ಬೆಂಗಳೂರು: ಈಗಾಗಲೇ ಹಲವಾರು ಸಿನೆಮಾಗಳಲ್ಲಿ ನಟಿಸಿ ಹಾಸ್ಯನಟನಾಗಿ ತಳವೂರಿರುವ ಚಿಕ್ಕಣ್ಣ ಈಗ ಸಿನೆಮಾವೊಂದಕ್ಕೆ ಗೀತರಚನಕಾರನಾಗಿ ಪಾದಾರ್ಪಣೆ ಮಾಡಿದ್ದಾರೆ.
ಹಾಸ್ಯನಟನಾಗಿ, ನಾಯಕ ನಟನಾಗಿ, ಹಿನ್ನಲೆ ಗಾಯಕನಾಗಿ ಈಗಾಗಾಲೇ ಹೆಸರುವಾಸಿಯಾಗಿರುವ ಚಿಕ್ಕಣ್ಣ ಈಗ ಗೌಸ್ ಪೀರ್ ಅವರ 'ಶಾರ್ಪ್ ಶೂಟರ್' ಸಿನೆಮಾಗೆ ಹಾಡು ಕೂಡ ಬರೆಯುತ್ತಿದ್ದಾರೆ. ಈ ಸಿನೆಮಾದಲ್ಲಿ ನಟ ದಿಗಂತ್ ಕೂಡ ಹಾಡಲಿದ್ದಾರೆ.
"ಇದೇ ಮೊದಲ ಬಾರಿ ನಾನು ಹಾಡು ಬರೆಯುತ್ತಿರುವುದು. ನನ್ನ ತಲೆಗೆ ಹೊಳೆದದ್ದನ್ನೆಲ್ಲಾ ಬರೆದಿದ್ದೇನೆ. ನಿರ್ದೇಶಕ ಗೌಸ್ ಪೀರ್ ಅವರು ಸಂದರ್ಭವನ್ನು ವಿವರಿಸಿದರು. ಹಾಗು ಹಾಡಿನಲ್ಲಿ ಹಾಸ್ಯ ಲೇಪನ ಇದ್ದಿದ್ದರಿಂದ ನನಗೆ ಸುಲಭವಾಯಿತು. ಪ್ರೇಮ ಸಂದರ್ಭಕ್ಕೆ ಗೀತ ರಚನೆ ಮಾಡಬೇಕಿದ್ದಲ್ಲಿ ಬಹುಶಃ ನನಗೆ ಕಷ್ಟವಾಗುತ್ತಿತ್ತು" ಎನ್ನುತ್ತಾರೆ ಚಿಕ್ಕಣ್ಣ.
ಮಕ್ಕಳು ಕೂಡ ಸುಲಭವಾಗಿ ಹಾಡಿಕೊಳ್ಳಬಹುದಾದಂತೆ ಸರಳ ಭಾಷೆ ಬಳಸಿದ್ದೇನೆ ಎನ್ನುತ್ತಾರೆ ಚಿಕ್ಕಣ್ಣ. ಕೇವಲ ೨ ಘಂಟೆಗಳಲ್ಲಿ ಹಾಡು ಬರೆದು ಮುಗಿಸಿದ್ದೇನೆ ಎನ್ನುವ ಚಿಕ್ಕಣ್ಣ ಅಂತಿಮ ಸಾಹಿತ್ಯವನ್ನು ಎಲ್ಲರೂ ಮೆಚ್ಚಿದ್ದಾರಂತೆ.
ಆಡಿಯೋ ಜುಲೈನಲ್ಲಿ ಬಿಡುಗಡೆಯಾಗಲಿದ್ದು, ಸಿನೆಮಾ ಆಗಸ್ಟ್ ನಲ್ಲಿ ಬಿಡುಗಡೆಯಾಗಲಿದೆಯಂತೆ.
ಬಹುತೇಕ ಕನ್ನಡ ಸಿನೆಮಾಗಳ ಗೀತ ಸಾಹಿತ್ಯದಿಂದ ರೋಸಿಹೋದಂತೆ ಕಂಡಿರುವ ಸಿನೆ ರಸಿಕರಿಗೆ ಈ ಹಾಡು ಇಷ್ಟವಾಗಲಿ ಎಂಬುದೇ ನಮ್ಮ ಹಾರೈಕೆ.
Advertisement