ಭಿನ್ನ ನಿರ್ದೇಶಕ ಆದರ್ಶ್ ಈಶ್ವರಪ್ಪ ಅವರ ಕಿರುಚಿತ್ರ 'ದ ವಾರಿಯರ್'

ಶುದ್ಧಿ ಚಿತ್ರದ ಮೂಲಕ ಹೆಸರು ಗಳಿಸಿರುವ ನಿರ್ದೇಶಕ ಆದರ್ಶ್ ಈಶ್ವರಪ್ಪ ಭಿನ್ನ ಎಂಬ ಮತ್ತೊಂದು ಚಿತ್ರದೊಂದಿಗೆ ಪ್ರೇಕ್ಷಕರ ಮುಂದೆ ಬರುತ್ತಿದ್ದು ಈ ಮಧ್ಯೆ ಕಿರು ಚಿತ್ರವೊಂದನ್ನು ತಯಾರಿಸುತ್ತಿದ್ದಾರೆ. 16 ನಿಮಿಷಗಳ ಚಿತ್ರಕ್ಕೆ ದ ವಾರಿಯರ್ ಎಂದು ಹೆಸರಿಡಲಾಗಿದ್ದು ಕಳೆದ ತಿಂಗಳು ಧಾರವಾಡದ ನಿರ್ಮಾಣ ಹಂತದ ಕಟ್ಟಡ ಕುಸಿದು ಬಿದ್ದ ಘಟನೆಯನ್ನಾಧರಿಸಿದ್ದಾಗಿದೆ.

ನಾಗತಿಹಳ್ಳಿ ಚಂದ್ರಶೇಖರ್ ಅವರ ಟೆಂಟ್ ಸಿನಿಮಾದಲ್ಲಿ ವಿದ್ಯಾರ್ಥಿಗಳನ್ನು ನಿರ್ದೇಶಕರು ಈ ಕಿರುಚಿತ್ರಕ್ಕೆ ಬಳಸಿಕೊಂಡಿದ್ದು ಚಿತ್ರದ ಶೂಟಿಂಗ್ ಆರಂಭವಾಗುವ ಮೊದಲು ಎರಡು ವಾರಗಳ ರಿಹರ್ಸಲ್ ಮಾಡಲಾಗಿತ್ತು. ಬೆಂಗಳೂರಿನ ಕಾಫಿ ಶಾಪ್ ವೊಂದರಲ್ಲಿ ನಾಲ್ವರು ಸ್ನೇಹಿತರು ಮಾತನಾಡಿಕೊಳ್ಳುತ್ತಾ ಚಿತ್ರ ಆರಂಭವಾಗುತ್ತದೆ.