ಮುಂಬೈ: ಶನಿವಾರಕ್ಕೆ ೩೩ ವಸಂತಗಳನ್ನು ಪೂರೈಸಿದ ಬಾಲಿವುಡ್ ನಟಿ ಪ್ರಿಯಾಂಕ ಛೋಪ್ರಾಳಿಗೆ ಆಶ್ಚರ್ಯ ಕಾದಿತ್ತು. ಅವರ ತಾಯಿ ಮಧು ಮಗಳಿಗಾಗಿ ಅಚ್ಚರಿ ಔತಣವೊಂದನ್ನು ಆಯೋಜಿಸಿದ್ದರು. ಇದರಿಂದ ಆಶ್ಚರ್ಯಚಕಿತಳಾದೆ ಎಂದು ಪ್ರಿಯಾಂಕ ಹೇಳಿಕೊಂಡಿದ್ದಾರೆ.
"ನಾನು 'ಬಾಜಿರಾವ್ ಮಸ್ತಾನಿ' ಚಿತ್ರೀಕರಣದಲ್ಲಿ ನಿರತಳಾಗಿದ್ದೆ, ಮತ್ತು ನಮ್ಮಮ್ಮ ಆಯೋಜಿಸಿರುವ ಯಾವುದೇ ಔತಣಕೂಟದ ಬಗ್ಗೆ ನನಗೆ ಸುಳಿವಿರಲಿಲ್ಲ. ನನ್ನೆಲ್ಲಾ ಗೆಳೆಯ ಗೆಳತಿಯರು ಬಂದಿದ್ದರು ನನಗೆ ಆಶ್ಚರ್ಯವಾಯಿತು. ನನಗೆ ಅತೀವ ಸಂತಸವಾಗುತ್ತಿದೆ ಮತ್ತು ನನ್ನೆಲ್ಲಾ ಗೆಳೆಯರಿಗೆ ಧನ್ಯವಾದಗಳು" ಎಂದು ಪ್ರಿಯಾಂಕ ಹೇಳಿದ್ದಾರೆ.
ನಟಿ ಪ್ರಿಯಾಂಕ ಈಗ 'ಗಂಗಾಜಲ್-೨', 'ಬಾಜಿರಾವ್ ಮಸ್ತಾನಿ' ಮತ್ತು ಅಮೇರಿಕದ ಧಾರಾವಾಹಿ 'ಕ್ವಾಂಟಿಕೋ' ಚಿತ್ರೀಕರಣದಲ್ಲಿ ನಿರತರಾಗಿದ್ದಾರೆ.
ಅಲ್ಲದೆ ಅವರು ಹೊಸ ಮನೆಗೆ ಕೂಡ ತೆರಳುತ್ತಿದ್ದಾರೆ. "ನಾವು ಮನೆ ಬದಲಿಸುತ್ತಿದ್ದೇವೆ ಆದರೆ ಅದು 'ಕ್ವಾಂಟಿಕೋ' ಚಿತ್ರೀಕರಣದ ನಂತರ" ಎಂದು ರಾಷ್ಟ್ರೀಯ ಪ್ರಶಸ್ತಿ ವಿಜೇತೆ ತಿಳಿಸಿದ್ದಾರೆ.
ಆಹ್ವಾನಿತರಿಗಷ್ಟೇ ಆಹ್ವಾನವಿದ್ದ ಈ ಔತಣಕೂತಕ್ಕೆ ಬಂದಿದ್ದ ಅವರ ದಾಯಾದಿ ಸಹೋದರಿ ಪರಿಣಿತಿ ಛೋಪ್ರಾ ಫೋಟೋ ಟ್ವೀಟ್ ಮಾಡಿ, ಔತಣಕೂಟವನ್ನು ಪ್ರಶಂಸಿಸಿದ್ದಾರೆ.
ಸಂಜಯ್ ಲೀಲಾ ಬನ್ಸಾಲಿ, ವಿಶಾಲ್ ಭಾರದ್ವಾಜ್, ವಿಕಾಸ್ ಭಾಲ್, ರಿತೇಶ್ ದೇಶಮುಖ್, ಜೆನೆಲಿಯ ಡಿಸೋಜಾ, ಕಂಗನ ರನೌತ್, ರಣವೀರ್ ಸಿಂಗ್, ಅನುರಾಗ್ ಕಶ್ಯಪ್, ಕ್ರಿಶಿಕಾ ಲುಲ್ಲ ಮುಂತಾದವರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾರೆ.
Advertisement