ಬೆಂಗಳೂರು: ಎರಡು ವಾರಗಳ ಹಿಂದೆ ಅಪಘಾತವೊಂದರಲ್ಲಿ ಕಾಲಿಗೆ ಪೆಟ್ಟು ಮಾಡಿಕೊಂಡಿದ್ದ ನಟಿ ಕೃತಿ ಕರಬಂಧ ಈಗ ಗುಣಮುಖರಾಗಿದ್ದಾರೆ. ಅವರ ಬಾಲಿವುಡ್ ಪಾದಾರ್ಪಣೆ 'ರಾಸ್ ರಿಬೂಟ್' ಗೆ ಮುಂಬೈನಲ್ಲಿ ಇಂದಿನಿಂದ ಡಬ್ಬಿಂಗ್ ಕಾರ್ಯದಲ್ಲಿ ತೊಡಗಿಸಿಕೊಳ್ಳಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಇದೆ ಮೊದಲ ಬಾರಿಗೆ ನಟಿ ತಮ್ಮದೇ ಕಂಠದಲ್ಲಿ ಸಿನೆಮಾವೊಂದಕ್ಕೆ ಡಬ್ ಮಾಡುತ್ತಿರುವುದು. ವಿಕ್ರಂ ಭಟ್ ನಿರ್ದೇಶನದ, ಎಮ್ರಾನ್ ಹಶ್ಮಿ ನಿರ್ದೇಶನದ ಈ ಚಿತ್ರದ ಪ್ರಚಾರ ಹಾಡಿನ ಚಿತ್ರೀಕರಣದಲ್ಲಿಯೂ ಕೃತಿ ಭಾಗವಹಿಸಲಿದ್ದಾರೆ. ಈ ಸಿನೆಮಾ ವಿಶ್ವದಾದ್ಯಂತ ಸೆಪ್ಟೆಂಬರ್ 16 ಕ್ಕೆ ಬಿಡುಗಡೆಯಾಗಲಿದೆ.
ಹಾಗೆಯೇ ನಟಿ ಅವರ ತಮಿಳು ಸಿನೆಮಾ 'ಬ್ರೂಸ್ ಲಿ' ಸಿನೆಮಾದ ಹಾಡಿನ ಚಿತ್ರೀಕರಣದಲ್ಲಿಯೂ ತೊಡಗಿಸಿಕೊಳ್ಳಲಿದ್ದಾರೆ. ಇದನ್ನು ಪ್ರಶಾಂತ್ ಪಂಡಿತ್ ರಾಜ್ ನಿರ್ದೇಶಿಸುತ್ತಿದ್ದು ಮುಖ್ಯ ಪಾತ್ರದಲ್ಲಿ ಜಿ ವಿ ಪ್ರಕಾಶ್ ನಟಿಸಿದ್ದಾರೆ.
ನಂತರ ಅವರು ಕನ್ನಡಕ್ಕೆ ಹಿಂದಿರುಗಿ ದುನಿಯಾ ವಿಜಯ್ ನಟನೆಯ 'ಮಾಸ್ತಿ ಗುಡಿ' ಸೆಟ್ ಗೆ ಸೆಪ್ಟೆಂಬರ್ ನಲ್ಲಿ ಸೇರಿಕೊಳ್ಳಲಿದ್ದಾರೆ. ನಾಗಶೇಖರ್ ನಿರ್ದೇಶನದ ಈ ಚಿತ್ರದ ಚಿತ್ರೀಕರಣವನ್ನು ಕೃತಿ ಗಾಯಗೊಂಡಿದ್ದರಿಂದ ಮುಂದೂಡಲಾಗಿತ್ತು.
ಮಾಸ್ತಿ ಗುಡಿ ಸಿನೆಮಾದಲ್ಲಿ ದುನಿಯಾ ವಿಜಯ್ ಜೊತೆಗೆ ಅಮೂಲ್ಯ ಕೂಡ ನಟಿಸಿದ್ದಾರೆ.