'ಕಬಾಲಿ' ಬಿಡುಗಡೆಗೆ ತಡೆ ಕೋರಿ ಮದ್ರಾಸ್ ಹೈಕೋರ್ಟ್ ನಲ್ಲಿ ಅರ್ಜಿ

ಚೆನ್ನೈ: ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ 'ಕಬಾಲಿ' ಚಿತ್ರ ಬಿಡುಗಡೆಗೆ ಈಗ ಆತಂಕ ಎದುರಾಗಿದೆ.

ಹೌದು. ವಿಶ್ವದಾದ್ಯಂತ ನಾಳೆ ತೆರೆ ಕಾಣಬೇಕಿದ್ದ ಕಬಾಲಿ ಚಿತ್ರದ ಬಿಡುಗಡೆಗೆ ತಡೆ ಕೋರಿ ಮದ್ರಾಸ್ ಹೈಕೋರ್ಟ್‌ನಲ್ಲಿ ಮತ್ತೊಂದು ಅರ್ಜಿ ಸಲ್ಲಿಸಲಾಗಿದೆ. ಕಬಾಲಿ ಚಿತ್ರ ಬಿಡುಗಡೆಯನ್ನು ತಡೆಯಬೇಕೆಂದು ಕೋರಿ ಸುಕ್ರ ಫಿಲಿಮ್ಸ್‌ನ ಆರ್‌. ಮಹಾಪ್ರಭು ಎಂಬುವವರು ಮದ್ರಾಸ್ ಹೈಕೋರ್ಟ್‌ ಮೊರೆ ಹೋಗಿದ್ದರು. 

ಈ ಹಿಂದೆ 'ಲಿಂಗ' ಚಿತ್ರದ ವಿತರಣೆ ಮಾಡಿ ನಷ್ಟ ಅನುಭವಿಸಿದ್ದೇನೆ ಎನ್ನುತ್ತಿರುವ ಮಹಾಪ್ರಭು, ರಜನಿಕಾಂತ್ ಹಾಗೂ ಚಿತ್ರ ನಿರ್ಮಾಪಕ ರಾಕ್‌ಲೈನ್ ನಷ್ಟ ಪರಿಹಾರ ನೀಡಿಲ್ಲ. 89 ಲಕ್ಷ ರಪಾಯಿ ನಷ್ಟ ಪರಿಹಾರ ಒದಗಿಸುವುದಾಗಿ ನೀಡಿದ್ದ ಭರವಸೆಯನ್ನು ಈಡೇರಿಸಿಲ್ಲ. ಹೀಗಾಗಿ ನನಗೆ ಹಣ ಸಿಗುವವರೆಗೆ ಕಬಾಲಿ ರಿಲೀಸ್ ಆಗಬಾರದು ಎಂದು ಮಹಾಪ್ರಭು ಹೈಕೋರ್ಟ್‌ಗೆ ಮನವಿ ಮಾಡಿದ್ದಾರೆ. 

ಈ ಅರ್ಜಿಯನ್ನು ವಿಚಾರಣೆಗೆ ಸ್ವೀಕರಿಸಿರುವ ಮದ್ರಾಸ್‌ ಹೈಕೋರ್ಟ್ ನ್ಯಾಯಮೂರ್ತಿ ಎಂ ಎಂ ಸುಂದರೇಶ್ ರಜನಿಕಾಂತ್, ಚಿತ್ರದ ನಿರ್ಮಾಪಕರಿಗೆ ನೊಟೀಸ್ ಜಾರಿ ಮಾಡಿದ್ದಾರೆ.