ನಟಿ ನಂದಿತಾ ದಾಸ್ ಅವರು ತಮ್ಮ ಪತಿ ಉದ್ಯಮಿ ಹಾಗೂ ನಟ ಸುಬೋಧ್ ಮಸ್ಕರ ಅವರೊಂದಿಗೆ ಏಳು ವರ್ಷಗಳ ದಾಂಪತ್ಯ ಜೀವನದಿಂದ ಪ್ರತ್ಯೇಕವಾಗಲು ನಿರ್ಧರಿಸಿರುವುದಾಗಿ ಸೋಮವಾರ ಹೇಳಿಕೊಂಡಿದ್ದಾರೆ.
ಪರಸ್ಪರ ಒಪ್ಪಿಗೆಯಿಂದ ನಾನು ಮತ್ತು ಸುಬೋಧ್ ಬೇರೆಯಾಗಲು ನಿರ್ಧರಿಸಿದ್ದು, ನಮ್ಮ ಮಗನ ಭವಿಷ್ಯಕ್ಕೆ ಮೊದಲ ಆದ್ಯತೆ ನೀಡಲಾಗುವುದು ಎಂದು ಹೇಳಿದ್ದಾರೆ.
'ಮಗನ ಭವಿಷ್ಯ ನಮ್ಮಿಬ್ಬರ ಮೊದಲ ಆದ್ಯತೆಯಾಗಿದ್ದು, ಅವನ ಯೋಗಕ್ಷೇಮಕ್ಕೆ ನಾವು ಬದ್ಧರಾಗಿದ್ದೇವೆ ಮತ್ತು ಇದೇ ವೇಳೆ ನಮ್ಮ ಖಾಸಗಿತನವನ್ನು ಗೌರವಿಸುವ ವಿಶ್ವಾಸವಿದೆ' ನಟಿ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ನಂದಿತಾ ಅವರು 2002ರಲ್ಲಿ ಮೊದಲ ಬಾರಿಗೆ ಸೌಮ್ಯ ಸೇನ್ ಅವರೊಂದಿಗೆ ವಿವಾಹವಾಗಿದ್ದರು. ನಂತರ 2007ರಲ್ಲಿ ಅವರಿಗೆ ವಿಚ್ಛೇದನ ನೀಡಿ, 2010ರಲ್ಲಿ ಸುಬೋಧ್ ಅವರೊಂದಿಗೆ ಎರಡನೇ ಮದುವೆಯಾಗಿದ್ದರು. ಈ ದಂಪತಿಗೆ ಆರು ವರ್ಷದ ವಿಹಾನ್ ಎಂಬ ಮಗನಿದ್ದಾನೆ.
