ಬೆಂಗಳೂರು: ಕನ್ನಡದ ಚಿತ್ರರಂಗದಲ್ಲಿ ಇತಿಹಾಸ ಬರೆದ ಥ್ರಿಲ್ಲರ್ ಸಿನೆಮಾ 'ಶ್!' ಮತ್ತೆ ತೆರೆಗೆ ಬರಲಿದೆ. ಉಪೇಂದ್ರ ನಿರ್ದೇಶನದ 'ಓಂ' ಚಿತ್ರಮಂದಿರಗಳಲ್ಲಿ ಆಗಾಗ ಬಿಡುಗಡೆಯಾಗುವುದು ಮಾಮೂಲಿ. ಈಗ ಇದೇ ನಿರ್ದೇಶಕನ 'ಶ್' ಕೂಡ ಎರಡನೆ ಬಾರಿಗೆ ಹಿರಿತೆರೆಗೆ ಹಿಗ್ಗುತ್ತಿದೆ.
೨೨ ವರ್ಷದ ಹಿಂದೆ ಬಿಡುಗಡೆಯಾದ ಈ ಚಲನಚಿತ್ರಕ್ಕೆ ತಾಂತ್ರಿಕ ಗುಣಮಟ್ಟವನ್ನು ನವೀಕರಿಸಿವುದರೊಂದಿಗೆ ಈ ಸಿನೆಮಾ ಬಿಡುಗಡೆಯಾಗಲಿದೆ ಎಂದು ನಿರ್ಮಾಪಕ ಕುಮಾರ್ ಗೋವಿಂದ್ ತಿಳಿಸಿದ್ದಾರೆ.
ಈ ಸಿನೆಮಾವನ್ನು ೩೫ ಎಂ ಎಂ ರೀಲಿನಲ್ಲಿ ಚಿತ್ರೀಕರಣ ಮಾಡಲಾಗಿತ್ತು ಈಗ ಅದನ್ನು ಡಿಜಿಟಲ್ ಪ್ರದರ್ಶನಕ್ಕೆ ಸಜ್ಜುಗೊಳಿಸಲಾಗುತ್ತಿದೆ. ಹಾರರ್ ಭೀತಿಯನ್ನು ದ್ವಿಗುಣಗೊಳಿಸಲು ಕೆಲವು ಗ್ರಾಫಿಕ್ಸ್ ದೃಶ್ಯಗಳನ್ನು ಸೇರಿಸಲಾಗುವುದು ಎಂದು ಕೂಡ ಅವರು ತಿಳಿಸಿದ್ದಾರೆ.
"ಹೆಸರ ಪಟ್ಟಿ ಹೊರತುಪಡಿಸಿದರೆ, ಚಲನಚಿತ್ರವನ್ನು ಯಾವುದೇ ರೀತಿ ಬದಲಾಯಿಸುತ್ತಿಲ್ಲ. 'ಶ್' ಉಲಿತವನ್ನು ಸ್ವಲ್ಪ ಭೀಕರವಾಗಿ ಹೇಳಲಿದ್ದೇವೆ" ಎಂದಿದ್ದಾರೆ ಕುಮಾರ್ ಗೋವಿಂದ್.
ಇದಕ್ಕಾಗಿ ಅವರು ಉಪೇಂದ್ರ ಅವರನ್ನು ಸಂಪರ್ಕಿಸಲಿದ್ದಾರಂತೆ. "'ಶ್' ನ ಮೂಲ ನಿರ್ದೇಶಕ ಅವರು ಮತ್ತು ಹೊಸ ಅವತಾರದ ಬಗ್ಗೆ ಅವರ ನಿಲುವುಗಳನ್ನು ನಾನು ತಿಳಿದುಕೊಳ್ಳಬೇಕಿದೆ. ಸಿನೆಮಾಗೆ ಹೊಸ ಅವತಾರವನ್ನು ನೀಡಿದ ಮೇಲೆ ಅದಕ್ಕೆ ಮತ್ತೆ ಸೆನ್ಸಾರ್ ಆಗಬೇಕು. ನಂತರ ಒಂದೆರಡು ತಿಂಗಳುಗಳಲ್ಲಿ ಬಿಡುಗಡೆ ಮಾಡಲಾಗುವುದು" ಎಂದು ತಿಳಿಸಿದ್ದಾರೆ.
ಚೆನ್ನೈನ ಪ್ರಸಾದ್ ಲ್ಯಾಬ್ ನಲ್ಲಿ ಚಿತ್ರದ ನವೀಕರಣ ಕೆಲಸ ನಡೆಯುತ್ತಿದ್ದು "ನಾನಿದನ್ನು ೨೦ ದಿನಗಳಲ್ಲಿ ಮುಗಿಸಬಹುದಿತ್ತು ಆದರೆ ಗುಣಮಟ್ಟ ತೃಪ್ತಿದಾಯಕವಗಿರುವುದಿಲ್ಲ. ನನ್ನಂತೆಯೇ ಕೇರಳ ಮತ್ತು ಇತರ ಭಾಗದ ನಿರ್ಮಾಪಕರು ಅವರ ಸಿನೆಮಾಗಳನ್ನು ನವೀಕರಣಗೊಳಿಸಲು ಸಾಲಿನಲ್ಲಿದ್ದಾರೆ" ಎಂದು ಅವರು ತಿಳಿಸಿದ್ದಾರೆ.
ಇದೂ ಅಲ್ಲದೆ 'ಶ್-೨'ಕ್ಕೂ ಮಾತುಕತೆ ನಡೆದಿದೆಯಂತೆ. "ಉಪೇಂದ್ರ ಸದ್ಯಕ್ಕೆ ಉಪ್ಪಿ೨ನಲ್ಲಿ ನಿರತರಾಗಿದ್ದಾರೆ. ಅವರಿಗೆ ಒತ್ತಡ ಹೇರಲು ಇಷ್ಟವಿಲ್ಲ. 'ಶ್೨' ಮಾಡಿದರೆ ಅವರೊಟ್ಟಿಗೆ ಮಾಡುತ್ತೇನೆ" ಎನ್ನುತ್ತಾರೆ ಕುಮಾರ್.
Advertisement