ಟಗರು ಚಿತ್ರದ ಮೂಲಕ ತನ್ನ ದಿಸೆಯನ್ನೇ ಬದಲಾಯಿಸಿಕೊಂಡ ಧನಂಜಯ್ ‘ಪಾಪ್ ಕಾರ್ನ್ ಮಂಕಿ ಟೈಗರ್‘ ಚಿತ್ರದಲ್ಲಿ ವಿಭಿನ್ನ ಲುಕ್ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಪೋಸ್ಟರ್ ಮೂಲಕ ಸಾಕಷ್ಟು ನಿರೀಕ್ಷೆ ಹುಟ್ಟು ಹಾಕಿರುವ ‘ಪಾಪ್ಕಾರ್ನ್ ಮಂಕಿ ಟೈಗರ್’ ಸಿನಿಮಾದ ಟೀಸರ್ ರಿಲೀಸ್ ಆಗಿದ್ದು ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ. ಅಲ್ಲದೆ, ಸಿನಿಮಾ ಏನನ್ನು ಹೇಳಲಿದೆ ಎನ್ನುವ ಚಿಕ್ಕ ಹಿಂಟ್ ಸಿಕ್ಕಿದೆ.
ಈ ಮೊದಲು ‘ಟಗರು’ ಮೂಲಕ ಪ್ರೇಕ್ಷಕರ ತಲೆಗೆ ಒಂದಷ್ಟು ಕೆಲಸಕೊಟ್ಟಿದ್ದರು ನಿರ್ದೇಶಕ ಸೂರಿ. ಈಗ ‘ಪಾಪ್ಕಾರ್ನ್ ಮಂಕಿ ಟೈಗರ್’ ಮೂಲಕ ಸೂರಿ ಪ್ರೇಕ್ಷಕರ ತಲೆಗೆ ಮತ್ತಷ್ಟು ಕೆಲಸ ಕೊಡುವ ಸೂಚನೆ ಟೀಸರ್ನಲ್ಲಿ ಸಿಕ್ಕಿದೆ.
ಹಳೆಯ ಕಟ್ಟಡ, ನಲ್ಲಿಯಲ್ಲಿ ತೊಟ್ಟಿಕ್ಕುವ ನೀರು, ನೆಲಕ್ಕೆ ಬಿದ್ದ ರಕ್ತದ ಹೊಳೆ, ನದಿಯ ನೀರಲ್ಲಿ ಬರೆತ ರಕ್ತ, ಒಂದು ಕೊಲೆ, ಮುಗ್ಧ ಮಗುವಿನ ಮುಖ, ಈ ಮಧ್ಯೆ ಬಂದು ಹೋಗುವ ಅನೇಕ ಮುಖಗಳು. ಹೀಗೆ ಟೀಸರ್ನಲ್ಲಿ ಸಾಕಷ್ಟು ವಿಚಾರಗಳನ್ನು ಎಷ್ಟು ಬೇಕೋ ಅಷ್ಟೇ ಹೇಳಿದ್ದಾರೆ ಸೂರಿ. ಈ ಮೂಲಕ ಕುತೂಹಲ ಹೆಚ್ಚಿಸುವ ಕೆಲಸ ಮಾಡಿದ್ದಾರೆ.
ಇನ್ನು, ಡಾಲಿ ಧನಂಜಯ್ ಟೀಸರ್ನಲ್ಲಿ ಹಲವು ಅವತಾರಗಳಲ್ಲಿ ಕಾಣಿಸಿಕೊಳ್ಳುತ್ತಾರೆ. ಅಂದರೆ, ಸಿನಿಮಾದಲ್ಲೂ ಧನಂಜಯ್ಗೆ ಹಲವು ಶೇಡ್ಗಳಿವೆ ಎನ್ನುವ ವಿಚಾರ ಪಕ್ಕಾ ಆಗಿದೆ. ಚರಣ್ ರಾಜ್ ಹಿನ್ನೆಲೆ ಸಂಗೀತ ಗಮನ ಸೆಳೆಯುತ್ತದೆ.
ಈ ಸಿನಿಮಾದ ಟೀಸರ್ ಇಂದು ಬಿಡುಗಡೆಯಾಗಿದ್ದು, ಯ್ಯೂಟೂಬ್ನಲ್ಲಿ ಹವಾ ಎಬ್ಬಿಸುತ್ತಿದೆ. ಮಾತ್ರವಲ್ಲದೆ, ಟ್ವಿಟ್ಟರ್ನಲ್ಲೂ ಟ್ರೆಂಡಿಂಗ್ನಲ್ಲಿ ಕಾಣಿಸಿಕೊಂಡಿದೆ. ಹೊಸ ಗೆಟಪ್, ಖಡಕ್ ಡೈಲಾಗ್ನಲ್ಲಿ ಕಾಣಿಸಿಕೊಂಡ ಧನಂಜಯ್ ಟಗರು ಡಾಲಿಯಂತೆ ಮತ್ತೊಮ್ಮೆ ಹವಾ ಎಬ್ಬಿಸುವುದು ಪಕ್ಕಾ.
ಈ ಚಿತ್ರವನ್ನು ಸುಧೀರ್ ಕೆ.ಎಂ ನಿರ್ಮಿಸುತ್ತಿದ್ದಾರೆ. ಶೇಖರ್ ಎಸ್ ಛಾಯಾಗ್ರಹಣ, ಚರಣ್ ರಾಜ್ ಸಂಗೀತ ಸಂಯೋಜನೆ ಹಾಗೂ ದೀಪು ಎಸ್. ಕುಮಾರ್ ಸಂಕಲನ ಚಿತ್ರಕ್ಕಿದೆ. ಡಾಲಿ ಧನಂಜಯ, ನಿವೇದಿತಾ, ಕಾಕ್ರೋಚ್, ನವೀನ್, ಅಮೃತಾ ಅಯ್ಯಂಗಾರ್, ಸಪ್ತಮಿ, ಮೋನಿಶಾ ನಾಡಿಗೇರ್ ಹಾಗೂ ಗೌತಮ್ ಚಿತ್ರದಲ್ಲಿ ಪ್ರಮುಖಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಜನವರಿ ಕೊನೆ ಅಥವಾ ಫೆಬ್ರವರಿ ಮೊದಲ ವಾರದಲ್ಲಿ ಸಿನಿಮಾ ರಿಲೀಸ್ ಆಗುವ ಸಾಧ್ಯತೆಯಿದೆ.
Advertisement