ಕಿರುಕುಳಕ್ಕೆ ಬೇಸತ್ತು ತಮಿಳು ಚಿತ್ರ ನಿರ್ಮಾಪಕ, ನಿರ್ದೇಶಕ ಬಿ ಅಶೋಕ್ ಕುಮಾರ್ ಆತ್ಮಹತ್ಯೆ

ಚೆನ್ನೈ: ಸಾಲ ನೀಡಿದಾತನಿಂದ ಕಿರುಕುಳ ತಾಳಲಾರದೇ ತಮಿಳಿನ ಚಿತ್ರ ನಿರ್ಮಾಪಕ ಹಾಗೂ ನಿರ್ದೇಶಕ ಬಿ ಅಶೋಕ್ ಕುಮಾರ್ ಮಂಗಳವಾರ ರಾತ್ರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ.

ಚೆನ್ನೈನ ಅಳ್ವಾರ್ ತಿರುನಗರ್ ನಿವಾಸದಲ್ಲಿ ಅಶೋಕ್ ಕುಮಾರ್ ಅವರ ಮೃತ ದೇಹ ಪತ್ತೆಯಾಗಿದ್ದು, ಒಂದು ಡೆತ್ ನೋಟ್ ಕೂಡ ಪತ್ತೆಯಾಗಿದೆ. ಡೆತ್ ನೋಟ್ ನಲ್ಲಿ ತಮ್ಮ ಸಾವಿಗೆ ಸಾಲಗಾರರ ಕಿರುಕುಳವೇ ಕಾರಣ ಎಂದು  ಅಶೋಕ್ ಕುಮಾರ್ ಹೇಳಿಕೊಂಡಿದ್ದಾರೆ. ತಮ್ಮ 7 ವರ್ಷಗಳ ಸ್ನೇಹಿತ ಹಾಗೂ ಮಧುರೈ ಮೂಲದ ಓರ್ವ ಫೈನಾನ್ಶಿಯರ್ ರಿಂದ ಅಶೋಕ್ ಸಾಲ ಪಡೆದಿದ್ದರಂತೆ. ಆದರೆ ಇತ್ತೀಚೆಗೆ ಸಾಲ ವಾಪಸ್ ಮಾಡುವಂತೆ  ಸಾಲ  ನೀಡಿದ್ದಾತ ಕಿರುಕುಳ ನೀಡುತ್ತಿದ್ದ. ಆತನ ಕಿರುಕುಳ ತಾಳಲಾರದೇ ಆತ್ಮಹತ್ಯೆಗೆ ಶರಣಾಗುತ್ತಿದ್ದೇನೆ ಎಂದು ಅಶೋತ್ ಕುಮಾರ್ ಡೆತ್ ನೋಟ್ ನಲ್ಲಿ ಬರೆದಿದ್ದಾರೆ.

ಪ್ರಸ್ತುತ ಅಶೋಕ್ ಕುಮಾರ್ ಅವರ ಮೃತದದೇಹವನ್ನು ರೋಯಪೇಟ ಸರ್ಕಾರಿ ಆಸ್ಪತ್ರೆಗೆ ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಆತ್ಮಹತ್ಯೆ ಪ್ರಚೋದನೆ ನೀಡಿದ  ಆರೋಪದ ಮೇರೆಗೆ ಮಧುರೈ ಮೂಲದ ಫೈನಾನ್ಶಿಯರ್ ವಿರುದ್ಧ ಐಪಿಸಿ ಸೆಕ್ಷನ್ 306ರ ಅಡಿಯಲ್ಲಿ ಪೊಲೀಸರು ದೂರು ದಾಖಲಿಸಿಕೊಂಡು ವಿಚಾರಣೆ ನಡೆಸುತ್ತಿದ್ದಾರೆ.

ಮೃತ ಅಶೋಕ್ ಕುಮಾರ್ ನಟ ನಿರ್ದೇಶಕ ಶಶಿಕುಮಾರ್ ಅವರ ಸಂಬಂಧಿಯಾಗಿದ್ದು, ಅವರ ಪೊರಾಲಿ ಮತ್ತು ಕೋಡಿ ವೀರನ್ ಚಿತ್ರಗಳು ಇನ್ನಷ್ಟೇ ಬಿಡುಗಡೆಯಾಗಬೇಕಿದೆ.