ಕೊರೋನಾಗೆ ಬಲಿಯಾದ ಬಾಲಿವುಡ್ ಸಂಗೀತ ನಿರ್ದೇಶಕ ವಾಜಿದ್ ಖಾನ್ ತಾಯಿಗೆ ಪಾಸಿಟಿವ್, ಆಸ್ಪತ್ರೆಗೆ ದಾಖಲು

ಮುಂಬೈ: ನಿನ್ನೆಯಷ್ಟೇ ಕೊರೋನಾ ವೈರಸ್ ನಿಂದ ಮೃತಪಟ್ಟ ಬಾಲಿವುಡ್ ನ ಸಂಗೀತ ನಿರ್ದೇಶಕ ಮತ್ತು ಗಾಯಕ ವಾಜಿದ್ ಖಾನ್ ಅವರ ತಾಯಿಗೆ ಈಗ ಮಹಾಮಾರಿ ವಕ್ಕರಿಸಿದ್ದು, ಮಂಗಳವಾರ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ವಾಜಿದ್ ಖಾನ್ ತಾಯಿ ರಜಿನಾ ಖಾನ್ ಹಾಗೂ ಅವರ ಮನೆಗೆಲಸದಾಕೆಗೆ ಕೊವಿಡ್-19 ಪಾಸಿಟಿವ್ ದೃಢಪಟ್ಟಿದ್ದು, ಇಬ್ಬರನ್ನು ಸುರನಾ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಅವರ ಸಂಬಂಧಿ ಶದಬ್ ಫರಿದಿ ಅವರು ಹೇಳಿದ್ದಾರೆ.

42 ವರ್ಷದ ವಾಜಿದ್ ಖಾನ್ ಅವರು ನಿನ್ನೆ ಬೆಳಗಿನ ಜಾವ ಮುಂಬೈನ ಖಾಸಗಿ ಆಸ್ಪತ್ರೆಯಲ್ಲಿ ಮೃತರಾದರು. ಅವರಿಗೆ ಕೊರೋನಾ ಸೋಂಕು ದೃಢವಾಗಿತ್ತು, ಜೊತೆಗೆ ಮೂತ್ರಪಿಂಡ ಸೋಂಕಿನಿಂದ ಬಳಲುತ್ತಿದ್ದರು.

ಇದೀಗ ವಾಜಿದ್ ಖಾನ್ ಅವರ ತಾಯಿ ಅವರಿಗೂ ಕೊರೋನಾ ವೈರಸ್ ಪಾಸಿಟಿವ್ ಪತ್ತೆಯಾಗಿದೆ. ತಮ್ಮ ಮಗ ವಾಜಿದ್ ಖಾನ್‌ ಗೆ ಆರೋಗ್ಯ ಸರಿಯಿಲ್ಲದಾಗ ಅವರನ್ನು ನೋಡಿಕೊಳ್ಳಲೆಂದು ತಾಯಿ ರಜಿನಾ ಖಾನ್ ಆಸ್ಪತ್ರೆಯಲ್ಲಿಯೇ ಉಳಿದಿದ್ದರು. ಹಾಗಾಗಿ ಅವರಿಗೂ ಸೋಂಕು ತಗುಲಿದೆ.