿಳಿಯುತ್ತದೆ ಇದನ್ನು ಹೇಗೆ ವಿಭಿನ್ನವಾಗಿ ಬಿಂಬಿಸಲಾಗಿದೆ. ಆದರೆ ಇಂತಹ ಪ್ರಖ್ಯಾತ ತಾರೆಗಳನ್ನು ಸಿನೆಮಾದಲ್ಲಿ ಆಹ್ವಾನಿಸುವುದೇ ಸಂಭ್ರಮ" ಎಂದಿದ್ದಾರೆ. ಇಬ್ಬರೂ ಮತ್ತೆ ಜೋಡಿಯಾಗಿ ನಟಿಸುವುದನ್ನು ಮುದೊಂದು ದಿನ ನೋಡಬಹುದೇ ಎಂಬ ಪ್ರಶ್ನೆಗೆ ಅಮಿತಾಬ್ ಅವರು "ನಮ್ಮಿಬ್ಬರನ್ನೂ (ಬಿಗ್ ಬಿ ಮತ್ತು ರೇಖಾ) ಒಟ್ಟಿಗೆ ಹಾಕಿಕೊಂಡು ಸಿನೆಮಾ ಮಾಡುವುದಕ್ಕೆ ಭಾಲ್ಕಿ ಯಾವಾಗಲೂ ಆಸಕ್ತಿ ತೋರಿದ್ದಾರೆ ಆದರೆ ಯಾರಾದರೂ ಆಸಕ್ತಿದಾಯಕ ಸ್ಕ್ರಿಪ್ಟ್ ಬರೆಯುತ್ತಾರಾ ಕಾದು ನೋಡಬೇಕು.. ಯಾಕಾಗಬಾರದು?" ಎಂದು ಪ್ರತಿಕ್ರಿಯಿಸಿದ್ದಾರೆ.

೭೦ ಮತ್ತು ೮೦ರ ದಶಕದಲ್ಲಿ ಈ ಜೋಡಿ ಹಲವಾರು ಸೂಪರ್ ಹಿಟ್ ಚಿತ್ರಗಳನ್ನು ನೀಡಿತ್ತು.